Happy New Year?

今日係除夕, 本應約左朋友睇戲又或者出街count down, 點知竟然病左, 被迫留係屋企休息, 真係掃興! 兩個多禮拜o既OT日子, 我終於病左, 真係唔挨得, 唔通我真係少奶命? 尋日朋友聚會佢地已經發覺我面色很差, 而我都提出早D番屋企, 因為真的好辛苦, 整個人都攰到不知所謂, 又好想嘔。 番到屋企真係發燒呢, 蓋住厚厚的棉胎都成個人發冷, 一時又出汗, 焗左一晚汗好左少少, 不過今日都係要"冷"番公司攪埋D手尾, 真可憐.....

踩左兩個禮拜我真係感覺自己生命一點點流失, 我應該算係積勞成疾吧! 個胃到而家都仲好唔舒服, 可能因為食無定時啦, 人家成日OT都無事, 我只不過O左兩個星期就死哂狗咁, 真係屎! 新年願望我要所有屋企人同朋友都身體健康(包括我), 自己就搵份好工, 唔要再待係度喇, 搵多D錢, 桃花勁旺, 曼聯愈打愈好, 打死車仔.....

假期完結, 唔想番工

3日半o既聖誕假話咁快就完, 刻意排滿幾日節目, 希望可以令自己開心d, 有少少成效, 不過一諗起又要過番d朝10晚10 o既日子又真係笑唔出來, 3日半行程如下 :

十二月二十四日 : 下晝約左親愛的表弟食lunch, 然後陪佢行街買抽獎禮物, 要50元以下又要夠賤的, 於是用左我個提議, 買左廁所板一塊。 然後番屋企放低一大堆要拎番屋企打算假期做o既 file, 稍作梳洗又跟朋友番教會, 我諗o係呢d日子去呢d咁神聖o既地方應該會幾有feel, 我都希望呢d感覺會令我呢期極差o既心情有所平靜吧! 結果都無令我失望, 無我預期的悶, 仲有意外收獲, o係一個福音劇度竟然睇到廖啟智o既演出, 非常精彩! 跟住同朋友一齊回荃灣小肥羊打邊爐, 好正, 不過貴左少少, 又唔洗等位, 全場5圍人都無, 奇境! 飲左少少啤酒, 番到去已經有少少wing, 真係退步!

十二月十五日 : 本來約左朋友去睇剛上晝o既四眼雞丁, 點知佢竟然用一間少至20人o既細院上, 當然買唔到飛啦, 臨時再改睇king kong囉, 果日華懋竟然全部飛都係30蚊, 抵到爛! 本來打算睇完戲入元朗食野的, 點知朋友突然打黎話有免費buffet食, 我地當然即刻lur飯應去啦, 於是行程又有更改, 我地食果間係旺角o既史丹福酒店, 無乜太多野食, 不過唔洗錢就唔可以要求囉.....之後行左一陣就無節目喇, 送左住最遠o既朋友回上水屋企, 由於睇一次見唔好意思要佢跟我朋友同車吧, 於是我地四人陪她先回上水囉,　佢認真有面, 在此多謝揸長途車的司機朋友, 呵呵! o係回程途中, 我地生積三人組好快咁發現又有少少餓了, 於是路一轉又去左深水步食甜品, 我食左一件榴槤pan cake加碗豆腐花, 然後真係番屋企了。
P.S. 呢晚番去回家再OT至凌晨四時

十二月二十六日 : 本來打算同朋友去完沙田做gym再去睇無極, 點知超多人排隊, 痴線! 於是放棄, 行左一陣再食埋晚餐, 睇埋心郁郁想買o既 PSP就趕番屋企睇我心愛的曼聯, 結果都無令我失望, 輕取西布朗三比零, 最衰車仔又贏啦, 頂!
P.S. 今晚又如是OT至凌晨四時

十二月二十七日 : 12點起身, 繼續做公司野, 再唔做哂聽日番到去就仆街喇, 新o既一堆已經堆住黎, 做到5點, 梳洗後去青衣城同TI舊同學食飯, 無所不談十分開心, 不過到尾聲想起要番工又down了。

極度低潮

呢個星期, 成個人都處於非常低落o既狀態, 一星期4晚OT, 做冬人人收早我偏偏收晏, 叫媽媽留飯到我10點番屋企先食, 都叫有過節吧! over load的工作量都令我抖唔過氣, 對住滿枱工作唔知如何做起, 工廠出貨的速度遠遠超過我工作的速度, 有一下真係有衝動跪o係老細面前求佢唔好再出貨了吧! 我開始有d揭撕底里了......

日日一個人o係公司作戰感覺真難受, 美其名有人幫手, 但果位太子爺如何有用我又唔講得出黎, 說回頭都係一人公司, 或者我真係如朋友所說咁唔挨得啦, 太多感覺好難講出黎, 又唔會有人幫到我o既, 都係收埋自己慢慢化解啦, 咁大個人應該學會調適自己。

臨近聖誕, 新年, 外頭充滿快樂氣氛, 可惜我一d都唔受感染, 希望呢個低潮盡快過去啦!

繼續OT的一夜, 加油!

靚仔新目標

近期俾我發現左繼郭品超之後另一台灣靚仔, 就係賀軍翔, 我係o係一d台灣綜藝節目發現呢個靚仔, 之後搵番佢d劇集黎追, 最受歡迎果套就係"惡魔在身邊", 於是download左黎睇。

劇情有d似流星花園, 都係好偶像o既偶像劇, 原來都係由日本漫畫改編的。 好唔好睇對我黎講唔重要, 最重要都係睇人, 賀軍翔係男主角, 女主角係近期都幾紅的楊丞琳。 賀軍翔確係有d初出道古天樂o既影子, 真係好正, 高大威猛, 笑起上黎仲好sweet添, 呵呵......發夢都見到佢呢! (真係中哂毒)

點解之前去兩次台灣都撞唔到呢d質素o既靚仔架, 今次一定要努力, 睇住黎啦!

Harddisk

買左舊Mastor 160GB o既Harddisk, 打算只係要黎裝data, 唔知點解裝極都有問題，每次熄完機再開佢就話Primary Slave Failure, 每次都要我入一入bios再出番去先無問題，已經整左我成日，無理由次次開機都要咁架嘛，好似好化學咁，好驚ｄ野會唔見左，如果成舊蚊番出黎仲死，直情detect唔到添！

究竟係咩問題，睇埋個說明書佢話有可能係底版個bios 唔夠update，但我塊版只係買左一年幾，我心思思又想試下update 個bios喎，但朋友叫我盡量都唔好攪，一個唔小心會撞壞可能連機都開唔番，真煩！　豈有此理，我一定會攪掂佢，再唔得先搵高人求救！

收獲豐富

今日只需番半日, 於是約左好朋友到旺角瘋狂shopping一番,　促進香港經濟,　收獲甚多, 戰利品如下 :

1. 160BG Maxtor Harddisk一個
2. 毛線衫一件
3. 運動褲一條
4. 燈芯絨褲一條
5. 毛毛褸一件
6. 皮帶兩條（一條我一條爸爸）

最後一樣係斜咩袋一個，係早收的生日禮物，係我幫朋友試上身時，佢發覺都幾襯我而我本身都幾鍾意，於是佢就提議不如送俾我當作生日禮物呢，真開心，哈哈！

回覆平靜

困擾左幾日o既煩悶情緒到今日終於稍稍舒緩, 而心裡面都有個大概, 因為尋晚見過一位朋友傾訴完, 我突然發現原來有d部份佢了解過我多過我了解自己呢? 可能我當局者迷吧, 不枉十幾年感情的好姊妹, 算一算我地由中三識到而家, 真係好.....

另外, 今日買左本蘇民峰o既狗年運程書, 一睇, 我下年運程相當唔錯, 而且桃花勁旺, 好o既當然全單照收啦, 睇完之後人都開心d, 覺得人生充滿希望, 多謝你呀蘇民峰!

亂

呢兩日思緒極其混亂, 成個人處於呆滯狀態, 唔知自己諗緊乜, 唔知自己想要乜, 突如其來o既事情打亂我一向平靜o既生活。 我可以一個人坐上成個鐘, 對眼無焦點, 腦海有時有o野有時無o野, 神情恍惚, 連阿媽都發現我o既唔妥我又無從說起!

我一向誇耀自己有極強cheer up自己的能力, o係呢兩日完全失去功力。 陳生真係無講錯, 我個人的確缺乏解決問題o既能力, 其實我煩咩呢? 又無人逼我, 佢係一個好人, 好到我無話可說, 就係咁我先要更小心, 我寧願俾人hurt都唔要hurt人, 果種內疚感真係會殺得死人。 朋友講得o岩, 我由頭都尾都怕自己做錯決定吧! 怕最後結果唔係我想要的, 怕搏怕輸怕傷人怕失感情, 典型山羊座-船頭驚得船尾驚賊, 無得救了!

而家首先要做就係平靜番自己, 因為我實在處於不能思考的狀態, 事情總有解決o既一日, 或者唔係我想像中的差, 努力回復正常生活, 加油!

賤男

近期坊間好常的一個terms, 仲激d就可以叫"世紀大賤男", 雖則難聽左d, 不過真係好貼切。 自從有左呢個字, 發覺原來身邊都充斥唔少"賤男", o係我心目中"賤男" o既定義不外於一腳踏兩船, 見異思遷而又說得理直氣壯的男人。

呢個字o既出現同廣泛應用, 確實証明左男人好多都好賤的, 你睇又唔見有"賤女"呢個字出現? 唔該d男人反醒下, 求神拜佛唔好俾我撞到呢d"賤男"!

愛上憶蓮

睇完林憶蓮演唱會, 香港樂壇真係好需要呢類歌手, 現場聽佢一首新歌, 近排電台又勁plug, 愈聽愈鍾意, 佢唱得好不在話下, 林夕d詞真係句句到肉。

為何他會離開你 填詞：林夕 作曲：雷頌德

為了他　令你哭為你哭　令我哭　為你很顧慮
難為你跟他一對　潑過無盡冷水
為愛他　為掛他　為怨他為了他習慣受罪　
如今他走了請不要追
舊情　注定　丟淡問題不只一晚　
命途總可以揀

為何他會離開你　誰叫你變了他知己
常纏在一起　會換來危機
他找你　不找你　你竟幼稚到講道理
男人總輕視你寸步難離
原來擁吻　如不放　錯在你

沒有他　便叫他沒有花　便要花　漸愛出慣例
常揹著一生一世　氣壓蠶蝕美麗
為了他　做過東　做過西若似奴隸與賣藝　
如此的悲壯已經失勢
情人　要被　輕放
自然相處洽當　為何不聽我講

為何他會離開你　誰叫你自己不會飛
常纏在一起　會換來危機
他找你　不找你　你不智地對他生氣
問他等於問你　
當我問候你雙眼像鑿滿傷悲　
誰又敢深愛你但未怪你
昨天那天真的你
若是還有骨氣　拿回纏他的心機
拿去愛惜你　怎可洩氣

為何他會離開你　誰叫你沒火花點起
仍纏在一起　誰亦會怕膩
他找你　不找你　有他那苦衷兼道理
男人總輕視你寸步難離
原來擁吻　如不放　錯在你
熱情　冷淡　反悔
為何　怎麼　怎會
談情後你我也學會

晴天霹靂

臨訓前開一開電腦, 竟然收到一個嚇人o既消息, 我地追隨左12多年的大隊長堅尼突然離開曼聯, 我o係電腦前呆左一陣, 之後四圍搵消息來源證實, 真架, 係真架! 連官網都出埋, 想唔信都唔得。 究竟發生咩事? 相信大部份曼迷都知佢會退下來, 或者升上管理層好似麥佳亞咁, 就算係走都唔係呢個時候, 真係詭異。

各方意見都覺得因為佢前排批評過半隊隊友, 但我覺得佢每一個批評都係善意同正確架喎, 批評過後班大帝知恥近乎勇一舉打敗車仔添, 咁有power o既批評係堅尼先做得出而又咁有效, 何樂而不為? 堅尼係我覺得唯一一個真心愛曼聯o既球員, 愛之深責之切, 仲有佢場上o既感染力, 對每一個隊友o既提場係曼聯稱霸多年原因之一。 究竟費sir攪乜鬼? 已經有更好o既人選? 雖然堅尼人工高達10萬磅周薪但絕對物有所值, 希望曼聯真係如外間所講俾左一筆可觀o既"安家費"俾堅尼啦, 佢呢12年o既貢獻完全受得起, 縱橫沙場, 滿身傷患, 既然人都走左唔可以用好d方法報答佢, 希望攪番個告別賽好好睇睇啦!

再見喇, 我地永遠的大隊長, 有幸我o係奧脫福現場見過你比賽, 遠遠的我都感受到你o既感染力, good luck!

一球成名

哈! 上左咁耐先去睇呢套戲, 本來都唔抱太大興趣去睇, 因為講果隊球隊又唔係我隊愛隊曼聯, 而係我一向都唔太鍾意的紐卡素。 星期六四點場, 都有8成人入場, 上左咁耐算好成績, 男主角真係好似足球員個樣, 雖然唔知佢真人識唔識踢波, 再加埋d感人位, 整套戲又比我想像中好睇喎。

不過有D唔太合乎現實, 邊有可能一個咁出名球會會咁順攤俾個細路去試腳, 仲要唔止一次機會。 當碧咸出現引起現場一d叫聲(包括我), 仲有施單, 魯爾, 艾力臣等等.....最多出現當然係一班紐卡素球星, 有舒利亞, 戴亞, 艾美奧比, 走左o既羅拔同贊拿斯。

總括黎講呢套戲係美化左紐卡素呢個球隊, 如果係曼聯的話我會enjoy好多!

敗仗連場

又輸一場! 繼4比1災難性輸俾米堡之後, 周中歐聯作客實力唔強o既里爾, 一心以為可以反底, 點知又係輸...好耐無見過曼聯贏波, 球員領隊出現過笑容。 究竟輸到幾時呢? 睇黎最快都要過埋呢個禮拜, 周日對車仔未打已經輸。

三更半夜挨眼訓睇左尋晚場波, 真係一肚氣, 中場完全癱瘓, 有唔少fans之前投訴史高斯, 滿有期望呢場無佢可能好d, 事實呢? 阿Q d黎講, 上場有佢輸4比1, 呢場無佢只輸1比0, 係唔係已經有進步? 我最喜愛o既球員雲佬今場做隊長, 佢亦都無令我失望, o係成班咁唔生性o既隊友之中佢表現最落力, 四圍撲波, 番中場幫手, 見佢獨力難支而隊友無動於衷個樣真係令我好心酸, 心裡面不斷叫佢"唔好踢啦", 咁辛苦為乜, 人地逗咁多人工都可以行行企企, 一d都唔以球隊為榮, 佢一人點努力都唔可以扭轉局勢架啦! 我而家改變主意了, d人話賣左佢係o岩架, 唔好留係呢隊咁無前途o既球隊, 浪費時間, 運動員生涯好短架, 佢值得更大o既成就, 唔好再係度同班咁令人失望o既隊友合作喇, 佢走左我都會繼續支持佢的!

而家呢隊曼聯真係唔知算乜, 有的唔肯交波俾隊友, 肯交果d又交失俾人打反擊, 前鋒去打防中, 形同虛設, 中門大開, 中場創造力欠奉, 前線缺乏供應, 完美地打出"攻不銳守不穩" o既足球, 費sir！ 求求你救下曼聯啦, 連我地都睇到球隊出現咩問題我唔信你會睇唔到, 仲有如果真係打算退係無問題, 不過千其唔好交俾基羅斯, 我唔想係我有生之年睇多次曼聯降班呀! God Bless Red Devil!

太子爺駕到

今日開始, 我終於有新同事, o係一年多o既"one man band" 生涯終於有人幫手, 此人就係老細o既愛子。 究竟有人幫定無人幫好就要用時間去證明, 不過要我教佢o野真係考起我, 我真係驚我唔識教一個完全未做過o野o既人, 我而家先知道當年教我o野個阿head有幾偉大 (雖然佢有d變態)。

究竟我要點教起好呢? 我教得黎自己都做左, 定係等我得閒d先教? 都係叫佢做住d跑腿工作先好喇! 經我初步觀察, 呢個仔的確係個"生骨大頭菜"-種壞了, 搵屋搵左個多月都搵唔到滿意的, 可憐另一個同事陪佢行勻全旺角o既樓, 樣樣都諸多要求, 連果個同事都忍唔住話"而家叫你黎做o野, 唔係黎渡假架!"。 果位同事都怕我太就佢因為佢係太子爺, 而千叮萬囑我乜o野都要俾佢做, 所以, 太子爺接招囉!

草蜢林狗Crossover

又係草蜢, 一個星期見佢兩晚仲多過見阿爸阿媽.....不過今場有埋林狗, 開頭都好好奇點樣crossover, 原來係草蜢一part, 林狗一part, 如此類推, last一part就一齊出。

草蜢果d部份同佢演唱會大同小異, 不過係cut左d, 保留番最激果part。 至於林狗, 講o既大概同佢"是但up發花d"果d差唔多, 不過加左幾首自己歌, 有"三字頭", "流行曲"同"拉閘放狗", 全場high爆。 仲有林狗同草蜢一齊跳忘情森巴舞都全場哄動, 其後我發覺林生唱歌竟然好聽過蔡一智同蘇志威呢!

草蜢演唱會

首先澄清我唔係草蜢fans, 不過有fd叫到就即管去睇下啦, 抱住唔太大希望入場, 竟然比我想像中好睇。我地位置唔太好, 應該係200蚊飛最後果行, 個台設計都麻麻, 三尖八角的好多樓梯, 果三隻o野又鍾意跑黎跑去, 真係驚佢地PK。

講番演唱會, 雖然唔係fans, 不過今晚唱d歌都識左九成, 快慢都有, 快歌令全場起身, 又跳又叫好似落左D咁, 當然我都唔例外, 氣氛勁好, 佢地三個雖然年紀唔細依然寶刀未老, 唱得跳得, 最正就有"三分鐘放縱", "好戲在後頭"等等....慢歌都正, 有"失樂園", "我們都是這樣失戀的"。 最激一幕就係唱"怎麼天生不是女人"果陣, 蔡一傑同蘇志威係我地果面打左個長達幾秒o既"車輪", 鏡頭zoom埋去睇真係黎真, 唔係借位, 睇到我地目瞪口呆! 呢面都未叫完, 那邊廂蔡一智又攬住兩個半裸o既dancer, 只用兩手掩胸, 而下面淨係得條底褲, 真係目不暇給, 睇都睇唔切, 我估現場都好似我地咁俾呢兩幕嚇親, 簡直挑戰紅館尺度極限呀! 仲有一樣好奇怪, 就係一幕咁激表演之後, 接住果首歌竟然係好唔搭調o既"世界會變得很美", 真係"R"頭!

其實我不嬲都最唔鍾意蔡一傑的, 因為覺得佢太鍾意出風頭, 不過睇完演唱會之後, 覺得草蜢以佢為首都不無道理, 因為從歌藝同舞蹈上, 佢的確比其他兩位出色, 聽其餘兩位獨唱都硬係覺得怪怪的。 不過今晚先係第二場蔡一傑把聱已經沙哂, 好多高音位都唱唔到, 死啦仲要睇一場佢同林狗o既crossover添, 佢把聲爛成咁點唱呀?

交友不慎

星期五晚約左幾個朋友去油麻地一間酒樓打邊爐，一共兩男三美女（包括我），但係o係成晚食飯期間我竟然成為主角, 俾人圍攻做左佢地o既笑柄, 真可憐.....佢地果晚玩得真開心, 我毫無還擊之力, 以後真係要帶眼識人。

講番食野方面, 果間係位於油麻地o既花園酒家, o野食都過得去, 價錢都算抵, 埋單每人都係八十幾蚊, 可以一吃。 不過食到後段佢地已經停哂手, 得我一個好似生左積咁仲未飽, 於是我再order多幾碟自己一個食, 好似食緊大家樂果d一人火鍋咁, 希望果晚我個大食樣唔好嚇親我d fd啦。 之後番去旺角去左d樓上cafe繼續飲o野, 佢地當然繼續用我黎做話題娛樂佢地啦, 所以我係度奉勸果晚有出席o既朋友, 你地小心d, 我會報仇的, 等你地玩得咁開心喇? 睇住黎呀!

倒數

我感覺到我o係呢間公司o既日子接近倒數階段。o係我長期over work load o既番工日子, 爭取請人幫手終於有結果, 結果就係老細竟然派佢個仔黎! 真係晴天霹靂, 咪玩啦! 幫手? 幫到咩手? 太子爺對公司一竅不通, 係我咁多o野做情況下仲要教佢o野, 教得黎自己都做左啦, 又有個人監視我, 真係搵笨!

以前一個人o既日子悶就悶d, 有時又真係忙到痾屎都唔得閒, 畢竟一個人時間分配free好多, 尋日OT第二日又可以返番晏D, 做哂o野又可以早走, 仲有, 有fd經過旺角又可以上黎搵下我, 去我公司坐一陣又得, 搵我食飯食耐d又得, 以後就無呢d日子喇, 唉.....

雖則老細都好識做加左人工俾我, 不過我真係好想過埋年後拎埋雙糧同bonus離開呢間公司, 話哂係度都4年有多, 好想轉下環境, 過哂d野俾太子爺咁我就走得甩, 希望自己今次唔好心軟, 我要出去睇下, 唔想再困o係呢度呀!

生日月

十月係一個生日月，有三個好朋友都係呢個月生日，尋日打頭陣同一個女仔朋友慶祝先，雖然遲左一日，我諗佢都唔會mind, 因為正日佢都要同男朋友過呢! 尋日突然間好想食泉章居, 因為佢d野食真係幾有水準, 不過試過一次去旺角果間竟然等位等一個鐘有多。 於是尋日放工即刻去睇下多唔多人先, 竟然好少人, 等左兩個字已經有位, 果陣7點都未夠.....但我地等到八點先等齊人開得飯囉! 食左一個四人餐, 有果度出名o既霸王雞同埋三個小菜, 價錢都好經濟, 隻雞真係好好未, 呵呵!

食完飯去左登打士廣場17樓一間cafe, 果度環境唔錯, 幾夠大又剛好有梳化位, 好o岩飲下o野吹下水, 我叫左杯朱古力加士多啤梨奶昔真係超好味! 不過最衰係播埋d我地唔識o既英文歌, 我唔識英文架嘛! 不過總括黎講果間野都算唔錯, 最後我送o左份我自己認為好有意思o既生日禮物俾壽星女, 希望佢鍾意而又用得著啦!

一個人的旅行

近日忽發奇想, 試下一個人去旅行o既滋味,目的地就係近近地而且去過兩次o既台北,於是開始詢問各方好友o既意見。結果真係令人失望,竟然係大比數反對,各人理由分別係"你唔識保護自己"亦有話"我覺得你係遇到問題唔識解決o既人" 仲有更過份只重複講左兩句"你唔得!"

COME ON!? 我到今日先知原來我ｄ朋友對我咁無信心，真係大打擊，好歹我都一手plan過一個英法之旅,由訂機票,車飛,酒店至行程都係我一手包辦,仲非常順利添,點睇我都有d導遊o既potential啦,區區一個台北會難到我?同埋我唔怕一個人住酒店,只要唔去夜街應該唔會有咩危險,我仲有朋友係台灣人又有手機,有咩事求救都有門。最大怕題反而係無人同我影相呢? 平日我去旅行影o既相,無論咩角度都要硬塞自己個頭入鏡,如果一個人就唔得喇,不過我真係好想試下一個人好free咁旅行,睇下咩feel,唔洗就人鍾意去邊就去邊,yeah!

P.S.在此多謝唔計我自己果票而投左我神聖一票o既朋友,你o既一票對我有莫大鼓勵!

整頭

係兩日10.1國慶假期終於抽左半日攪攪個頭,其實我不嬲都有d抗拒去髮型屋,因為怕左d髮型師o既推銷,而我緊會抗拒唔到,因為佢講的永遠好有道理,而我又堅持唔加焗油,color,靚d o既藥水等等.....好似太講唔過去。試過有一次仲離譜,去一間都算大型連鎖式髮型屋,招牌大大個寫住二人一齊又可以平成點點點,於是我同朋友一齊入去,一入去佢地好有計劃地分我地兩層,分別精神轟炸勸你做呢樣果樣,到我同朋友各自做完竟然比門口所寫貴左一倍有多,每人都接近一千先落到樓,其實我同我朋友就係怕抵擋唔住佢地d sell野手法先打算一齊入去,點知佢仲聰明過我地。今日整個頭都唔例外,依然係比門口所寫的價錢貴一倍先落得樓,究竟點樣先可以抗拒人地o既推銷呢?如果企硬只做我開頭決定要做o既野又怕佢地做得唔好,真麻煩!

後悔

後悔, 非常後悔......話說幾個月前有個朋友介紹我買一隻股票, 佢對呢方面都素有研究, 而且經常有斬獲。係我買入之後, 佢千叮萬囑我要於某一價錢先好放, 但礙於我本錢不多, 要夾埋爸爸一份先買到。 係呢隻股公佈業積後, 升左少少, 我地都睇左幾日見升幅唔再多, 爸爸怕佢回落所以提議放左佢啦。但我都多次remind佢, 我朋友好肯定佢仲會升架喎, 基於群眾壓力我終於都放左。 點知不出一個星期真係升到我朋友之前所講o既價位, 今日佢興高采烈打黎問我"係咪賺左好多呢?" 我真係無面見佢, 我應該堅持唔好放, 而家一算因為放早左一個星期, 我賺少左兩倍呢, 真係後悔得要死。 呢個故事教訓我, 我係要信我個朋友, 股神ANDY希望你俾多次機會我吧! 我以後會聽哂你話架喇!

Ruud Is The Best!

Yeah! 今日勁開心, 心情勁好! 因為我隊愛隊終於贏波喇, 雖然每每睇完夜波第二日都好眼訓, 不過都係值得。 等左四場終於有場勝仗, 雖然表現唔可以話好好, 畢竟都贏波, 從電視所見費sir同基羅斯都舒左一口氣, 可見佢地壓力好大。講番場波, 一開季到尋晚先有第一場正選o既傑斯一出即有料到, 雖然入球帶幸運, 但佢成場都助攻助守全場奔走, 似要証明俾費sir睇佢仍有能力佔一席位。第二功臣就係我最愛o既雲佬喇, o係我以為又失分之回之際, 又係佢做救世者, 雖則入球難度唔高, 但捕位同觸角都係無可否認的勁! o係球隊咁缺乏供應o既中場線佢都保持咁好入球率, 我地仲可以要求d咩呢? 希望佢o既入球可以令話要賣佢走o既球迷收口啦! 其實呢場波都睇到大家好努力, 好有鬥心, 個別位置只係替工, 力不從心都唔可以怪, 特別係失波之後果段圍攻真係好正, 個波有成10分鐘唔過對方半場, 好鬼感動, 我地出名有鬥心o既曼聯番黎喇, 我相信堅持住呢份鬥志, 就算不敵車仔又如何, 起碼作為fans已經好滿意了, 加油呀紅魔鬼!

星座

今日同兩個朋友講開星座, 其實我幾信架, 因為星座唔多唔少反映到一個人o既基本性格, 有d仲幾中添.....不過有個朋友就唱反調, 佢話無理由將全世界o既人分為12種喎! 當然12種只係太陽星座,代表大路性格, 仲有月亮星座代表潛在意識同上昇星座代表真實本性, 我相信三樣一齊分析去睇一個人, 都應該有七八成準掛! 以我而家好表面o既星座知識, 我都有部份山羊座特性"船頭驚鬼船尾驚賊", 水瓶座就愛哭, 歌仔都有得唱啦"尤其明知水瓶座最愛是流淚....", 白羊就自我有自己o既世界再加衝動, 金牛就務實, 安份守己, 雙子就愛外向花心善變, 處女就專一而挑剔, 天秤就猶豫不決但就得人唔會同人argue所以朋友好多, 獅子就死要面, 天蠍係記仇架.....基本上我大部份朋友都有呢 d特性。星座真係幾有趣架, 所以我打算搵d course讀深入d研究, 不過唔知幾時先成事。

三號風球

掛左好鬼耐o既三號風球, 本來今日打算BBQ, 同一個識左10幾年o既朋友慶祝生日, 點知等左好耐都唔見天氣好轉, 於是都係好例牌咁唱K算吧! 由於我個FD住元朗, 佢又有一個BB要湊唔方便去太遠, 於是我地好有誠意咁, 橫風橫雨入去元朗同佢慶祝。係我好狼狽咁入緊去時, 我心諗, 我地都唔話得喇, 山長水遠入去同佢慶祝, 第二時我都要搬得入過佢, 沙頭角都幾好, 黎考驗下我朋友D誠意。去到元朗NEWAY都無令我地失望, 因為真係超多野食, 仲有香蕉船添, 仲有樣最好就係, 竟然唔限時間呢, 我地7點幾去到, 個RECEPTION姐姐竟然話我地可以唱到聽日o既五點九, 係幾好呀, 不過我估只有住元朗d人先可能咁做掛, 過左12點就要搭的士, 所以我地都趕o係12點前急急腳走了。哈! 補番一句, wing wing生日快樂! BB快高長大, 唔好似你呀!

摯愛

好唔容易先"lur"到一個fd陪我睇呢套戲, 由郭品超同薛凱琪主演, 表面黎睇呢套戲應該唔會好收得去邊, 亦無咩口碑, 吸引我原因有兩個就係導演馬偉豪同男主角。男主角郭品超我好老實地承認完全係因為佢靚仔而去睇, 自從鬥魚一二集佢已經吸引左我, 我唔可以好假咁話佢有演技, 不過真係五官精繳而且高大威猛, 正! 至於導演 joe ma, 佢一向拍開小品愛情喜劇, 今次風格大轉即管睇下佢攪乜鬼, 聽講因為受佢媽咪過身影響先想拍一套苦情戲。故事係講薛凱琪飾演o既苦命女, 要照顧一個半身不隧o既哥哥同一個小姨甥女, 仲要做散工負擔屋企, 偶然下識左做小偷的郭品超, 進而成為情侶, 郭品超眼見薜凱琪擔頭家擔得咁辛苦, 小姨甥又想讀音樂而需要一大筆錢, 於是挺而走險偷左某個老大的三百萬而捲入黑道慘死, 最後尾一幕真相大白, 薜凱琪傷心欲絕完場。其實導演已經刻意拍得淡淡然, 一d都唔煽情, 所以連一向睇戲好易喊o既我都無喊到.....可能有我喜歡的男主角關係, 所以我覺得呢套戲唔太差。值得一提有影評話飾演半身不隧哥哥o既張國強有機會問鼎配角獎項, 故事中佢後來怕連累妹好而自行了結生命。