BACK!

期待已久O既東歐之旅終於完結, 估唔到咁驚險, 太多事發生, 旅程未如想像般開心, 一言難盡, 慢慢再組織下先....

忙

近排非常的忙, 忙約會, 忙教公司新人o野, 忙交低工作o既手尾, 忙全家大旅行事宜, 全家自由行真是一件不容易的事, 因為同父母去跟是朋友唔同, 很多o野都要安排得好好, 唔想到時先搵地方搵交通, 或者跟團係比較好呢! 還有兩天就出發, 希望此行一切平安順利吧! 短短14日旅程就錯過了曼聯今季最重要o既賽事, 此場三場關乎曼聯o係4歐冠同英超o既前途, 缺少我o既支持下佢地一定要全數勝出呀!

WELCOME HOME, BECKS!

知道曼聯要對AC開始已經一直等待呢刻出現, 由開波當晚已經輾轉反側, 唔係怕曼聯會輸, 係怕自己知到BECKS回歸而唔屬於曼聯o既事實一再出現。 來不及親眼o係奧脫福見証碧咸為曼聯披甲係我一世o既遺憾, 8年後重現呢幕已經人面全非, 佢o既對手變左曼聯了。

一如所料曼聯球迷俾佢英雄式o既歡迎, 後備入場一刻全場掌聲雷動, 我還以為自己眼花, 看見碧咸眼泛淚光, 以我多年睇佢經驗佢唔係一個易喊o既人, 曼聯o既球迷實在太好了, 事隔多年都唔會忘記佢o既貢獻。 接住一個勁射, 幾個傳中都令我心跳加速, 雖然對手係曼聯, 我依然想佢入波, 向全世界証明佢仲有能力立足的。 短短20幾分鐘好快過去, 賽果我並不關心, 只恨有線咁快去廣告, 我好想多看佢幾眼, 睇佢同球迷o既互動, 接受球迷o既歡呼, 給球迷送上拍掌, 與昔日隊友寒暄, 拿起曼聯頸巾的一刻, 每一幕我都要深深記住....

新年好開始!

估唔到新年過無久就有好消息, 公司最討厭o既人終於走喇! 佢竟然有人請, 我地非常感激請佢果間公司, 幫我地除大害, 實在係三贏局面。 係人都知正常辭職需要一個月通知, 而佢通知完老細即刻答應, 並且三日後走人, 兼唔洗佢賠錢, 三日可以交完所有工作, 可想而知佢o既重要性有幾大? 只要送走瘟神, 再多O既工作我都願意接下, 心情好得想放煙花呢! 虎年好事陸續有來!

新年快樂!

做左呢間公司咁多年, 第一次得閒返去食年夜飯, 全廠共一百二十圍, 好不熱鬧。 加上抽獎, 令車間工人十分興奮, 故我叫少爺就算抽到我都唔好公佈, 機會還是留俾工人吧! 原本打算只留兩日一夜, 到第二日幾位司機都大醉, 無人揸車送我返香港, 故被迫多留一晚。 連續兩晚同工廠同事去卡拉ok劈酒玩樂, 俾人狂隊之下仍能力保不失, 果然寶刀未老, 哈! 工廠同事十分玩得, 笑聲不斷, 加上老細o既大利是, 此行收獲甚豐!

BAD NEWS

公司有著最討厭o既人, 一直都好想佢走, 見佢成日o係公司搵工, 衷心希望佢有更好發展, 阻人發達猶如殺人父母嘛。 不過試問除左我地邊間公司會請個遲到早退, 曠工, 盲字都唔識多個o既人? 搵工希望落空, 點知更失望o既跟住黎, 有高層竟然同我講, 縱使佢紀律如何差, 公司都唔會主動炒佢, 只有等佢搵到自己離職, 天啊! 咁豈不比我中六合彩更難? 聽到呢個消息令我消沉o左好一段時間, 返工提唔起勁, 學左佢遲到早退唔返o既習慣, 既然公司都話呢d可以接受, 我唔享受下咪好蝕?

生日快樂

每年新曆年過後就開始心理輔導自己, 輔導自己接受又老一年O既日子即將到來, 今年生日慶祝比往年長, 因為好多朋友都未能同日有空出黎, 前後分開用足一星期時間。 很多謝好友O既祝福, 禮物, 慶祝o既心思, 最開心係正日去海洋公園, 唔使錢特別開心, 第一年享受到呢個福利, 更多謝T小姐同Y小姐陪同。 仲有多謝有各好友O既禮物, 都很喜歡實用, Y小姐o既唇彩, 姊姊們O既BOOT, B先生o既背囊, C小姐O既香水, 我通通都會用架! I LOVE YOU ALL!

Merry Christmas!

今年平安夜過得平淡但快樂, 與好姊妹行街睇戲, 福爾摩斯o係無期望之下好看得超乎想像, 兩位男主角十分吸引, 特別係JUDE LAW, 雖然愈來愈M字額, 但魅力不減, 看得我很開心。 之後去九龍城朋友新開張o既禾牛薈火鍋打邊爐, 兩位好朋友都係股東當然要捧場, 食物非常新鮮, 裝修不俗, 三五知已暢所欲言, 一起倒數後就解散回家, 今年係少數避開尖咀旺角人潮o既聖誕節, 感覺良好呢!

無聊事一則

公司有一大小姐, 每逢佢用完水機o既水都會通知我同另一個同事換水, 須知道力大如我換水都有d難度, 公司人人都有份, 點解要我地服侍佢呢? 我o係公司有自己電水煲, 好少用到水機o既水, 咁o岩呢兩日水機o既水用完, 我地決定只飲我水煲果d, 點知佢寧願唔飲都唔願意去換, 水機剩餘的半杯佢可以飲幾日兼唔洗杯, 勁! 姑且看邊個忍耐力強? 哈!

熱烈祝賀有線重奪英超

近排公私都有不愉快事發生, 唯一令我開心返就係呢件, 聽到有線新聞公佈的一刻真係想流淚, 等了三年終於可以擺脫NOW, 唔係佢霸左英超我都唔洗一個月俾多300蚊, 一星期只睇一次, 其他節目等如無, 除左足球一D可看性都無。 想當時人人CUT 有線轉去NOW, 而我因為剛續約未能甩身, 要俾多三年錢已經激氣, 仲要俾人笑得好慘, 呢D都係拜NOW所賜。 我一直認為姓李的見人有線玩得咁開心又差隻腳埋黎, 將英超投標價推高, 不出我所料, 呢D有錢人玩過厭就會一個屈尾十走人, 所以俾返有線搞先係有心做節目, 唔係當玩具, 我才不管NOW如何有ON DEMAND呢。 很期待今季球賽完結可以同NOW分手! I LOVE YOU CABLE!

完成北海道之旅

好不容易完成旅程, 過程充滿難題, 先是從全是日文o既網站book酒店, day tour, 去到仲遇上打風, 臨時更改行程, 但無損我對呢個地方o既喜愛。 北海道指數比東京大阪便宜, 除左搭車, 車費真係貴到令人咋舌, 我呢d無車之人確實唔化算。 就算城市如札幌都無人來人往o既情形, 食咩都唔洗排隊, 單憑呢點已經令我愛上呢個地方。

頭幾天未打風尚算風和日麗, 很好彩看到富良野水尾o既花田, 想像到如果當造時一大片係如何震撼。 滿山紅葉o既定山溪溫泉亦不容錯過, 每間溫泉酒店都甚具規模, 招呼周到。 到其後o既果園都令我地興奮得很, 亦見識到日本的士如何地貴, 短短5分鐘足夠由荃灣坐過海, 仲要來回兩程真係肉痛得很。 上午果園仲係天朗氣清, 下午到小樽頓時橫風橫雨, 很遺憾因為惡劣天氣, 令我地唔能夠好好遊覽呢個小鎮, 先前對呢個地方期望很大, 因為偶像中山美穗o既情書, 我對自己說一定要現場感受一下小樽o既魅力。

因為最後三日天氣一直未有好轉, 令我地o既行程只限逗留於札幌, 很希望等我有車牌後可以補償返今次去唔到o既地方, 甚至去埋遠d o既夕張, 涵館!

黑仔

多年旅遊經驗, 從來未試過出發前生病o既我竟然破例。 睇戲時已經覺得戲院冷氣太勁, o係食晚飯時終於爆發, 邊食邊嘔, 成晚o既自助餐食唔夠幾口就收檔, 很浪費呢! 第二日一早即刻去睇醫生, 呢排果然勁多人病, 要等成個半鐘先到我, 睇完食埋早餐已經中午。 由於公司太多手尾要執, 用爬的也要爬回去。 最黑的還未發生, o係我換衫時竟然無啦啦扭親條頸, 而家半身不遂, 行動很不便, 連行李都未執。 呢個北海道之旅還未開始已經多災多難, 天佑我個病同頸都快d好返啦!

打o比大戰

緊張刺激的打o比大戰, 心情有如坐過山車, 曼聯犯下兩個低級錯誤令自己陷於苦戰, 最終憑季初被人嘲笑曼聯簽佢返黎無用o既奧雲殿定勝局。 姑勿論球証係咪補時過長令曼聯得到最後勝利, 曼聯戰至最後一分鐘都唔放棄係事實, 曼城連少少時間都集中唔埋精神亦都係事實, 曼聯都經常補時失球, 足球就是這樣。 加上BBC都有實質數據証明球証補時係正確, 故曼聯拎得呢三分問心無愧。

天真o既泰維斯仲以為曼聯o既球迷唔會噓你嗎? o係你走了之後沒完沒了的講費sir是非我們還會歡迎你嗎? 你難度不知道o係曼聯費sir係最大嗎? 你同費sir口同鼻拗我地會信你還是費sir? 你話為曼聯球迷著想選擇去曼聯唔去利記, 以免傷我地心? 曼聯什麼時候同曼城唔係死對頭, 去曼城會有去比利記好? bull shit!

有趣的老細

老細 : Becky! 我地今年公司旅行去黃山, 你都去啦!
Becky : 老細, 我已經請左假10月頭去日本喎!
老細 : 咁咪o岩囉, 我地九月尾去之嘛!
Becky : ......

哈! 我老細真有趣, 如果我去埋黃山豈不半個月唔洗返工? 老細你未免太好人吧! 我會驚的!

準備就緒

一向都喜歡等過埋暑假先起行, 唔知今年發生咩事, 一個北海道之旅, 日期一改再改幾番遷就, 等左一星期先confirm哂機票酒店。 仲要而家一個月前book都係得返幾個機位, 我地個日期已經延後到過哂10月1 同 3/4號o既假期, 但都係爆到無人有, 另一朋友想去沙巴都係咁, 逼於改往澳門出發, 淡季都咁真係少有。

仍未同公司請假o既我已經開始度行程, 原本六日亦因為無機返多加一日, 多出來o既一日唯有參加local tour, o係搵tour果陣亦都困難重重, 唔識日本o既我地俾d日文網站搞到一頭霧水, 要麻煩識日文o既T小姐幫忙。 而家package搞掂, 溫泉酒店搞掂, 多出來3晚o既酒店都搞掂, 只欠local tour同升到發顛o既yen擱置中, 到出發時兌到0.8已經拜得神落!

中國女排B隊

等候多年O既蔡斌接陳忠和棒, 竟然帶黎一隊中國女排B隊, 呢隊並唔係咩新中國女排, 令人失望。 佢只沿用陳忠和遺留下來O既副選球員, 再加幾位新力軍作為後備便完成組軍。 最大敗筆係用魏秋月作為正選二傳兼隊長, 呢個球手只會將個波推到九樓高俾二同四號位作大槌攻擊, 中國長年以戰術變化多端見稱o係佢帶領之下蕩然無存, 二傳手作為全隊命脈, 以佢o既派牌功力實係不敢恭維。

睇中國女排多年, 如何不濟o既胡進, 朗平年代極其量只會輸俾巴西, 古巴, 意大利等勁旅, 豈料蔡斌一上場連輸兩場比自己實力低幾皮o既日本, 中國隊一向係日本o既勀星, 因為日本隊身材矮體力差, 之前中國打得點差都輸唔到俾佢地。 所以磨合期並唔係籍口, 實力差幾皮o既球隊該贏的還是要贏, 輸俾勁旅就無話可說。 今年女排大獎賽決賽看得令人心痛, 竟然未嘗一勝, 觀乎蔡斌場外緊張o既樣相信佢已經聞到尤魚香, 我都十分期待佢下台之日, 因為女排之沒落佢實在責無旁貸, 中國國內咁多省隊佢竟然求其用返上一手o既副選, 並無細心每隊執d精英出黎, 比賽時換人決定又令人摸不著頭腦, 如果佢唔落台都請佢好好請教陳忠和吧, 要不連奧運o既入場劵都拎唔到呢!

會考放榜

今年特別留意會考放榜, 因為有一個表妹係應屆會考生, 我一度以為佢會破我保持10幾年o既紀錄, 點知出黎成績都係麻麻, 雖然o係我覺得唔算太差, 但並唔足夠升上中六。 一直都o係低學歷家庭長大, 一慣傳統都係讀屎片, 所以對讀書無咩概念, 亦無太大壓力, 當然更無非升中六不可o既說話。

雖然表妹收到成績有d唔開心, 但只係比佢預期少兩三分而已, 所以repeat亦唔可能一個double上進而升中六, 很慶幸佢好快知道自己應該點做, 轉而報IVE。 由細到大已經知道各人頭上一片天, 從各家人處於低學歷咁工作, 雖然並不富有但至少三餐不成問題便足夠, 所以無一定要升中六或讀大學o既奢望。 反而很擔心下年將會考會o既另一個表弟, 佢係轉334學制最後一屆o既受害者, 只有一次會考機會, 考得唔好就要由中四再讀起, 無我地想當年咁無限次重考。 聽過佢好多次講一定要升到中六, 感覺很可怕, 屋企傳統都係讀屎片突然冒出一個咁緊張讀書o既人很奇怪呢! 已經同佢解釋多次, 唔係只有升中六一條出路, 想當年我"猛"車邊夾硬上咪又讀左一個月跟唔上而退學, 但我從來無後悔自己放棄機會, 因為俾我再讀落去頂盡撐到中七一定入唔到U, 白白浪費兩年時間, 耐何佢太固執一味認定只有升中六才是出路, 唉.....

下一站....北海道

原本打算10月同屋企兩老去台南一趟, 點知家姐拎唔到10月頭o既紅色假, 而佢又搵到好抵o既北海道package, 但係阿爸拎唔到多d o既, 只好放棄台南去北海道。 少有地咁早已經搵資料, 堪稱旅遊大使o既我同家姐都發覺北海道一d都唔易plan, 特別係溫泉酒店的一part, 佢好多日本酒店網都係for local人, 要本地member先book得, 網頁又係全日文, 睇到人都顛, 如果我地香港人要through返香港agent或者priceline呢d book, 但價錢貴好多, 研究左好耐都未有方法。 呢個package仲可以免費停東京, 為免自己忍唔住買野, 所以都係唔停了, 還掂東京之前都去過兩次呢! 唔該d yen快d跌返啦!

奧雲

奧雲突然加盟曼聯, 令我地成為其他球會fans o既笑柄。 老實說個人覺得並不可笑, 仲幾讚成呢次交易, 話哂睇英格蘭大, 睇奧雲一路咁沉確實心酸, 撇開佢曾經佢係利記人, 我都想見佢職業生涯再上高峰, 曼聯會提供最好o既條件俾佢東山再起, 我相信佢會搏盡去証明自己, 呢個在我黎講係雙贏。 其次奧雲又唔使轉會費, 人工超低, 錢佢o係皇馬紐卡素已經搵夠, 踢曼聯總好過去史篤城侯城等下游吧! 加上佢同朗尼國家隊合作多時, 唔需要長時間建立默契, 我對奧雲甚有期望, 希望佢爭返口氣, 令而家笑佢笑費sir o既人shut up!

拜拜C朗

聽到曼聯接受皇馬開價, 真有鬆一口氣o既感覺, 因為呢幾年聽佢話想去皇馬不下數十次, 聽都聽到厭煩, 而家終於成真, 對佢同曼聯都有好處。 對C朗o既分數一開始起跑點已經很低, 所以佢走都唔會有咩唔捨得。 事緣05年第一次去奧脫福睇波, 睇見當時o既佢經常扭失波而只顧坐o係原地dum蹄dum抓, 需要年邁o既堅尼幫佢追返個波, 見到堅尼力不從心又要同佢執手尾o既樣我很心酸, 由果一刻開始我決定唔會太喜歡C朗呢個人。

很多人覺得曼聯無左C朗會大不如前, 或者會有影響, 不過我已經有心理準備, 可能成績會唔理想, 但總好過強留一個無歸屬感同會發隊友脾氣o既球員。 之前無左簡東拿, 碧咸, 堅尼, 雲佬, 曼聯都可以一一渡過, C朗o既重要性絕唔係呢幾位之上呢! 很期待沒有C朗o既曼聯, 亦都期待C朗去到佢夢想o既皇馬有咩發展, 看看邊個無左邊個唔得吧!