不聽老人言

不聽老人言果然吃虧在眼前, 前日落街跑步前, 爸媽都追住我叫我加多件衫, 我諗住帶件衫去球場唔知放o係邊, 著住跑又熱, 跑暖個人就唔凍啦, 雖然落去果陣確實陰風陣陣....點知第日真係中招。 頂左一日上埋英文課, 終於都係頂唔住要sick leave。 由於本身有鼻敏感, 一有傷風特別辛苦, 乞嚏打唔停, 打到流哂眼淚, 兼且鼻水倒流無覺好訓。 睇醫生食藥事少, 家下俾兩老不停哦爆, 真係精神轟炸, 為左雙耳著想以後都要著返件衫好了。

期望

你對人好並唔等如人地要對你好, 當你收唔到你期望o既o野真係令人好失望。 或者我要學會唔好付出咁多, 咁就唔會有期望亦唔會失望, 人地無必要對返我好的, 係自己唔識拒絕朋友吧! 常常勉強陪人做自己唔想做o既事, 唔想去o既地方, 掉轉自己俾人拒絕會覺得難過, 吃虧到頭來係自己。 人大了要學識保護自己, 唔好一廂情願以為自己點對人人地都會咁對返你呢!

Halloween in Disney

本來想去海洋公園o既哈佬喂, 不過由於400蚊太貴只好退而求其次去迪士尼果個啦, 同埋我都未去過香港o既迪士尼, 於是呢個星期六同朋友去。 一早已知呢個迪士尼唔太大, 所以都唔預太多時間, 食埋lunch兩點幾先去到, game與game之間距離很短, 六點已經玩哂大部份遊戲, 最好玩都係space mountain, winnie the pooh都好靚.....商店好多紀念品都好精美呀!

最失望係排唔到鬼屋, 條龍長得誇張, 要150分鐘, 所以都係放棄, 好可惜呢, 原本halloween去都係想睇鬼屋, 奈何我地無呢個耐性排。 完左個halloween主題巡遊之後, 行左兩次商店先等到9點放煙花, 因為我地企得太後只睇到煙花, 睇唔到幻燈表演。 最好笑係我地決定表演未完先離開現場, 因為我地要趕返去睇曼聯, 如果等完場幾萬人一齊散, 等幾十班車都出唔到去呢! 我離開迪士尼係用跑的, 怕表演完後人潮湧出黎, 好似走難咁。 唔該哂同我地買九折飛o既ka ya呀!

Marco

好開心傅家俊終於贏左佢首個職業計分賽, 不枉我連捱三晚夜捧場。 十六強至決賽令我最意外係十六強贏希堅斯, 因為對手係世界排名第一, 而且打法係穩打穩扎型。 打得最差一如佢所講係八強o既格連果場, 幾個機會都把握唔到, 差d臨尾出埋局, 唔係對方緊張, 尾三個啡波發瘟佢都無機會入final, 呢場睇得我最心驚膽跳。 至於final贏火箭奧蘇利雲我一d都唔意外, 因為marco打咁耐職業賽對佢o既賽績完全無比下去, 加上火箭o既天才打法, 經常帶神經質, 一個不順會好多失誤, marco就係將佢幾個失誤完全把握哂於是贏得冠軍。

呢幾場比賽睇出marco進步很多, 出Q定左, 起break成功率很高, 新教練應記一功, 但仲有明顯缺點係遠枱同set snooker仲差少少。 另外, 我好驚訝佢心理質素之好, 對兩個排名高佢咁多o既球手, 受壓同接近捧盃時都可以保持冷靜, 唔似丁俊輝EQ咁低。 呢個比賽係我少有足球以外會捱夜睇, 但係好值得, 最後一Q時真係興奮得叫出黎, 有D眼濕濕, 因為我marco有d偏好, 佢唔特別好波, 但佢香港人, 二來佢生日同我爭兩日都係山羊座, 有呢個成就確係了不起! 很開心佢吐了九年無贏過計分賽o既烏氣, 繼續努力呀努力不懈的山羊座 (但我係少數唔係, 哈!)

P.S. 很喜歡佢完場後接受訪問的流利英語同謙虛o既態度

仲差一點

經常以為自己已經無o野, 可以處之泰然, 但一聽到唔想聽o既消息, 睇左唔想睇o既o野, 原來仲有d un住un住, 很氣自己, 氣得想喊。 幾時先可以完全無感覺? 定係一世都會咁? 加油! 仲差一點!

媽媽

一向都唔否認我很愛我o既爸爸媽媽, 可能細個時兩個姐姐跟公公婆婆住, 只有我一直跟住爸媽, 所以感情特別好, 即使而家兩個家姐唔太理屋企我都願意照顧佢地。 媽媽雖然照顧我無微不至, 但都不免係一名"嫦娥", 正如我常說老人院都唔收佢。

基於屋企負擔問題令我遲遲唔敢轉工, 阿爸搵唔多, 兩個家姐無俾家用, 真係唔敢輕舉妄動, 一個唔覺意真係要申請綜援了。 上星期同媽媽飲茶傾左好多, 傾將來, 老實說對自己將來一d把握都無, 轉唔轉到份好工, 會唔會一世獨身通通都係問號。 點知到我問媽媽支唔支持我轉工時, 佢竟然支持, 真好係好意外, 我以為佢同爸一樣會反對的, 基於錢同埋因為我呢份工真係好free, 我爸一都直係反對我轉的, 但我想唔想咁樣困一世。 我問媽點解會支持佢話呢個係我心願, 講左咁多年想做就去做啦, 聽到果刻真係感動到想喊, 媽媽原來唔係我想像中咁"盟塞", 我真係好愛你呢!

色戒

幾個女仔相約去睇呢部戲, 一向都唔係懂得從藝術角度去睇電影, 睇呢套戲原因都係想睇梁朝偉有幾激, 一睇果然令我目瞪口呆, 大膽程度直逼4級, 該睇唔該睇o既都睇到, 很驚訝! 到埋牙鏡頭時, 戲院全場都平息靜氣, 無人發出聲音, 人人都睇得好專心, 包括我。 除左床上戲, 整到套都十分可觀, 拍得好細緻, 好有舊上海風味, 女主角作為新人真係超額完成, 梁朝偉加無話可說, 內心戲一絕, 陳沖做一個無乜發揮o既配角有d浪費, 其配角人選都有意外驚喜, 如庹宗康.....

變

近排多左同朋友出黎聚會, 有開心有唔開心。 開心o既係一個相識十幾年, 由中一年代keep到而家o既朋友, 雖然唔係成日見, 但今次見返依然雞啄唔斷, 大家都關心對方, 讀書時培養o既默契仲o係度, 一個眼神一個小動作都知對方想點, 而家諗返起你果陣話就算我地兩個人唔出聲都唔會尷尬, 而且默契十足, 我而家終於明白了。 好懷念讀書時轉堂時候, 一個眼神就一齊執野走堂o既日子呢!

當然唔係個個朋友都keep得咁好, 有一個就令我好失望, 以前無話不說, 成日一齊o既日子, 自從佢轉左工, 轉左身邊o既人就變得無影無蹤。 出黎都變得好沉默, 知佢一向都唔係多野講, 但都無而家咁靜呀, 出於關心o既問候得回都係一句起兩句止, 係唔係已經習慣唔同我傾訴呢? 轉換對象係必然, 但我真係估唔到關係會淡成咁, 關於佢o既一切唔再以前咁瞭若指掌了, 我需要一d時間適應疏遠左o既關係。

忙

近排真的忙到嘔, 公事忙, 私事也忙, 身邊真的好多天秤座朋友, 九月尾至10月中共有六位好朋友生日, 極多的慶祝活動將會令我荷包乾硬化, 無法啦個個都係我o既好朋友, 氹下佢地開心值得的, 唯有自己慳d使, 我同天秤座的人真係特別有緣, 佢地佔左我好朋友圈子的一半呢! 在此祝wing wing, 劉先生, 經常被變態看中o既劉小姐, 李小姐, 陸小姐, 陳先生, 天堂o既公公都生日快樂!

可惡的和記

荃灣區的朋友, 請不要登記和記寬頻呀! 家裡不能上網20日o係我喊打喊殺情況下先同我整好, 之前約左不下10次叫佢地上黎整放左我8次飛機, 其餘兩次有一次看一看話係機樓問題佢無辦法整就走人, 另一次說最多同我換埋modem, 換左都係唔得佢都無計, 結果當然唔得就走左去。

o係我打過N年次話預約同投訴, 終於有人理我, o係機樓整o既師傅話, 荃灣區和記的系統已經很殘, 5個server壞左兩個, report左半年要求換過, 和記管理層都無理會, 連維修o既師傅都叫我唔好再用和記了, 當然啦, o係我多次叫天不應時已經fax左終止合約的form, 叫佢地合約完時千萬不要同我renew, 所以請各位小心!

散心

爸爸o既小手術終於完成, 正在康復中, 一切尚算順利, 只剩下頗貴的醫療費未找。 放下心頭小石很想去一個短trip, 工作很煩, 還有其他未能解決的事令心情持續低落, 唯有旅行令我放鬆, budget有限, 要留返多d錢下年resign後一個長trip之用。

禍不單行

呢排心情已經不太好, 加上爸爸將要入院, 雖然只是小手術, 都令我情緒再低落了些。 爸爸本來想o係政府醫院排期, 但竟然要等到09年, 仲耐過北京奧運, 良性都變惡性了, 政府d野真係.....xyz。 於是逼於無耐都要轉往私家醫院盡早解決好了, 但又怕昂貴o既費用唔係我地呢d窮人可以負擔。 平時一向健康o既我呢排都有d唔妥, 成日o係街行行下都暈, 腳好似踩不著地, 希望只係貧血或血壓低的小事吧, 爸媽都因為爸爸的手術煩心, 所以我都無話佢地知, 過些日子會無事吧! 真係黑開有條路, 所有濕滯o野快d離我地而去啦! 搵日去拜下黃大仙!

失落

今日心情係近來少有的down, 尋晚挨眼訓睇了一場再次令人失望o既波, 兩戰兩和o係近年少有的差, 其實一d都唔意外, 我一路都唔認為曼聯今年如外界所講的強。 新兵有的質素平平, 有的傷病, 無病無痛的亦要時間溶入, 何來很強之說呢? 之後仲要面對失去朗尼C朗, 情況更壞了.....

其次今日收到一D消息先係令我更down, 本已為自己應放開了, 可以若無其事, 但點解當知道o既時候個心仲係un住un住呢? 很沮喪, 並唔係因為其他人, 係嬲自己, 嬲自己幾時先可做到事不關己, 明明知道已經無相干, 嬲自己情緒點解仲受影響, 真的可以如肥皂劇的主角失撞個頭埋牆失憶就好了, 什麼都記不起, 什麼都不用想。

晚上去Mega Box看了"叛諜追擊" 一如所料的刺激精彩, 心情稍為好轉。

給天下男性的一篇

從都市日報看來的文章, 相信無一女性不身同感受, 男性更加要睇

都市儷人 ：女人之苦
很多男人認為，女人很多時都心甘情願令自己受苦，例如為求看來有一雙高挑的美腿，不惜穿上幾吋高跟鞋，寧願貼上膠布，回家再浸暖水，死也不願與平底鞋結伴。炎炎夏日上街，無論如何都要塗上化妝品，也懶理是否會令自己更加不舒服。這些都是女士愛美的結果，是女士們自願去做，而且很樂意。可是有一些苦，卻不是女人自找來受的。如果做問卷調查，問一下甚麼是做女人最討厭的事，相信不少人會答：月事。男人這一輩子都無法明白，女士每個月為甚麼總會有些日子，感到暴躁不安，甚至像病了一樣沒精打采。有一位勇敢的朋友，為了嘗試了解女士們月事的煩惱，他決定「身入險境」，也來親身感受一下。他先向一位相熟的女性朋友，借來一片衛生巾，然後回家把它貼在內褲，他當時唯一的感覺是：好難受！他認為突然被有厚度的不明物體與肌膚相貼，除了感到很不舒服之外，簡直覺得自己不能自如地走路。不過，他不單去適應它，還與它一同尋夢去，與它共同度過十多小時。但他始終認為缺少了一些真實感，所以就嘗試在衛生巾上加水！為了令讀者更了解他的感受，得到他本人同意，節錄他寫的文章：「嘩！嘩！嘩！真的很難受，濕漉漉，有重量的，跟活在地獄沒有兩樣，甚麼要好的心情立時作鳥獸散，消失得無影無蹤，那有心情做甚麼工作！稍後，我再加多一次水，那就好像有塊鐵在褲襠似的，重得很兇……不斷行行企企也不是辦法，我決定坐下來。HOLY，整片濕濕的衛生巾100%貼住我，女士們，妳們是怎樣捱過的？」最有趣的是，他不停加水後，衛生巾終於承受不住，把他的褲也弄濕……他指出，沒法了解女人月事時不適的感覺，沒法經歷找不到洗手間的狼狽，所以自己並未能完全感受女人之苦。他在網誌的文章，得到的回應如雪片般飛至，無論男士女士，都認為不可思議，但卻又很佩服及稱讚他的勇氣，更加認為他的文章，應該給天下男士一看，還鼓勵所有男士，應該親身體驗一下，這樣男士便會更懂得關懷及體諒。的而且確，男性女性因為生理結構不同，各有各的難言之苦，而這些苦，雙方可能一輩子都不會明白。假如大家都願意為對方著想，為對方易地而處，可能兩性之間的相處，很多問題都會迎刃而解。男士們，你願意為你身邊的人，作出這個勇敢的嘗試嗎？

曼聯澳門之旅

趕頭趕命為左去馬交睇呢場波, 並無往年見到曼聯咁興奮, 一來真係太趕, 去又差d趕唔到船, 返又截唔到的士, 什麼興奮心情都無哂。 其次無機會同d球員近距離接觸, 睇波o既位置又太遠, 只見22個小人跑來跑去。 可能天氣太熱, 令我只想盡快返屋企沖個靚涼休息, anyway最大收獲就係親眼見到英超獎杯又回來我地身邊, 見到的一刻有想喊o既衝動, 久違了, 朋友!

剪定唔剪？

因為剪定唔剪頭髮呢個問題已經諗左我成個禮拜, 突然間好想將d頭髮剪過膊頭, 換過新形象, 二來天氣咁熱, 頭髮會清涼d吧! 但又怕剪左唔好睇會後悔呢, 試過好幾次把心一橫想剪到好短都俾髮型師說服了, 佢地多數都叫我唔好剪, 又問我咁長剪左去捨得喇? 佢地比我更唔捨得呢, 哈! 於是就自作主張幫我只修短幾寸, 所以留左咁多年長髮都剪唔成。 讀書年代亦都試過懶型剪到過耳仔咁短, 結果後悔得要死, 整過暑假都唔敢出街, 等頭髮長返先敢見人, 自此以後都唔敢輕舉妄動去改善髮型, 睇黎我又要諗多一頭半個月了。

SHOCK

今日睇"每當變幻時"前收到個好震撼o既消息, 一個中學o既同班女同學, 因為減肥而有厭食症, 其後變成肺積水, 做完肺手術後又發現肝亦受感染, 終究不治。 聽到之後很心up, 雖然唔係同佢太熟, 畢業後只見過兩三次, 但不時都由其他同學口中知佢o既消息, 說將會結婚之類, 在舊公司附近都撞過佢幾次, 並無咩異樣的。

話說回來呢個女仔一向都唔係肥底, 所以都無太必要減肥, 更難想像減至走火入魔導致厭食。 打來o既同學o係電話中已經有d哭意, 說其他相熟同學更泣不成聲, 諗到個情形真係好難過, 年紀輕輕, 一半o既人生都未完就去世, 雖然好耐無見但佢個樣o係我腦裡面突然異常清晰, 一向看唔透生死o既我聽到呢d事情真係好難釋懷, 特別係呢D年輕o既生命, 心情有d沈重。 希望各位減肥人事適可而止, 肥瘦不及生命來得重要!

Crazy For 小美

My GOD! 呢兩日個腦真係完全俾小美佔據哂, 邊個叫佢咁完美呢! 佢係我第一個覺得真人比上鏡更正o既明星, 除左高大靚仔之外真人更多份吸引人o既氣質, 又nice, 令人為之瘋狂, 怪不得咁多女仔俾佢迷倒, 包括我......經過呢兩日見面令我更加鍾意佢了, 佢燦爛o既笑容, 迷人o既電眼同飛吻都會陪我呢段日子, 十分期待下次有更近o既接觸, 但下次加埋楊丞琳, 夢想更難實現lu!

7.1

7月1日對我黎講有幾重意義 :
1) 31年前一個型男的誕生, 就係我第二最愛雲佬o既牛一
2) 就係我最偉大o既老爹o既牛一
3) 就係我終於打開打馬吊o既勝利之門, 雖然只夠買一個麥記餐, 但已經係一大突破, 多謝幾位手下留情o既雀友
4) 回歸10周年, 老左10年, 不堪回首, 不想回憶(集唔集體都係), 可以回到10年前的我嗎?

偶遇

o係旺角撞到同一個不知名o既人三次, 三次都係佢見到我叫我先, 很好笑o既感覺, 難得每次佢都表現十分熱情, 好雀躍好多野想講咁, 自問都算係對朋友主動熱情o既人, 但見到佢覺得自己都唔夠佢十分一, 有d受不了, 但面對佢好陽光o既笑容很難表現出冷淡呢!

今日第三次o係公司樓下撞到, 對話如下....
A : hi! 你記唔記得我呀?
B : ..... 記得(呆左幾秒, 腦裡翻查記憶, 果一刻真係唔太記得)
A : 你o係呢度返工呀?
B : 係呀 (不太願意俾佢知, 因為之前已經問過, 我敷衍帶過, 今次走唔甩)
A : 呀! 我唔記得你叫咩名添!
B : 下? 我無話過你知呀!
A : (面露尷尬, 伸出手) 你好我叫jason呀 (定係johnson, 唔太記得, 哈!)
B : (無奈都要扼) 我叫becky呀! 好大雨呀, 我都係返上公司先, bye!

短短o既對話完結, 我一路行一路笑不停, 發覺自己講錯野, 雖然我好sure無話過佢知我個名, 但衝口而出咁篤爆左確實令佢有d尷尬呢! 很奇怪的一個人, 只係撞過三次竟然主動扼手介紹自己, 哈! 很傻氣的小朋友!

中學的日子

同朋友傾開中學o既校園生活, 提起依舊怒火中燒, 佢地都好意外我o既中學時代係咁過, 我仲以為大部份人都係咁呢! 很討厭那時o既男同學, 好多無聊o既惡作劇都令我地女生無還擊之力, 推來推去抽水裝裙底已算小事, 更過份的是掉生雞蛋, 搞到成身烏糟辣撻, 將我地d書包掉入男廁要我地入去自己執返, 其他言語上o既侮辱更不用提, 所以從小已經對男生無咩好感, 大都無聊兼幼稚, 毫無風度, 好不容易中四自擺脫呢班怪獸先有兩年好日子過。 以致而家舊同學提起呢班騎呢怪我都不禁討厭, 唔想再見呢!

地獄廚神

原來我都係地獄廚神! 無啦啦屎忽痕去學人整蛋糕, 明明跟足食譜去做, o係爐外面睇係極度正常, 一拎出黎變左pizza, 又矮又硬, 奇怪! 唉! 不嬲唔入廚房o既我都係算吧, 去街買個隱陣d, 不過感謝媽媽咁難食都食左兩啖。

睇左場令人激氣o既巴塞對愛滋賓佬, 一場令人振奮o既皇馬對薩拉戈薩, 美斯o既手球真係舉世嘩然, 頭髮都hi唔到o既波竟然當佢頂入, 幾驚雲佬同碧咸o既西甲冠軍就俾人一手拍走, 好在天有眼, 愛滋賓佬努力不懈咁追和, 唔係巴塞捧盃真係世紀大冤案。 好心痛碧咸傷成咁都頂硬上, 係國家隊傷o既左腳舊患, 得返一隻右腳都繼續踢, 果然係曼聯出品, never give up呀, 雲佬都好叻叻呀, 兩個入球打救皇馬, 希望佢拎埋神射手, 金靴獎同西甲冠軍來個大三元!

我愛碧咸, 很愛很愛......

很開心, 麥卡倫終於向現實低頭, 重選我最愛o既碧咸入國家隊, 佢一定要爭氣救英格蘭出生天, 俾全世界知佢仍然係英格蘭不可或缺o既一員呀! 碧咸o係俾皇馬同英格蘭棄用o既日子, 表現出絕佳o既風度同態度, 用表現令領隊不得不再重用佢, 終於守得雲開。 怎麼辦? 我發覺我更愛佢了, 佢真係波好人品更好, 呵呵! 加油呀! 我終於可以睇返英格蘭o既比賽了! That's why I Love Beckham!

和記寬頻

激氣! 兩星期有多了, 屋企用o既和記寬頻唔知點解突然比56K還要慢, 打去CS佢話搵師傅去機樓搞搞, 好完兩日又慢返, 無網上o既日子真無聊, 好在仲有溏心風暴可以追。 真想把和記轉了, 但又唔捨得佢BT o既極速, 聽說網上行係最穩定, 不過我以前用過又嫌佢o既速度實在不及和記呢, 真頭痕!

再遊馬交

今次係今個半年內第二次再去澳門, 上次即日來回, 今次住一晚, 行程鬆動d, 人都無上次咁攰。 因為平日去真係平好多, 所以托了於英皇做o既朋友買了員工package, 連船飛及入住英皇酒店都係540元一位, 認真超值!

check in後, front desk o既人可能見我地同員工有關, 竟然upgrade我地去頂樓o既行政套房, 開心得我地發顛呢, 自己去咁耐旅行真係未住過咁高級呀! o係房間發完一輪顛就出發四圍食, 最好味就係頤德行o既豆腐花, 連續食左兩日, 真係滑到不知所謂。 之後都係食食食...有豬扒包, 水蟹粥, 紅豆雪條, 其實都相當唔錯。

睇雜誌話星際係最易漏財o既一間賭場, 於是去試下, 果然, 不出5分鐘, 連玩5舖大細, 未輸過, 即贏500, 果日心水真係巴巴聲咁黎, 話左一個double即刻收手, 於是去左新口岸o既酒吧街啤一啤慶祝下。 其後第二日都係去媽閣, 參觀幾間新賭場, 食左餐葡菜, 買埋鉅記就回港。

We are the champion!

苦等三年o既英超冠軍終於返來喇! 曼聯今年o既表現實在令各隊心服口服, 極有說服力, 捱過最多傷兵o既時刻, 終於得到應得o既回報, 真係好感動, 非常期待頒獎一刻。 其實以今年o既人腳贏得英超已經超額完成, 歐聯慘敗當然失望, 但點都唔及英超重要呢! 又係輸俾AC, 費SIR想再贏歐聯應該想想如果何增加一個如加度素咁高質o既防中喇! 而家全力炒車再奪FA CUP, GO!

曼聯仲好波!

yeah! 等待多年o既英超冠軍又行近一步, 一年o既努力終於無白費, 而且係多場有說服力o既勝仗下奪冠, 而唔係靠魚生粥多場一比零, 果種感覺光榮得要死呀!

當然自己o既努力仲要加上車仔o既不濟啦, 車仔o係其他隊眼中已經唔係不可被擊敗, 連續兩場失分更係曼聯奪標o既關鍵。 熱切期待曼聯捧盃o既一刻, 朋友, 返黎喇!

南華好波！

yeah! 好開心南華終於重奪失落七年o既聯賽冠軍, 不枉我今年捧佢唔少場。 睇南華個blog, 發覺羅生放左唔少心血o係南華度, 同時表現出佢對南華o既熱愛, 今次個聯賽係佢應得的。 由足球可以見到一個成熟男人表現出孩子氣一面, 佢會因為場一波而訓唔著呢, 哈! 見到咁多擁南躉感動留言, 令我感受到佢地多年o既支持終於有回報, 我都有預感曼聯今年都會取回失落多年o既錦標, 因為我一路心裡面都覺得南華同曼聯真係好多相同地方, 最似一樣就係打不死o既精神, 所以曼聯都要加油啊! 同南華一樣取回失去多年o既o野吧!

南華官方blog http://hk.myblog.yahoo.com/scaablog

小低潮

近日心情有ｄ沮喪, 原因有好多, 但主要係搵工問題吧! 明知自己係時候轉換環境, 再唔係人老珠黃無人請了。 一路以為自己多年經驗, 要搵工應該唔難吧, 點知send左20份但係一個叫interview o既電話都無, 我還以為resume寫錯電話號碼呢! 點解個個都話市道好? 真折墮, 想當年幾份工等我揀黎做, 而家連in都困難。 睇到唔少廣告請一個shipping都要degree學歷, 擺明蝦我讀得書少, 哼! 很沮喪, 好想逃離一下, 或者無feed back係暗示我唔應該轉?!

MU KO Roma

事隔兩天依然為呢場大勝興奮不已, 各大報章都紛紛報導, 睇得我津津有味。 所有曼迷都會為曼聯精彩演出歡呼, 本來我個人唔太重視歐聯的, 只視為bonus,但賽前羅馬挑釁o既言論令我想佢地爭返口氣。 經過失望o既第一回合, 球迷遠赴羅馬捧場所受o既毒打, 一眾球員o係場上一併報哂仇, 技術性擊倒對手。 雖然o係唔鍾意曼聯o既人眼中, 呢場大勝只係羅馬後衛太屎, 不過我地眼中睇到係一隊團結, 有heart o既曼聯呀! 四強再遇AC我相信佢地都可以一報05年之仇, 因為朗尼同C朗比當年進步很多, 一定會出盡渾身解數一吐烏氣, 加油呀紅魔兵團!

Proud of United!

好耐無睇過一場咁扣人心弦o既比賽, 其實今年我對歐聯期望唔大, 首要都係由爛車手中贏回聯賽冠軍, 不過賽前羅馬一眾人不斷出口術又令我想佢地爭返口氣。 一如所料作客羅馬的確難打, 球場氣氛刺熱, 聲浪其大, 一面倒傾向主隊。 開波不久已經發覺羅馬中場o既威力, 大部份球員都屬一掂就跌令曼聯有d無所適從。 史高斯被逐更令球隊陷入苦戰, 不過奇怪地我並無好嬲地怪責佢, 可能佢係曼聯忠心o既老臣子吧! 一直祈禱著佢地會追平, 真係做到喇, 雖然之後俾人再入一粒, 其實二比一o既比數為我地球迷所接受, 因為佢地打出落後一球打少一個都唔放棄o既精神呀! 有d擔心經過呢場搏盡o既比賽影響黎緊o既聯賽, 希望佢地咬緊牙關拚埋佢, 下星期再同羅馬決一死戰! GOD BLESS UNITED!

Back From Korea

事隔七年再去韓國, 已經由當年o既漢城改為叫首爾, 其他o野都變左好多, 特別係物價, 以前o係我印象中韓國所有o野都好平。 今次旅程比我預計中好玩好多, 我地一行四個女仔連埋部份團友都係玩得幾顛o既人, 成個旅程都充滿笑聲, 亦無意見不合之時。

最攰係第一日, 放工後搭12點半夜機出發, 去到清晨六點就開始行程, 雖然佢有地方俾我地稍作休息, 不過都係唔太訓到, 整日行程都恍恍惚惚度過, 嚴重唔夠訓令我有d作感冒, o野都食唔到, 一返酒店已經食藥倒頭大睡, 連佢地逛酒店附近我都唔參與了, 不過經過一晚叉電打後幾日我精神得離譜呢!

之後幾日行程都係shopping度過, 再加一個Everland, 各人都買到好似唔洗錢咁, 狂掃化妝品同護膚品, 價錢真的比香港平一半, 我懷疑如果俾人查o急人地會以為我地走水貨呢。 總括來說成個旅程十分開心, 希望tikman都過一個難忘o既生日啦, 在此多謝另外兩位團友alice同carol, 仲有酷似詹瑞文o既當地導遊, 佢講野又生動誇張又好笑, 坐我地後面o既搞笑夫婦, 超過六尺o既韓國影相哥仔.......

出發

終於到出發的一天, 呢個trip對壽星婆黎講真係一波三折, 先後兩次緊急事故可能去唔成, 最近一次事發仲係尋晚, 出發前一晚仲未知會唔會去, 真係嚇得我, 好彩暫時最新消息都係ok o既, 希望大家都平安無事啦, 開開心心完成呢個首爾整容團, 返黎大家都變靚D, GO!

N73

夾左一星期價仲未出到我心頭好N73, 點解你咁貴架? 定係我太窮, 考慮了一星期都未出到。 可能下星期去韓國有D錢要洗, 所以考慮多左, 人老了買野不如年輕時衝動。 如果韓國之旅無over budget, 返來再購入, 粉紅色N73等我回來哦!

大戰之後

本來期待o既一場大戰, 完結之後結果係令一眾曼聯球迷興奮的(包括我), 但曼聯o既演出並未令我興奮。 實際我亦為利記不值, 全場壓住曼聯打, 唔拎三分已經無運, 仲要俾曼聯一個機會得手輸埋。 有時足球就係咁, 踢得好唔一定贏, 運氣都佔不少比例, 睇車仔就知, 上兩年o既運氣o係今季無哂, 上兩季踢得幾差都會拎三分, 今季出現o係曼聯身上, 冠軍確需要呢d運氣。

濟州

旅行地點暫定濟州加首爾, 順便慶祝黑面公主o既大壽, 希望佢同加路同愛麗斯都請到假啦, 又希望旅行社可以成團。 年年我都會o係新年後出發, 因為我專揀淡季, 但今年好奇怪, 當我地上旅行社拎資料時, 間間都有10幾20人排隊問野, 多人程度似係趕住新年前出發呢!

平淡的新年

今年o既新年假期過得十分清閒, 好多時間可以留o係屋企做廢人。 因為公公, 爺爺, 麻麻相繼去世, 婆婆因為老人痴呆住了老人院, 我地不如往年咁新年時長期待o係坪洲拜年或者慶祝, 坪洲o既家冷清很多, 諗起都幾心酸。

因為懶而無跟爸媽返大陸玩, 而我都係隔日先約人出街, o係屋企可以整天唔外出, 覺得自己就黎變"隱蔽中年", 三餐夾埋一餐食, 順便當減肥, 每日都有最少10個鐘睡眠, 但人都係攰攰的, 皮膚反而差左好多, 奇怪! 頭一次覺得原來返工都唔太壞呢。

曹格

一向有睇開台灣節目都知呢位仁兄係近日好受歡迎o既唱作人, 但對佢認識只限於電台派的superwoman同最新大碟o既3 7 20 1, 感覺都非常好。 最近網上流傳好多佢台灣節目唱歌o既片段, 特別係用返女仔key唱女仔歌呢兩段, 呢兩首歌對身為女仔o既我黎講難度都非常之高, 而佢竟然可以唱成咁實在驚為天人, 有興趣請聽一聽, 我再煲下佢兩隻碟, 起起佢個底先!

http://www.youtube.com/watch?v=prLu2PTE6QU (新不了情)

http://blog.xuite.net/flyinhigh3/Gary/6554402 (聽海)

雙糧

期待已久o既雙糧同bonus終於出左, 一如往年銀碼不變。 本來打算買一個略貴o既手袋獎勵自己, 但發覺我一個仙都唔可以使住, 因為三月會有數個旅行o既計劃, 地點尚未確定, 有韓國濟州, 有土耳其, 最新消息係東歐。 度度都好吸引, 但最嚮往應該係東歐, 因為太遠唔係咁易搵partner去, 加上我呢條賣剩樜又唔係隨時有人可以lur陪我去, 有人撩我真係心動得很呢! 不過無論如何三月應該會出國一下, 地點待定!

聽說妳失戀

一首克勤N年前o既歌名, 但實際也是, 我一位朋友失戀了。 聽左佢講o既o野, 我比佢更勞氣呢! 點會有人分手咁無交帶, 唔搵唔搵就當無件事, 好歹都俾個原因吧! 但朋友話唔敢搵o既原因係怕聽到傷害佢o既說話, 你幾時變得咁懦弱呢。 最離譜係個男仔竟然o係我個fd面前讚我個fd個朋友比佢靚? ka yan如果你睇到的話請你相信我你一定比"她"漂亮的! 咁o既男人不要也罷, 快d忘記佢, 要找悔氣隨時歡迎搵我幫拖, 無拖拍的你苦悶嗎, 唔好忘記仲我呢個賣剩蔗陪你呢, 加油吧姊妹!

澳門一遊

好姊妹相約到澳門一遊, 順道慶祝生日, 由於我地有員工攞飛, 所以來回船飛只係240蚊, 差唔多平左一百蚊一位, 而且不分日夜航呢!

一整天都唔記得自己食左幾多餐, 先去古舊o既龍鳳茶樓飲茶, 跟住去氹仔食水蟹弼, 行下海邊公園同手信街, 由於當日係星期日仲有一個小型o既跳蚤市場, 但其實無咩買。 然後再去之前香港都有開o既"沙度娜"食木康布甸, 跟住再黎燕窩蛋撻。 離開氹仔再去觀光塔, 原來底層都開左d商店, 最令我地興奮係竟然有個日清館, 有日清o既公仔同佈置, 同埋介紹杯麵o既o野, 我地入去瘋狂地影相, 雖然地方不大。 最後參觀新開o既永利同星際賭場, 兩間都好大, 因為時間關係所以行唔哂, 但以永利高級少少, 地下有好多名店如LV, TIFFANY, PRADA等等...好似置地廣場, 方便人地搏殺完去掃貨。

去賭場打左個轉, 無賭到就趕住食飯走人, 晚餐去左大馬路o既新帆船食葡國菜。 飯後最後行程係漁人碼頭, 有好多歐陸式building, 小羅馬鬥獸場裡面開緊何韻詩演唱會, 但票價比紅館握手位仲要貴, 場地有如海洋公園的海豚表演場, 掠水得很。 以我地估計漁人碼頭應該日間去可以影好多靚相, 其實係一個唔錯o既地方, 一定要日抖去多次補番數, 行完漁人碼頭就飛的前往碼頭返香港。

係度多謝兩位姊妹, 特別係學友哥哥, 你咁同我地做阿四又唔肯收錢會縱壞我地架!

又老一年

尋日係我２x歲o既生日, 我選擇放自己一日假好平靜地同屋企人渡過, 今次亦都係我第一次因為生日刻意放自己假。 原來係咁寫意, 唔使見到唔想見o既人, 唔會因為工事令我煩躁, 開開心心的過這一天。 近年對生日呢個日子愈來愈矛盾, 唔太想慶祝去提醒自己又老一年, 我都係好難免俗咁對年齡數字介意, 另一方面又想見哂各方好友話俾自己知身邊有好多關心我o既朋友, 每每見到佢地都令我心情好起黎, 每個祝福都令我感動, 但點解次次對生日蛋糕點著蠟燭許o既願都無實現呢, 我唔係要中六合彩果d喎(雖然唔拘, 哈!)。

Anyway, 多謝每位記得我生日, 同我慶祝過生日o既朋友, 多謝媽咪o既生日大餐, 多謝姐姐美味的生日蛋糕(我一個人吃左一半呢), 祝自己生日願望實現, 最少要轉成工啦!

OK

一向對張震嶽唱歌唱到除褲o既作風不敢恭維, 但無可否認佢有d歌真係好正, 近期十分鍾意o既一首, 歌詞加演繹令我百聽不厭 :-
OK
曲:張震嶽 / 詞:柳丁
生命之中.有多少經歷.值得細細回憶.
尤其是感情.那些刻骨銘心.的回憶
好多年.都不曾忘記.
我們都在尋找真愛.花錢. 也不能買
但是我問你.甚麼是愛?它沒有正確答案
只能.憑感覺.在人海裡.尋找所謂的愛.
有人隨便玩玩.有人拼老命在玩.
有人一輩子.沒有伴.
過著.東奔西跑.的日子 來到.不熟悉的城市.
特別容易孤寂.
想著.揮之不去.的問題. 尤其 面對自己總是沒有頭緒
感情.和個人的.平衡點.常常失去重心.
鋼索上.風一吹.就會掉下去
有時卻想放棄.搖搖欲墜
其實最自私是自己..


走一步算一步.尋尋覓覓
當你遇到一個喜歡的人.卻不想在一起.
也許 只想 一夜情而已
放了真感情 卻害怕 自由 會失去
世界上只有兩種人.男人和女人
每天上演同樣的劇情
誰又愛上誰.誰又背叛誰
誰又傷了誰.樂此不疲的表演.好累.
但是沒有人能夠.脫離.這藩籬.誰可以跨越出去
結局因人而異.有的廝守終生. 有的繼續等.
有的乾脆剃度.永遠不再過問.
這紅塵滾滾.心中是否沸騰
還有多少時間.值得繼續等
曲終人散.走在陌生的街上
剩我一個人 唱

我可不想裝的很可悲
好讓人家來給我安慰
這一段時間我很ok
頂多入夜之後早早睡
當然還是有一些小小的寂寞在身邊
寂寞很ok.一個人ok.習慣就ok


愛情面貌我試圖了解
卻把自己搞得很狼狽
有一段時間我不ok
把靈魂關在黑暗裡面
當然還是有一些小小的痛苦在身邊
寂寞很ok.一個人ok.習慣就ok

外遊數天

呢個聖誕認真唔快樂, 發生一d事令我down到谷底, 到而家都未適應過黎, 返工提唔起勁, 偏偏工作又多，　連日記都懶得寫。 幸好聽日起可以到星馬一遊, 雖然去過, 勝在唔洗錢, 呢個trip黎得真係合時, 正好俾我行開下, 調整下呢個混亂o既腦袋, 可以諗通d野, 希望返黎之後又係一條好漢!

被騙了

我被騙了! 心情很差, 不只因為金錢o既損失, 係我對自己, 對人性o既失望, 人與人之間o既信任係咁不堪一擊, 令我覺得好心寒, 除左爸爸媽媽或者識左十幾年o既姊妹, 好似沒有人可以信任。 自問一向對朋友都不壞, 當我一當果個人係朋友時就全心的信任, 無諗過會被騙所以打擊都來得特別大。 媽媽成日奉勸不要太過幫人, 呢次更因為幫人令到自己三餐都差點成問題, 點解換來係令人咁難受o既答案? 呢次係我o係朋友之間受過第二次最大o既打擊, 仲記得上一次都要好朋友開解左好耐先復原, 唔知今次要幾耐呢?

經過呢d事件, 我好懷疑自己分辦好人壞人o既能力, 亦都證實左不聽老人言吃虧在眼前o既道理, 如果唔係我瞞住媽媽就唔會有呢件事發生。 我亦都不得承認了解我o既朋友常常擔心我俾人呃o既原因, 枉我仲以為自己好聰明呢! 睇黎我要重新衡量什麼人才是朋友, 俾d時間我閉關, 想通了就好, 加油吧, 努力!

又生病

明明覺得自己有幾年做gym習慣後身體好左好多, 但一轉天氣呢排又頻頻生病。 發燒, 喉嚨痛加上食藥, 搞到成個人都昏昏沉沉。 我一向係易病o既人, 好易俾人傳染, 搭車隔離位打個乞嚏我返到屋企又要食藥了。 媽媽都怕左我, 成日叫我帶口罩出街, 一見帶菌者我就戴起佢, 但我覺得好異相拒絕了, 所以就經常俾人傳染了。

今次事緣應該係睇墨攻果陣隔離個女人係咁咳, 返到屋企我即刻成身骨痛又發燒了。 不過墨攻確係幾好睇, 好有意思, 唔算好sad, 主要messgae都係反戰, 唯一奇怪係劉華個頭太時裝, 人人都梳古裝頭, 獨獨佢無啦啦整個skin head, 仲有一個黑人客串, 講住怪怪o既國語。

恭喜克勤

鍾意左克勤10幾年, 終於等到佢結婚喇, 衷心替佢開心。 非常羨慕個伴娘哦, 有劉華做伴郎, 點解我都無呢d命水? 奉勸各位好姊妹如果想搵我做伴娘, 請預備一個同劉華咁上下質素o既伴郎, 否則免問, 哈!

本來真係有打算去一去酒店現場, 睇下一對新人, 睇番報紙好彩無去到, 原來佢地5時多已經出來, 我放工去到都係白行一趟。 有DJ去完婚禮講, 佢地睇番克勤英國影D婚紗相, 有D係去到一個球場拍, 相信有99%呢個球場會係奧脫福, 因為以克勤喜愛曼聯程度佢絕對唔會去其他球會的。 恨死人喇, 佢影之前都應該使唔少橫手, 因為奧脫福出名規距多多, 影婚紗相等事應該好難申請吧! 希望俾我搵到佢D相啦, 盧淑儀嫁到克勤真係幸福, 當然佢10幾年不離不棄都應有此報, 再一次祝佢地白頭到老, 快D生個勤仔啦!

秋風起

終於感覺到涼意, 氣溫一下子下降幾度, 身體還未適應過黎就病倒了, 幸好只是小病。 起初只是傷風, 隔日咳埋, 很唔好意思傳染左前天同我睇戲o既學友哥哥呢。 由於本身有嚴重鼻敏感, 傷風昤個鼻特別辛苦, 加上遺傳o既支氣管敏感, 一咳好易有支氣管炎, 所以平常人好少事o既傷風咳對我黎講都比較難好。 不幸中之大幸, 因為食藥胃口唔好, 兩日輕左兩磅呢, 哈!

旅行的意義

唔知由幾時開始, 瘋狂的愛上旅行, 去旅行o既念頭一年365日o係我腦裡面揮之不去, 去完一次又一次, 成日覺得自己好似好耐無外遊的。 不計較地點, 同行係咩人, 時間, 價錢, 只要有得去就好, 有點兒病態呢! 所以我年年大假都唔夠用, 成日俾人扣人工都甘之如飴, 因為旅行對我實在有無比吸引力。

但有時礙於時間同金錢, 好多近o既國家都俾我去過幾次, 去到自己都有d唔好意思。 愛上旅行係由踏上飛機一刻個人已經興奮無比, 呢d感覺平日做什麼都找唔到的。 離開熟識o既地方更有完全放鬆o既感覺, 覺得世界如此的大, 自己幾咁渺小, 思想都變得豁然開朗。 雖然媽媽經常話我同旅行社打工, 但我都想呢個習慣可以持續落去。

秋高氣爽, 又係旅行o既好時間, 我就黎鋪哂蜘蛛網喇, 快d成行啦!

旅行的意義 陳綺貞

你看過了許多美景 你看過了許多美女
你迷失在地圖上每一道短暫的光陰
你品嘗了夜的巴黎 你踏過下雪的北京
你熟記書本裏每一句你最愛的真理

卻說不出你愛我的原因 卻說不出你欣賞我哪一種表情
卻說不出在什麼場合我曾讓你分心
說不開離開的原因

你累積了許多飛行 你用心挑選紀念品
你收集了地圖上每一次的風和日麗
你擁抱熱情的島嶼 你埋葬記憶的土耳其
你流連電影裏美麗的不真實的場景

卻說不出你愛我的原因 卻說不出你欣賞我哪一種表情
卻說不出在什麼場合我曾讓你分心
說不出旅行的意義

你勉強說出你愛我的原因 卻說不出你欣賞我哪一種表情
都是你離開我的原因
你離開我
就是旅行的意義

李克勤演奏廳 II

聽過克勤演奏廳II, 非常慶幸我係佢o既 fans, 繼演奏廳一o既高難度, 呢隻II難度更高, 而佢都做到了。 開頭將CD聽一次發覺最鍾意係"太子公主", 但睇埋DVD發覺最正都係主打歌"天水.圍城", 用呢首作為主打並非無道理, 就如克勤所講, 呢首係令各樂手出盡了十成功力, 林夕精彩o既歌詞令克勤同兩大監製趙增熙, 金培達嘖嘖稱奇。 睇隻DVD一定要睇埋個幕後花絮, 非常精彩, 唔係唔知佢地制作如何大如何嚴緊, 表面上我覺得克勤今次演繹比上次自如, 但原來幕後佢非常緊張, 比上次更甚呢!

個人最鍾意係"天水.圍城", 其次係"公主太子", 亦都好鍾意"PARIS HILTON", 呢首可以聽出克勤奔放唱法o既一面, 聽得我十分興奮。 歌詞方面克勤今次刻意唔參與, 增加左d香港味, 最勁緊係林夕首"天水.圍城"啦, 難怪令克勤都唔敢講自己識寫詞了。 仲有, 一定要睇埋d mv, 濟州島o既風景真係靚得很, 搞到我都好想去。 好多謝環球對克勤o既信心, 投資咁大, 一行三十人o既工作人員遠赴韓國, 場地, 樂手, 器材都花費不少, 希望銷量好過上一隻o既八萬張, 唔好辜負佢地一番心血啦。 經過今次高難度之作, 唔知克勤下次又有咩玩呢? 往後o既唱片仲可唔可以o係普通o既錄音室裡面進行呢?

慘不忍睹的亞姐選舉

一向好少睇亞視, 因為質素及卡士都唔吸引。 尋晚家人收睇亞姐選舉, 我都係路過睇兩眼, 睇罷真係令人眼火爆, d衫不知所謂, 套套都只係遮住三點而已, 有d更加唔合付人體構造三點都遮唔到, 有一個佳麗就係咁樣露點人前, 非常清楚!

司儀o既表現更令整個比賽加添咸味, 什麼"噴血再噴血", "呼之欲出"都通通上, 呢d係合家歡時段可以出街的嗎? 唔知仲以為睇緊有線d一百幾十台呢! 選出來o既舒夫真高, 名就夠哂出, 但只得16歲, 都係返去讀好書吧! 睇過如此爛o既選美活動奉勸亞視都係停辦吧啦!

MU Vs Liverpool

星期日睇左場開心o既比賽, 唔單止曼聯取勝, 同時呢場都係近年雙方對賽少有打得咁放o既一場。 往時睇曼聯對利記都係緊張而唔精彩, 兩隊大鬥沉悶, 十分保守, 都係一球上落, 但尋晚果場令我異常興奮, 兩邊都搏哂槌, 當然利記進攻明顯有心無力, 輸亦屬正常!

尋晚最令我印象深刻係費查同李奧, 費查代替C朗交足貨, 走上走落, 非常勤力, 雖然仍有交失o既老毛病, 總括功多於過。 李奧果一個入球簡直有施丹影子, 邊個想像到一個後衛腳會射出如前鋒功架o既入球? 李奧好日唔入波, 呢球咁靚抵輸啦! 有d可惜如此勝仗都未能拋離車仔, 但反觀車仔今屆表現已比上兩年少左好多霸氣, 只要朗尼快d重拾射門鞋, 卡域克盡快入局, 各人都無病無痛, 曼聯爭回聯賽冠軍仍然係樂觀o既。

你信嗎?

近日家裡發生了件頗為不可思議o既事, 公公死去兩年了, 中秋節係佢生忌, 今年o既中秋節, 家中起碼有一半人說發夢見到公公訴說著, 很肚餓, 很窮, o係下面沒衫沒食物沒有錢, 我地燒俾佢d野完全收唔到。 起初只係表妹一個人夢見佢, 接著兩個表弟, 阿姨同舅父都作同一樣的夢, 還叫表妹給他煮個公仔麵, 很可憐呢! 經一番調查原來我地都把公公的生日都記錯, 因為燒野俾佢果陣要講明幾時生日俾邊個的, 所以公公全部都收唔到。 經表弟敘述夢中公公的可憐情況心裡面好唔舒服, 他過著係點樣o既日子呢? 很想念他, 好想同佢說說話。 而家家人搵左個專長通靈的師傅同公公溝通, 睇下佢要d咩, 同埋要確實佢再收我地燒俾佢o既野, 咁我地就放心了。 聽落好似好無稽, 但點樣解釋咁多人都夢到公公的慘況, 其實我信確有其事, 我反而質疑果位通靈師傅真的找到我公公並同佢說話話, 希望佢唔好呃我地啦!

出賣了老爸, 哈!

唔少朋友見過呢張我細個同爸爸影o既相, 都不約而同話我老爸好型好得呢, 今次姑且出賣佢一次, 哈! 首先我本人都好鍾意呢張相, 小時候小小o既身驅窩係爸爸懷裡, 十分溫馨, 好懷念哦。 自小同爸爸關係都唔錯, 細個佢已經成日帶我去大球場睇波, 次次睇波都要食雞脾同咬蔗, 多年習慣形成我至今都鍾意睇波, 而足球都拉近左我地o既距離。

睇番以前d相, 相比當年, 發覺爸爸老左好多, 以前佢有六尺的, 而家一年比一年縮水, 所以近期聽古巨基o既"愛得太遲"都很有感覺。 此外, 同各位講聲, 如果你地有見過我老爸2x多年後而家個樣, 或者會收番所有話好型好得o既讚美呢, 哈哈!

P.S.我細個真係好似小丸子嗎?

該死的小強

爸媽去了八天雲南, 呢星期都得番我做孤獨老人, 佢地出發之前我已經問定殺虫水放o係邊, 因為我知道得我一個在家, 小強一定出黎搵我, 平日爸媽o係度又唔見佢地出黎, 哼!

其實我生平最怕小強, 每每見到都要爸媽捉到我先肯訓, 唔係我唔肯上床, 因為我覺得佢實會趁我訓著爬上我床的, 我對小強敏感個程度, 連佢地行路聲我都會聽得出架。 討厭小強係因為佢地醜樣黑蚊蚊的, 好似永遠向我走黎, 俾我感覺攻擊性好大, 要飛的更恐怖, 向著你面飛過黎架, 我會驚到喊呢。

果然不出我所料, 第一晚已經有兩隻, 我同佢地作戰到半夜3點先有得訓, 跳上梳化, 左手拖鞋右手殺虫水, 噴左好幾次都未死得, 用左大半枝殺虫水終於搞掂兩隻, 一見佢出黎就瘋狂地噴, 唔係佢死就我亡! 其後兩日都唔見再有小強, 可能我噴得太狼佢地唔敢出黎, 以為有好日子過, 點知今晚有一隻仲大, 同佢對恃左好耐先決定用地拖將佢摏死, 點知都係失敗, 第一野唔準摏佢唔死嚇走左, 等左好耐再見佢出黎都係用番殺虫水, 噴到佢行都行唔穩, 屍體搵唔到, 應該死左吧! 天啊! 再係咁我俾d小強搞到精神崩潰, 今次發覺原來我唔可以一個人住, 連小小o既小強都把我收復。

唱好克勤

今次係第二次睇克勤o既新城show, 仲記得上次我同姐姐為求一票去大班買左幾百蚊麵包劵呢, 哈! 今次叻左, 係yahoo度bid番黎。 個show成八點九先開始, 十點四個宇就完, 比我上像中短好多, 上次都差唔多十一時完的。

每次睇克勤現場都異常興奮, 鍾意佢10幾年係因為佢穩定o既唱功, 今晚更有幾首特別激情, 聽得我血脈沸騰。 一開場克勤已經話會唱D冷門歌, 令我地非常興奮, 因為果D大路歌我地已經聽厭, 同埋佢有好多唔HIT o既滄海遺珠, 我相信克勤揀歌o既taste同我地呢d忠實fans非常接近。 整晚分為幾part, 有克勤自選冷門歌, 佢學生時代聽的歌, 嘉賓同演奏廳o既歌。 嘉賓方面有王苑芝, 張敬軒同小剛, 三個都係實力派, 其中王苑芝同小剛都有同克勤作過歌呢!

當演唱會完時, 克勤俾司儀叫番出黎encore, 佢個樣好似真係無咩準備同埋有d不滿咁, 到唱完一首後準備返後台又俾司儀走出黎截住, 果一刻我好sure佢係好勉強同埋黑面的, 但都唱多一首超冷門歌, 其實呢首歌真係我地呢d支持左好耐o既fans先會識。 總之整個encore部份佢都係黑面中完成, 真係好少見佢咁, 等我o係歌迷會度八下咩事先, 同埋我硬係覺得佢last一首歌係唱給我們的長期支持者聽, 以示佢對尋晚有唔少人提早離場o既不滿!

RUNDOWN :
1) 命運符號(小冷門)
2) MY SHIRELY (中冷門)
3) 前後腳
4) 吻別的位置
5) 愛不釋手(激情之作)
6) 愛可以問誰(克勤+小剛)
7) 陌上歸人
8) 夜半輕私語
9) 殘夢
10) 似夢迷離
11) 倩影
12) 喝采
13) 情比紙薄(王苑芝作的新歌)
14) Here I Am (克勤+王苑芝+張敬軒)
15) All Out Of Love (克勤+王苑芝+張敬軒)
16) 詩情(王苑芝)
17) 老了十歲(張敬軒)
18) 情非首爾
19) 婚前的女人
20) 十年前後(演唱會第一次唱, 個人超鍾意)
21) 天水圍城
22) VICTORY
23) 我不會唱歌(ENCORE)
24) 寂寞煙雨天(超級大冷門歌, 正!　我竟然仲識唱)

Blog tag terrorism!!

被mill mill tag了, 即管玩下吧!

1.OS為?
Windows XP
2.這台是你的個人電腦？
屋企架, 公司果個仲亂
3.這張桌布是什麼? 從哪裡取得的?
我最愛的雲佬
唔記得邊度搵番黎喇
4.更換桌布的頻率高嗎?
唔多, 鍾意就換
5.桌面上有幾多個ICON?
18個﹗
6.一堆檔案和捷徑放得亂七八糟的桌面，你看得下去嗎?
得, 無所謂, 唔好遮住我雲佬個靚仔樣就得
7.沒有什麼堅持點?
靚仔, 要係我鍾意o既人
8.有為了填這份接力, 還特地整理一下嗎?
無呀, 無咩野唔見得人
9.後請再傳給5個「我想看看他的桌面」的人。
無喎, 我個blog無link人, 算啦, 哈!

窮

本來呢個月水頭都頗為充足, 點知有一晚收到舊同事來電說要錢救命, 仲要我即時過錢, 果陣已經接近晚上12點, 我家附近無銀行又無提款機, 要落地鐵站呢, 痴線! 但我第二日都係過左數俾佢, 過左一星期佢音訊全無, 我以為佢會好快還俾我, 搞到我而家得番幾舊水, 點捱到月尾呢? 其餘錢都俾定期定死了, 而家唯有節衣縮食, 好似玩緊慳錢遊戲節目咁。 其實我已經唔止一次借錢俾朋友搞到自己窮到燶, 千其唔可以俾媽媽知, 佢一定哦爆我呢! 天啊! 快d出糧啦!

八婆飛走了, yeah!

呢個星期應該係我近年最開心的一週, 因為八婆連同老細二奶等人一齊飛左去德國睇fair, 雖然交低好多工作, 但我依然做得開心, 因為唔洗聽到個八婆把聲, 唔洗聽佢d朝令夕改o既instruction, 最好佢留o係德國唔好番黎, 呵呵....

不過有一個大陸妹我好鄧佢唔抵, 佢係成班sales最老資格o既一個, 同我一樣做左有5年, 呢d大大小小o既trip老細都唔會預佢, 新來o既反而有份, 佢俾人覺得幾被忽略架, 枉佢平日都幾為公司著想, 一個幾毫都同公司慳, 唔似得我呢d專倒米, 成日俾船公司收多錢。 最衰同佢唔熟, 亦唔算得朋友, 唔係我一早勸左佢走了, 成間公司都係二奶o既心腹, 只有佢一個係外人, 人地緊係排擠佢啦, anyway, 我呢個星期要好好enjoy!

腹背受敵

我而家o係呢間公司的確令我有呢個感覺, 人地唔講我都唔知, 原來成日同我撐果個八婆已經將我個背脊插到花哂, 奇怪老細仲未同我對話, 睇黎佢功力未夠, 哈!

自問對少爺唔差, 遲到早退, 無啦啦可以粒聲唔出走左去成個禮拜, 咩都無交低, 竟然去左打籃球同陪女友, 我一句都無話過佢, 同佢補唔少鑊執唔少蘇州屎, 而家個八婆插我佢竟然企個八婆果邊? 佢究竟有無良心? 得! 佢唔使指意我過o野俾佢, d鑊自己咩番!

好耐之前朋友話我係公司o既弱勢社群, 我而家深深體會到, 有理無理都唔會有人企我果邊, 因為佢地全部係大陸人, 槍口一致對外, 夠哂團結, 我有道理有如何? 我已經講到明"我爛命一條, 咩都唔怕, 最多唔做",
但最痛恨人地耍陰招, 八婆有本事同我死過!

生小孩

今日同一個舊同事閒話家常, 佢係兩個女兒o既媽媽, 同佢傾開大女讀書的事。 會考成績唔好, 唔想repeat中六又唔收, 無得揀之下報左毅進, 都要二萬幾一年。 我提議何不選IVE, 我以為同我當年讀o既T.I.差唔多吧, 原來IVE已經變左4年制, 總共需要6萬多元學費, 佢負擔不來, 睇下我OUT成咁, 完全唔知香港教育制度已經有咁大轉變, 仲停留o係我當年個時代。

一路傾著, 我都身同感受(果一刻覺得好似我都有小孩似的, 哈!), 做媽媽責任實在太多, 太多野要擔心, 細個驚佢唔大, 大又驚佢壞, 而家讀書又要擔心。 見到公司的一男一女真係嚴重打擊我原來想生BB o既欲望, 少爺仔讀書唔成, 老豆大把錢人地都唔收, 唔知佢衰左d咩番黎, 想幫老豆打理公司又學得一塌糊塗, 一事無成。 另一個女仔睇著佢阿媽份上我先請佢, 又係去外國讀左一年書俾人搞大個肚番香港, 而家22歲有個3歲o既女, 做野玩玩下, 遲到早退, 無責任感, 女都係阿媽湊, 仲多節目過我。 見到呢對金童玉女我有幻想過如果我將來有細路是但一個似佢地, 我會選擇我跳樓死先, 無眼睇費事眼冤, 另一方面我對佢地父母深表同情, 所以生BB都係詳細諗過先, 要有咁大接受能力先好生呀!

睇波活動

星期日同一大班曼聯fans去灣仔o既手臂吧睇曼聯英超揭幕戰, 曼聯大勝富咸5比1固然開心, 睇波現場氣氛之強烈令我異常興奮, 我坐近阿ben同史塔, 成晚俾佢地笑到我喉嚨都痛埋, 一入波互相give me five一番, 中場各人興奮到四圍影相, 阿ben強到單手交叉揸機, 笑死我地呢!

講番場波, 曼聯終於用番多年無o既兩翼出波, 效果奇佳, 20分鐘已經入4球, 當然富咸後防之鬆散亦都係我地始料不及。 我同SY都覺得呢個勝仗來得太易, 不宜開心得太早, 可能係虛火, 下場無左朗尼同史高斯, 變數太多。 最好笑比賽後段, C朗開始浪射夾無準, 有人大叫"C朗番來了"

墾丁

近日覺得有需要又叉一叉電, 仲有四日大假加埋資金有限, 可以選擇o既地方唔多, 日本又貴, 泰國剛去過, 台北今年去過而且第三次了, 腦海浮現左台南, 去過台灣數次都係台北, 係時候換下地點了, 又平又近又可以溝通, 台灣確係個唔錯o既目的地!

於是上網搵下資料, 機票唔太貴, 不過去台南o既airline不出三間, 無理由由台北再轉火車嘛, 好迂迴呢! 其後發現墾丁就係傳聞中o既渡假勝地, 雖然我唔識游水, 但睇到水清沙幼o既海灘真係正到暈, 仲有好多好靚又便宜o既民宿, 看起來似高級渡假屋呢, 平均都係二百零三百蚊港幣一晚, 好抵哦! 現初步打算高雄兩晚墾丁兩晚咁玩, 睇睇朋友d假點安排, 希望成事啦!

龍虎門

一路都好期待呢套戲, 因為好鍾意甄子丹, 上左幾個星期終於呢個星期日的起心肝睇, 早場果然好抵, 30蚊咋, 但好多人, 要坐第二行, 第一行都有人坐呢!

因為我未睇過原著漫畫, 所以覺得好好睇, 甄子丹真係無令我失望, 打上黎完全無走樣, 果然係我兒時偶像, 連唔識打o既檸檬同余文樂睇上黎都有板有眼, 好期待第二集呀, 快d拍啦!

生病後記

腸胃好左d, 但間唔中都有痾, 可能變敏感了, 反而大傷風又重左, 真係弱雞。

生病期間真覺得父母將我照顧得太好了, 令我覺得自己似溫室小花。 媽媽每天服侍我三餐, 陪我睇醫生, 提我吃藥, 我訓覺發燒時爸爸一晚探我額頭幾次, 發冷發熱焗到一身汗佢又用毛巾同我抹汗, 怕我又冷親。 我生病時真係變得很"pair", 沒有了他們我更辛苦了, 雖然平日時常嫌佢地囉唆, 佢地o既關懷令我害怕自己變成依賴, 我要令自己變得獨立呢, 不要再讓我生病了!

生病了

好耐無病得咁嚴重, 一共病左四天, 請左兩日病假, 病發經過:

22/7(星期六)
已經覺得近排胃口很差, 胃好唔舒服, 以為係飲左幾枝stephy賣廣告o既減肥茶啦。 早上考完入境處o既試相約朋友打馬吊, 食飯期間只係草草幾口, 實在食唔落, 與我平日大胃王很大分別, 加上輸牌人更不適了。 (P.S.贏我錢果D唔該負責任)

23/7(星期日)
早上同朋友回公司搞D o野, 之後去左銀城上面果間大熊本食lunch, 呢間我地一向食開都無問題, 朋友食了牛肉炒烏冬, 我食了海鮮拉麵, 食飯途中我胃已經很唔妥, 可能又係胃抽筋吧, 我之前都試過, 我已經一邊吃一邊按住胃部, 仲有d冒汗。 之後行左一陣街朋友就覺得肚痛要返回我公司廁所排洩, 我就未有異樣, 只是胃愈來愈痛, 人愈行愈慢, 一齊回公司休息一下.....返到屋企抖左一陣已經夜晚, 父母都出左街, 胃愈來愈唔舒服, 終於嘔左出黎, 把中午o既拉麵都嘔埋, 我先驚覺食物袋o係胃裡面八小時都無消化過更無落格, 完完本本咁吐番出黎, 我個胃廢左武功了嗎? 如是者整晚都又食又嘔, 飲一杯水又嘔, 食一塊餅又嘔, 食粒胃藥都嘔, 個胃完全不能運作, 於是我都放棄了, 等明天有醫生睇先啦!

24/7(星期一)
一早去睇醫生, 醫生都俾我很青o既面色嚇了一跳(當然啦, 兩日食唔到o野), 即刻幫我打止嘔針, 手勢認真麻麻, 針口幾天仲痛緊, 醫生仲信心滿滿話兩天藥不用回去找佢喎。 止左嘔即刻去搵粥食, 不過人仲係太攰, 有d發軟蹄, 於是請左一日病假好好休息。

25/7(星期二)
人雖然仲係攰, 不過唔好意思請咁多日還是硬住頭皮返公司睇下有咩手尾執, 返到去都係做下訓下又一日。 夜晚番去屋企痾左好多次, 因為無咩食過所以都係痾水, 止完嘔又黎痾, 唔係掛! 如是者痾左五六次, 腳都軟埋。 半夜仲發覺自己發燒添, 開行冷氣都出哂汗, 又痾又發燒真係難頂, 不過點都要頂到朝早先有醫生睇啦。

26/7(星期三)
一早又去搵醫生, 佢都好不解我點解仲未好番, 話我呢個病普通人痾兩次就好, 估唔到我抵抗力咁差, 醫生你真係太低估我了, 於是佢今劑落重藥。 經過尋晚一晚折騰我實在唔想返工, 但媽媽話唔好再請咁多假, 要我無論如何都要返一返去, 於是我都拖住沉重o既步伐"冷"返公司。 返到公司少爺見到我面如白紙o既面色都催我早d回去休息, 所以我執埋少少手尾又折返喇。 返到屋企食兩次藥開始大昏迷。

27/7(星期四)
多番轉折病情終於好轉, 可以正式番工, 雖然仲未可以食好多o野, 胃都未完全舒服, 打算食完d西藥再睇中醫調理, 願自己早日康復!

呢次病我find out左幾個可能性, 一.果隻減茶削胃令我個胃唔舒服? 二.打麻雀輸錢激親我? 三.大熊本d食物有問題?

更Down

持續幾日o既低氣壓仲未過去, 似乎有愈來愈嚴重o既跡象。 不為外人道o既原因令我好幾日都好down, 講左都無人會了解, 所以唔想講o野, 唔想見人, 只有靠自己慢慢調適過黎, 希望快d過啦!

失去左d o野令我有強烈o既失落感, 幾時會返來好似以前一樣呢?

又想去旅行

跟黑面公主初步打算下年或者會去意大利, 呢期無聊就四圍睇下資料, 越睇越想去, 意大利真係好靚。 羅馬, 米蘭, 威尼斯, 佛羅倫斯....通通都好吸引, 假如幾隊意甲球隊降班的話我地又可以買平飛就睇到AC, 祖記等隊, 哈哈! 又想睇下意大利仔仔係咪如人地所講, 乞兒都靚仔過人, 引死人喇! 快D有飛訂, 快D到下年, 我都要努力儲錢先!

施丹不遺憾

看到各大報章都說一代球王點點遺憾, 真係睇唔過眼, 佢有咩咁遺憾? 世界盃, 歐洲國家盃, 各樣足球先生應得的唔應得的佢都贏過, 要說遺憾排隊都未到佢, 尼維特, 碧咸等人比佢更遺憾, 首選最該遺憾緊係巴治奧啦!

非常高興意大利贏得世盃, 遲了12年的世界盃, 把巴治奧屈了12年o既烏氣一併吐埋。 意大行係我隨英格蘭之後最喜歡o既球隊, 人腳唔差偏偏成日差最後一步, 今屆有埋納比如虎添翼, 假波醜聞反成佢地推動力。 從小睇意甲就非常鍾意祖記, 有維埃里, 拉雲拿利, 迪甘斯年代最好睇, 當然仲有神奇小馬尾-巴治奧啦!

永遠忘不了94世界盃, 係巴治奧一手把意大利帶入決賽, 射12碼時巴里斯同馬沙路分別特失, 到巴治奧都射失時點解全世界都要話佢係罪人? 有無天理架, 射失又唔止佢一個, 唔係巴治奧佢地可以踢到呢個階段? 好! 到98世界盃, 8強對法國又係射12碼, 今次自己入左但迪比亞治奧射失, 再次與世界盃無緣。 自呢兩役巴西同法國都係我o既敵人, 係佢令巴治奧遺憾的。 02更加唔洗講, 死老o野查柏東尼力排眾議唔選狀態大勇o既巴治奧入隊, 終於咪踢到pet屎咁。 巴治奧的世界盃之路充滿遺憾, 施丹邊夠佢比呀?

期望C朗離隊

老實說我不喜歡C朗並不是一朝一夕的事, 更不因為朗尼事件, 如其說朗尼覺得被出賣我沒有太激動, 如果C朗為求勝而說服球証令朗尼出場, 是可以理解的, 只怪朗尼EQ太低俾位人地入, 其實我嬲球証多D呢, 朗尼好早就被兩個葡萄牙球員侵犯球証都無任何表示, 待朗尼忍耐到極限(當然佢個極限比一般人低), 球証才把握機會一舉趕朗尼出場, C朗並不需要負太多責任, 當然佢o既多口係令朗尼更燥。

我討厭C朗係因為我感到自從佢黎到曼聯就破壞左球隊一向team work o既打法, 佢祟尚個人主義, 經常一個人帶波推進, 死扭爛扭, 而且經常扭失, 扭唔過就跌, 跌低又俾人打反擊, 過往唔少輸波都係因為佢扭失波而起。 而佢獨食o既打法都令隊友怨聲載道, 當幾個隊友一起follow進攻時經常無哂下文, 走下走落只是 "陪著佢走" 而已.....加利仔, 史密夫, 雲佬等人都就佢呢個獨食打法出現過拗撓, 仲唔係佢問題?

雖然有說C朗走只會減了弱曼聯實力, 但我並不認同, 佢罰球又唔中, 射波命中率又唔係高, 搵一個番黎代替佢有幾難呢, 況且我真係好想重見曼聯遺失多時o既流暢進攻呀! even朴智星o係我心目中都好過佢, 雖然佢個人技術比C朗差, 唔識插花唔夠悅目, 但就係夠實際呀, 要俾隊友o既波佢都俾到, 就係咁簡單, 但C朗都做唔到呢, 所以我真係好期望C朗走人, 離開唔屬於佢o既世界吧!

好Down

我的界世盃已經完結, 天妒英格蘭, 天妒朗尼, 天妒碧咸, 見到英格蘭球員痛哭個樣令我成晚訓唔著。 卑鄙的葡萄牙人, 昏庸的球証, 促成英格蘭再一次成為慘劇主角。 荷蘭球員一早remind英格蘭, 葡萄牙最叻係煽動球証, 都係中計。 呢場比賽又再証明打得好都會輸, 夏格維斯最令我感動, 當全場人都跑不動時佢仲要走上走落, 12碼又入埋, 要做都做哂就係得唔到應得o既回報, 呢個係咩世界?

碧咸更可憐, 睇佢10幾年波未見過佢喊, 好慘好慘.....自己傷心之餘仲要安慰隊友, 佢係點做到呢? 雖然佢resign唔做隊長, 但我極度支持佢呢個決定, 佢永遠o係我心目中最強最勇敢的隊長。

而家唯有希望意大利奪冠, 葡萄牙受報應慘敗, C朗盡快離開曼聯。

兩個英雄

碧咸
o係英格蘭對厄瓜多爾比賽中, 碧咸再一次打出身價叫批評者收口, 由世界盃未開始到而家佢一直俾人批評, 面對泰利的謀朝奪位(他說自己比碧咸更適宜做隊長), 種種不利因素令碧咸幾場賽事都眉頭深鎖, 樣子異常嚴肅。 終於o係呢場再見佢燦爛o既笑容, 一個靚罰球把英格蘭帶入八強, 一吐烏氣! 雖然外間諸多批評, 但我依然撐佢的, 佢為球隊盡心盡力, 比賽途中一度脫水, 嘔左兩次, o係身體不適情況下射出靚絕罰球, 令我好感動呢! 雖然英格蘭仍然未打出應有水準, 但碧咸已經做哂佢要做的事, 準繩o既助攻, 妙絕o既罰球幫英格蘭贏完一場又一場, 可惜仍未得到大家的肯定尊重, 唔該其他踢到一pet屎o既隊友生生性性吧, 不要讓碧咸成為代罪羔羊。

托迪
因為上屆歐洲國家盃佢令意大利出局, 所以我本身對佢印象麻麻, 但經過澳洲一役對佢完全改觀。 o係完場前射一個定球隊生死o既十二碼唔係人人心理質素可以承擔的, 你睇列基美歐聯果球就知。 射果刻我地旁邊睇都心臟病發, 佢點調適過來呢? 我相信問勻全隊都無人願意接下呢個任務吧，　入就英雄，　唔係就狗熊。 我到而家都記得佢超藍o既眼睛, 堅定o既眼神望向龍門, 皮球直飛死角, 我high得亂叫亂跳, 為王子o既勇氣歡呼, 王子果然係王子!

看不清

今日番工途中已經覺得對眼唔太舒服, 到公司情況都係咁, 不停流眼水, 都唔係辦法, 於是落街買con水將眼鏡除低。 以我500度o既近視, 除下con又無眼鏡的確同盲差無幾, 做野唔方便, 出街都唔敢, 怕俾車車。 突然諗有時睇唔清都幾好, 做人蒙蒙查查會比較開心吧! N年前一個眼鏡廣告"看出一點真看出可觀人生", 是嗎? 呢一刻我唔太認同, 有時看真好殘酷的, 由我地混過去啦!

PS. 而家呢篇日記係我聞電腦打來的, 哈!

英格蘭，唉......

雖然英格蘭如願首名出線避開德國, 但前景依然令人擔心。 奧雲黑過墨斗, 開賽一分鐘即傷, 仲要長抖果隻, 換入最唔想見到o既高治, 打後賽事只剩3個前鋒, 仲要得一個叫有d質素, 有咩差池大力臣選人絕對好錯, 責無旁貸。

中場出番個正防中夏格維斯令林伯即刻生番, 雖然不嬲對此子無乜好感, 後防面對唔算高班o既瑞典都失兩球, 唔係有運分分鐘香埋。 李奧傷出(唔肯定係唔係), 換入十世無出場的蘇金寶刺激我地心臟, 久疏戰陣, 位置感全無, 真係咁無人可以出? 肥仔出番改變戰術, 碧咸隨之少左斬波, 都唔知是福是禍, 有球迷唔滿意佢經常斬波浪費林伯同謝拉的組織能力, 偏偏之前贏果兩場都係靠佢準確的斬波先入到波, 真係唔知邊樣先o岩。

尋晚可見朗尼求勝心切, 但剛剛傷癒無態實屬正常, 眼見瑞典大有反勝之勢, 換人的確必要, 見佢發脾氣o既臭檔樣, 頓時一d都唔可愛了, 再係咁落去英格蘭對厄瓜多爾都未必贏到, 唉.....

南韓好波！

呢期全程投入世界盃, 遊記都係由佢把啦, 哈！

打左咁耐都係第一次出手買波, 終於有d心水, 就係我幾鍾意o既南韓, 串日本對克羅地亞細, 再串巴西讓澳洲一球, 中哂! 少少地收番二百零蚊。 錢事少, 最開心係星星同射和我至憎的法國, 最好因為呢腳令佢地出局啦!

另外最愛o既英格蘭經過兩場表現都未令人滿意, 高洛治o既正選令英格蘭變成溫布頓, 一味高Q大棍去頂, 我真係頂佢喇! 明明有質素可以踢出好D O既波, 大力臣做乜搞到佢咁cheap, 高洛治o既質素跟本唔值國家隊一席位, 佢d把握能力低得嚇人, 林伯又打唔出車仔一半水準, 謝拉特太後浪費哂佢個能力, 而家全部希望落哂肥仔身上, 大力臣唔好再玩o野喇, 唔好累左近年人腳最好o既英格蘭!

曼谷之行(二)

第二朝可以訓到九點呢, 因為佢早餐食到十點, 真係少有, 就哂我地呢D懶人, 呵呵! 食完早餐我同朋友分頭行事, 佢去暹道暹跳蚤市場, 我去行大商場EMPORIUM, 因為暹道暹只開星期六日, 朋友只剩呢日星期日o既機會喇。 但經過尋晚熱死人o既夜市, 我怕怕了, 真係熱到底褲都濕埋架, 我都係寧願行下mall好過。 三小時候meet番, 各自都收獲唔少, 佢買左好多tee, 我買左一條levis, 幾個wacoal baba, 一d得意但唔太有用o既精品, 全部都比香港平好多呀!

之後本來打算去一度買運動衫如nike, umbro, addidas o既outlet, 點知搵左好耐都唔見就放棄左, 就行左一陣Robinson, 又係mall黎架, 不過唔太大, d o野都幾平, 買左d朋友推薦泰國自己出o既護膚品叫Oriental Princess, 我未用過朋友話唔錯啦。 行行下又見到levis, 撞鬼了, 款有d唔同, 同今朝果間又唔同喎, 於是又買左一條。 行行下又見wacoal做特價, 忍唔住又買左兩件.....

Shopping完畢趕住番去食buffet, 係導遊同我地book的, 原價1000泰幣, 佢book就700, o係全bangkok最高o既酒店+餐廳, 食o野之餘連同室外旋轉睇夜景, 都好抵啦。 食物種類好多, 好多海鮮, 不過我食海鮮咀刁程度, 一d都唔合格浪費哂d材料添。 其他日, 泰, 中菜都ok啦, 仲有我最愛o既蛋糕食左一大碟, 飽到上喉嚨, 哈!

食完buffet上76樓睇夜景, 好大風好舒服哦, 全曼谷夜景一次睇哂, 由於相機質素有限, 影出黎效果麻麻。 之後同團友去一間類似家樂福叫BIG C o既super market買o野, 裡面d o野又多又平, 不過我多數都係買食物啦, 平日食開o既萬樂珠都只係hkd 4蚊一大包, 真係平到你唔信, 我係咁易執左少少啦, 我朋友好似做批發咁什麼都買, 買到要即時買多兩個旅行袋裝呢。 超市裡面見到我最愛o既雲佬, 好想撻番hk呢, 影低佢都好, 個執貨完用奇怪o既眼光望住我, 哈! 理得佢, 佢又唔識我o既 ,買完就番酒店, 又完成一天行程。

曼谷之行(一)

出發當日極之狼狽, 傾盤大雨, 擔遮之餘又要追車, 追車時拉住個o急又反轉左, 突然大力臣上身, 單手揪起個o急就衝上車, 好在司機好人等埋, 唔係成個巴士站d人望住又上唔到車真係瘀爆。

到機場比原定時間慢左半個鐘, 原來我地YO-TOUR要同旅行團一齊出發, 聽完導遊一論令人眼訓的廢話就各自過關搭華航飛往曼谷。 到左曼谷, 果邊D海關真係唔掂, 要等成九個字呀! 出左關旅行團同我地分道揚鑣, 而我地都有導遊帶我地遊半日o既行程, 先到酒店放低行李再出發。

第一站遊眉南河連晚餐buffet, 食完仲可以上上層聽live band, 有個女歌手唱出好多大家耳熟能詳的老歌, 佢好識帶動氣氛, 拉出好多人合唱同跳舞, 好熱鬧呢! 之後就去左曼谷最大o既夜市 SUAN LUM BRAZZA, 有o野食, 有bar, 摩天輪, 好多o野買, 但實在太熱無太耐心去行, 只用左400泰幣買左對涼鞋。 跟住就帶我地去拜四面佛, 由於我同朋友都唔需要拜, 於是就去左附近有三層高o既HAAGEN-DAZS食雪糕打發時間, 上層仲有live band唱英文歌呢, 好有feel。 之後就番酒店, 酒店屬於四星級, 房間夠哂大俾我地放戰利品, 雖然唔係好靚, 但可以接受啦!

外遊數天

又係時候獎勵自己，我有壓力，於是外遊幾日，希望玩得開心，滿載而歸，番黎再詳談

壞心情

近日o既壞情緒同煩忙o既工作令我遲遲提唔起情緒寫日記, 連我最愛o既旅行都提唔起勁, 壞事發生如下 :
1) 雲佬俾費sir逼走, 曼聯前途生死未卜, 令我懷疑會唔會再喜歡呢隊球隊
2) 工作量多又煩, 經常OT, 脾氣日差, 經常同大陸D八婆起衝突
3) 外婆的病愈來愈嚴重, 預備要入老人院了
4) 由於經常OT, 連我買了旅行的書都無時間睇, 月底的旅行行程仍未有眉目, 俾朋友催促了
5) 投資連環失利, 股票, 外幣通通受挫, 未能甩手, 手頭資金買少見少

Yeah! 成團喇!

同朋友o係MSN中傾下傾下就達成左旅行協議, 過程都唔洗5分鐘, 哈! 原本我打算一個人去韓國shopping的, 但朋友提議不如泰國啦, 佢未去過, 而且我都想去, 但基於有d雜唔太適宜一個人去而作擺。 兩個地方都o係2000年時去過, 所以都六年未去過了, 朋友提出泰國我當然無問題啦, d野又平d, why not?

於是第二日就急不及待去旅行社搵料, 拎住成疊資料真係有d唔知點好, 因為我地實在唔熟邊間酒店好唔好, 但聽聞某幾間又好猛鬼的, 有d cheap line搭d cheap酒店真係好平呀, 1千2百幾有交易, 但我地又驚, 終於o係銀行中心騰左好耐。 後來有朋友叫我地睇下康泰新出o既Yo tour啦, 佢係有導遊o既package但又唔洗俾導遊費, 兼且行程又可以自己安排, 而且酒店又一定唔會係好cheap的, 於是就決定左俾埋錢了, 雖然比出面d package貴d, 但都比較安全吧! 離旅程仲有3星期時間, 要著手plan喇, 十分期待呢, 又可以出發喇, yeah!

God Bless Rooney

唉....真係咩心機都無哂, 好擔心肥仔踢唔到世界盃呀! 全世界都想睇佢show quali, 點知俾個保羅廢拉柴搞掂左, 而家仲未有report, 急死人呢!

呢場波輸我都接受到, 因為真係打得差, 曼聯一日仲靠呢三寶(C朗, 施維斯達, 沙夏), 到費SIR死果日都唔使指意有咩大盃贏。 見到肥仔倒地, 攬住隻腳個痛苦樣真係好心痛, 從來未見過佢咁, 痛到狂叫, 面容扭曲, 典左好耐都起唔到身, 個情形就似史密夫對利記斷腳咁, 非常驚嚇, 痛到我都好似感受到, 有D眼濕濕呢! 從電視都可以睇到肥仔想喊個樣, 真係好想安慰佢(雖然現場都好多人做左)

呢場波輸係好架, 起碼見哂D弱點, 針對下屆買人, 但輸還輸唔好人有事, 朗尼係英格蘭今屆世界o既希望, 佢傷左邊個都無著數, 要入10球俾你囉, 唔好咁對我地可愛的肥仔。 經過呢場, 我以後以葡萄牙為敵, 摩連奴, 保羅廢拉柴, C朗我全部都唔想見到, 祝佢地世盃早日出局!

我又想去旅行呀!

tikman終於完成兩星期傑斯之旅, 有好多手信俾我, 真係多謝哂, 最正當然係簽左好多曼聯球員簽名o既生日卡(有最愛雲佬, 費sir, 星星, 布朗, 費查, 奧沙, 李奧, 雲達沙...)真醒目無同我簽上沙夏的, 我會表起佢架, 可惜我同佢都一樣簽唔到肥仔的呢!

聽住佢地行程o既點點滴滴, 真係恨死我, 我果陣太趕, 唔夠時間去埋卡靈頓, 但卡靈頓真係一個近距離接觸球員o既好地方, 睇到佢地好nice的一面, 令我地更喜愛佢地呢! 你地話兩年內會再去一次, 如果係真今次我會join架, 一齊顛, 相信會嚇怕d球員吧, 呵呵!

見佢地咁開心又撩起我條旅行癮, 好似好耐無出過門了, 願望太多, 錢同假太少, 想去o既地方個list水蛇春咁長, 首選大阪, 土耳其, 杜拜, 澳洲, 南非, 荷蘭, 捷克...........

澳門兩天遊

easter相約舊同事去馬交玩一趟, 已經幾年無去過了, 連金沙賭場都未去過。 一去到已經夜晚, 先去朋友賭開的架步, 假日娛樂場玩百家樂, 我一d都唔識玩, 我朋友滿有信心的說我地今次的洗費就係由呢度黎。 佢有二萬元本, 不消3個字已經贏左萬餘元, 跟住我坐低睇佢玩, 佢叫我俾一千蚊佢幫我贏, 真係同我贏左二千蚊呢, total佢贏左一萬七千元, 大豐收, 但佢話今次已經算少了。 真的好佩服佢d技術同運氣, 連派牌的荷官都讚佢厲害, 唔洗半個鐘我地已經贏夠收手食飯了。

果晚我地住平日好平的財神酒店, 由於假日, 都要一千二百玩一晚呢。 第二日去左氹仔玩小型賽車, 好好玩好刺激, 其實都幾快架, 個軚又震又大力, 絕對唔可以單手揸, 而且車太輕好易甩尾呢! 玩完後坐的士, 的士佬同我地講尋日車場先死了一個港客, 嚇得我地呀! 其實澳門景點唔太多, 第二日行多一陣已經無野行, 坐4點幾的船返香港了, 我仲第一次用e道過關呢!

雛菊

期待已久o既一套電影, 由上年已經知道開始拍到easter終於上映, 於是第一時間去睇, 令我咁期待原因有 :
1) 劉偉強少有的愛情片
2) 男主角鄭宇盛好正
3) 全片荷蘭拍攝, 靚人靚景
4) 劇情浪漫淒美

看後都無失望, 一如所料拍得好靚, 劇情都夠浪漫有感人位, 我俾男主角埋o係心底o既愛深深感動, 一如戲名, 雛菊花語就係心底的愛。鄭宇盛依然靚仔有型, 唯一美中不足全智賢嚴重走樣, 戲中經常出現雙下巴而且很多雀班, 跟野蠻女友時代真係差好遠!

新手機

話說我部nokia3230有少少壞, 但問題不大，襯佢未過保養於是拎去nokia整啦, 排左半粒鐘先到我, 佢竟然話我無單唔同我整, 激到我扎扎跳。 人地sony ericsson唔洗單一check你機身no.已經知同唔同你整, 部機買左大半年, 鬼知張單去左邊, 於是我好勞氣咁問而家即係行機壞左都無得整啦? 個條友都唔太友善死都話要單先整得, 好! 激得我嬲嬲地, 以後都唔用nokia d機, 枉係我佢fans, 前後買左4次佢d機。

帶住憤怒o既心情經過smartone, 見佢有隻sharp機做promote, SX313, 不嬲都好想用sharp d機, 貪佢個mon色夠靚, 呢部又有3G, 雖然已經出左一陣子, 但幾抵玩我又唔想用nokia情況下就買左了。 哼! 我好記仇架, nokia-你好野! 即刻轉用sharp, 哈!

又一新玩具

忍左佢個幾月, 終於o係呢期糧購入呢個收腰帶, 哈哈! 日日都見佢個廣告, 周街都係, 真係引死我, 考慮一排始終都買左, 盛惠1380元, 呢個月買大左又要節衣縮食喇。 希望呢個腰帶可以幫我減去跟左我好多年o既三個月身紀啦, 唔得我去拆郭羨妮個招牌, 哼!

YEAH! 終於拆箍喇!

今日超開心, 經過一年半時間o既折磨, 終於拆左個樣衰衰的牙箍, 真係有重生o既感覺呢! 醫生開頭都估要兩年時間, 而家只用左年半就拆得, 算係超額完成。 回想起呢個箍牙經驗真係要好大勇氣架, 對於一向怕牙醫o既我, 要一次過mok 4隻牙, 仲要隻隻都好健康, 為就位而mok, 痛左我好幾日, 訓o係牙醫床上驚到心都跳埋出黎。

開始箍果陣子好唔慣, 又唔太食到野, 順道當減肥囉, 仲要成日聽到, 醫生o係我口腔裡搞架生發出的可怕聲音, 諗番起都好佩服自己, 哈哈! 最傷應該係個荷包吧, 成個工程盛惠二萬五千大元, 足足可以去歐洲幾國一趟了, 真肉痛.....

今日拆果陣真係好緊張, 當護士俾塊鏡我睇自己個樣時, 緊張到覺得自己係一個待整容手術後睇番自己個新面目o既人咁, 比箍果陣還要緊張。 雖然暫時拆左箍, 但仲有d手尾要跟, 要戴個固定器好幾個月, 仲有兩隻智慧牙打橫生, 諗起又要驚過了。

煩

婆婆個怪病令我一家都非常煩, 醫生又話唔開得腦, 話佢係有少少中風, 少少抽筋, 少少腦積水, 即係咩病呀? 個醫生睇落仲細過我, 唔該搵d有經驗d黎同我地講得唔得?

婆婆變得愈來愈怪, 平日都唔鬧人, 一發起顛黎又打人又鬧人, 仲出埋粗口添, 好似變左第二個人, 就黎要送佢去精神科。 連護士都俾佢用好難聽o既說話鬧, 失控到我地探完佢回家途中醫院急call我地番轉頭, 話搞佢唔掂, 唔肯食藥, 唔肯食飯又打人, 真頭痕.....

連平日最孝順的舅父都受不了, 舅父同婆婆一齊住了幾十年, 煮飯買餸照顧周到, 從不嫌疑棄婆婆, 佢都受不了佢的反常行為。 婆婆在家日日下午訓覺, 半夜起身要舅父起身陪佢, 舅父太眼訓起唔到就用棍打醒佢, 晚晚如是, 搞到舅父已經好耐無訓過一晚好覺, 真可憐。 依而家咁壞o既情況, 最有可能都係送佢去老人院, 雖然殘忍左d, 但再咁落去, 死得快d應該係我們全家吧!

婆婆入o左廠

今朝一早俾電話嘈醒, 我地已經有唔好o既預感, 一向o係d非繁忙時間有電話打黎屋企都唔慌有咩好事發生。 果然婆婆一早覺得唔舒服, 由坪洲坐直升機去左醫院, 嚇得媽媽立刻趕去, 我都無mood訓覺了, 真難為了表弟一早5點機跟機去醫院, 我知佢每晚收工都好夜, 都要晚上兩三點至有得抖。

去到醫院婆婆又似無咩事, 又嘈住要出院, 但醫生話要等所有報告出黎先可以走, 所以我地到而家都唔知咩事。 最嚇人的係我地發現婆婆有了老人痴呆症, 佢竟然唔記得自己點解去左醫院, 其實係佢request架, 仲鬧我地仲乜帶佢黎俾人左驗右驗呢! 表面睇婆婆無咩大礙, 反而老人痴呆真的令人擔心, 佢平日唔太行動更唔洗提打麻雀了。

可惜我是山羊座

近期愈來愈討厭自己, 討厭自己點解係山羊座, 有齊了典型山羊座o既缺點, 我最憎就係自己的「船頭驚鬼，船尾驚賊」, 不得不承認我的確時常係咁, 因此成日錯失機會, 長年都改唔到呢個缺點, 點算好?

呢幾日都煩緊轉工問題, 基於我呢個性格令我思前想後左好耐, 走左先搵好唔好呢? 好似好冒險喎! 做住搵d公司又唔肯等咁耐, 因為我肯定我呢度一定唔可以一個月走到, one man band太多野我咩左上身, 交接都有排的。 走左又會唔會新不如舊呢? 但唔走過多兩年市場價值低左, 搵唔到好工真係要o係度做一世喇喎?! 你地睇下, 我幾咁「船頭驚鬼，船尾驚賊」, 諗下又一年諗下又一年。 就係呢d死人山羊座性格令我少左d任性同衝動, 所以有時好羨慕d人可以想做乜就去做架。

除左轉工, 我其他方面都係咁, 太多考慮, 咁樣做人會少左好多刺激, 我發覺只有買o野同旅行係令我唔使考慮。 真係好難改, 只有怪阿媽生我時間不對吧! 所以如果我以後有BB生都要揀個好月份, 唔好俾佢有個討厭的星座, 累左佢一世呢!

無聊一百問

o係朋友日記度見到100個問自己o既問題, 好得意, 我又玩下先 :
1. 一生人以來第一個偶像： 張國榮
2. 希望住怎樣的房子： 村屋
3. 天生是腸胃好的人嘛： 唔係, 我好易肚痾的
4. 覺得自己自私嘛： 絕對係
5. 有邊個人曾經令你希望自己成為佢：曼聯個軍醫, 好多水可以抽, 呵呵!
6. 對香港的感覺： 感覺良好﹗
7. 覺得自己會點死：俾車撞死, 因為我到而家都未識過馬路, 成日俾人boot!
8. 有冇乜野事你好後悔當時做左呢個決定：太多, 買錯件衫我都會後悔的
9. 有冇睇過邊套戲令你久久不能平伏： 太多, 多數都係日劇, 台劇
10. 你覺得你自己係一個偏向思想正面定負面既人：同人講可以好正面, 心底係負面的人
11. 現存最「古老」的記憶： 幼稚園阿爸唔記得幫我著底褲番左成日學
12. 曾經自己一個人做過些甚麼事：旅行
13. 有邊個明星你欣賞佢但係佢稱唔上係你「偶像」：汪明荃
14. 有邊個明星稱得上係你偶像但其實你都唔係覺得佢咩太多野值得你欣賞：太多, 多數靚仔都係, 如 : 陳冠希, 賀軍翔
15. 討厭自己邊D性格 : 猶豫不決, 唔決斷
16. 試過睇咩戲//電視劇睇到喊：魔女之條件, 二千年之戀, 童夢奇緣......太多
17. 喜歡結識新朋友嘛：喜歡, 如果係靚仔更加喜歡
18. 一件最近想擁有的奢侈品：PLASMA一大部
19. 希望退休後有甚麼生活： 環遊世界, 神仙般的生活
20. 對上一樣令你忍唔住講出一聲「好好味」的食物：榴槤pan cake, 豆腐花
21. 小時候對世界有過些甚麼誤會： 以為做大人好開心
22. 首個令你有性幻想既明星：TOM CRUISE
23. 對隆胸有咩感想： 恐怖
24. 好多人都話你唔應該咁做, 但你冇後悔既事：醒唔起
25. 數得出一堆你願意更加珍惜佢地既朋友嗎：當然啦, 太多, 所有好姊妹都係
26. 多唔多人你對佢有過好感但後來感到有D後悔：有, 唔多, 不過都N年前的事
27. 遺傳了家人的甚麼特質：爆牙, 粗眉大眼, 準時
28. 喜歡的遊戲： 緣份遊戲
29. 有冇作過一D令你自豪同回味既決定：有, 離開舊公司
30. 幾時開始清楚自己鍾意男仔定女仔：小學年代
31. 信唔信輪迴轉世： 信
32. 愛情, 友情, 親情, 請排序：親情一定先, 未有愛情唔識排
33. 甚麼讓你最恐懼：妒忌
34. 有冇堅持使用邊d牌子既產品：中華牌鉛筆
35. 有冇邊D朋友你覺得//希望可以同佢熟D, 但實際上又未熟得晒//唔熟：有, 但唔講得
36. 幾歲時第一次鍾意異性 (或同性)：小學六年班
37. 對怎麼的生活有過憧憬：幸福的家庭, 有個好愛我o既老公, 至少兩個BB
38. 較喜歡媽媽還是爸爸： 兩個都喜歡
39. 甚麼讓你感到尷尬：俾人知道我尷尬的時候
40. 用十個字眼來描述的近來既生活：想做又做唔到, 唔知想點
41. 而家諗返轉頭唔明自己點解當事要咁做既事：無
42. 曾經最深愛//敬愛過的三個對象： 最敬愛如下：爸爸, 媽媽, 仲有一個不便透露
43. 在網絡上有甚麼財產(eg. 日記, 網頁…)： 日記
44. 你有冇一D「特異功能」： 我覺得好D第六感幾準架
45. 有冇一個你以為實現到, 但其實唔可以既「夢想」：結婚? 生仔?
46. 喜歡的品牌：曼聯
47. 你願意花時間學習些甚麼東西：揸車
48. 最喜歡看異性的哪些部位： 眼, 身高
49. 你會唔會選擇一腳踏兩船： NOWAY﹗
50. 有冇懷疑過自己既性取向：無, 因為我太愛靚仔
51. 只可以用一個詞語黎形容你自己既性格, 你會用咩詞語：無性格
52. 對上一件由衷感到感動的事：太多, 因為我太易感動
53. 曾經約會過不算熟絡的網友出來見面嘛 : 無d咁o既事
54. 希望死後火化還是怎樣：無所謂, 有仔/女送終就得
55. 最近最煩惱的事是：轉工
56. 有冇一個moment如果你做左另一D決定, 就會大大影響左你既一生, 有的話是甚麼事：cool牙
57. 承上題, 受到呢件事影響, 你估計你既人生有咩唔同 : 阿媽話d牙整齊, 夫妻緣會好d, 幾大影響架
58. 愛過的人中有些甚麼不堪的性格：無, 我鍾意得佢都係好好的
59. 希望將來住o係邊：所有我愛, 愛我o既人都在的地方
60. 有咩事你一遇到就會覺得好噁心 : 咸濕佬
61. 從事過甚麼工作：call centre, sales, shipping
62. 有咩人你好感激佢但唔好意思同佢講：舊公司的變態阿head
63. 有冇曾經俾人偷過乜野：電話
64. 經常講大話嘛：係, 不過都係善意的, 呵!
65. 覺得自己傾向是實際還是不設實際的人：不設實際
66. 最希望睇到邊兩位藝人結成一對：無, 因為自己無我會唔抵得
67. 親友怎樣形容小時候的你：藥煲
68. 算是怕悶的人嘛：係
69. 你算是一個吝惜給予別人讚美的人嘛：唔係
70. 初次接觸電腦係幾時：中三左右
71. 由細到大曾經希望過從事咩職業：房屋署, 因為可以唔洗交租, 其他電費煤氣費都唔夠租貴, 哈!
72. 最有恆心做的一件事：睇哂曼聯所有直播比賽, 無論任何時間
73. 曾經想過加入誰的fans club : 已加入克勤歌迷會
74. 曾經希望過自己出生於邊D國家： 無, 香港已經好好
75. 依賴性強嗎： 以前係, 人愈大變得愈少
76. 數得出三個令人有厭惡感的人嘛： 都係公事上的
77. 有冇同過邊D明星合照： 克勤
78. 有幾多經常提及的香港地方你是從未去過的：流浮山
79. 有冇乜野「古怪」既習慣： 沖左涼就唔想再出街
80. 人生當中暫時有邊D稱得上係轉捩點：年前的大病, 初次感覺自己接近死亡邊緣
81. 父母曾經為你的甚麼而感到自豪：cool牙並mok左4隻牙, 因為我全家都好怕睇牙醫的
82. 有冇乜野經歷到而家仲成日俾長輩提住：著多件衫, 唔好咁夜返
83. 有沒有甚麼東西你的朋友都不喜歡, 只有你一個喜歡： 雲佬
84. 有沒有甚麼東西你的朋友都喜歡, 只有你一個不喜歡： 讀有用的書
85. 有冇邊個地方你去完聲稱以後都唔想再去：工廠
86. 發生甚麼特別事第一個搵的朋友：好多喎, alice, tikman, candy, 陳生, 李小姐.......
87. 有冇特別喜歡邊幾個中文字：靚, 型, 英, 帥
88. 慣於「明戀」定「暗戀」： 都有
89. 印象較深的電影對白：如果人生分愛情, 親情, 友情三部份, 我已擁有三分二, 已經很好了
90. 有冇嘗試過訓練自己的非慣用手：有, 但失敗
91. 想變成另一個性別嘛： 唔想, 但有時又想
92. 印象最深的小學同學：鄭君豪, 佢幫過我抄罰抄
93. o係icq多數用咩mode： away
94. 邊D地方令你有愉快既回憶： 英國, 法國, 馬來西亞, 日本
95. 邊D地方令你有不快既回憶： 法國, 日本, 因為溝通唔到令人發忟
96. 有咩事你一遇到就會有莫名的厭惡感：咸濕佬
97. 數出十樣最喜歡的東西：錢, 靚仔, 曼聯, 睇戲, 聽歌, 唱K, 旅行, 親人, 朋友, 食o野, 訓覺 ......
98. 第一張擁有的CD：當然係克勤的, 唔記得邊張
99. 曾經迷戀過邊D明星：我個人太濫太多, 碧咸, 雲佬.....
100. 最近有咩口頭禪：點解o既? (唔只最近, 由細到大都係呢個)

請對雲佬公平點, 費sir!

雖然尋晚好幸運地贏左韋根, 但呢場勝仗並無令我特別高興, 除左球隊表演唔值得勝出外, 我最喜愛的雲佬受到不公平對待, 令我十分激氣。 上仗聯賽盃決賽雲佬無得落場我還可以理解, 沙夏狀態好, 而且聯賽盃入到決賽佢都有好大功勞, 費sir繼續俾佢踢都無可厚非。 但我眼見雲佬的確好唔開心, 頒獎唔識笑, 全人類在慶祝唯獨唔見佢, 佢亦都係第一個返回更衣室, 更衣室內更加沒有參與慶祝, 身為fans的我都感受到佢o既唔開心。

一星期後聯賽再戰韋根, 雲佬竟然只列後備, 令我憤怒不已, 我少有地o係曼聯先輸一球時竟然發出冷笑, 更爆出一聲 "抵死!", 呢個就係唔用我雲佬的後果, 費sir終於都要向現賽低頭, 即時換入雲佬, 但我一點高興都無, 只期望佢做出佢應做的事, 而佢亦都非常生性做到了一個助攻令球隊扳平, 以行動話俾費sir知唔放佢打正選係錯的, 曼聯還是要靠佢!

我強烈希望費sir唔係如外界所講雲佬已經唔係必然正選, 甚至會賣走佢, 費sir一定會後悔, 正如當年賣走碧咸令球隊成績幾年來不斷下滑至今, 更慘的係苦無接班人, 加入的球員更加一蟹不如一蟹。 o係咁差勁o既中場線之下, 雲佬仲有咁好o既入球率, 大有機會成為英超神射手, 我實在想唔出費sir點解要咁對雲佬, 身為一個前鋒佢所做已經交足貨有如餘, 咁都未令人滿意, 咁o既表演都要淪為後備, 那費sir請你高抬貴手放雲佬一條生路吧, 佢值得有更好o既發展, 更多o既獎項, 同埋更多o既尊重, 我亦都會一直支持佢的!

年齡不是問題?

呢個星期參加左今年第一個婚宴, 我地係受女家邀請, 關係都好密切, 女孩o既媽媽同我媽於我地未出世前已經係姊妹, 即係所謂做女時已是好朋友, 識左廿幾三十年, 兩家都好熟絡, 理所當然我們幾姊妹同佢地幾兄妹都係由細玩到大, 算是青梅竹馬吧!

今次結婚反而係最細的妹妹, 佢一向都叫我姐姐的, 而果晚我都係第一次見新郎哥, 佢介紹我俾佢老公識時, 用表姐來稱呼我, 哄得我非常開心, 因為我開頭都懷疑佢會點介紹我呢! 話說回來都無錯, 因為佢一向都叫我媽做姨媽, 那我係表姐都無錯吧! 呢場婚宴個重點就係新郎了, 妹妹只得24歲, 但新郎已經50歲, 足足一倍有多, 開頭未見個男人我都以為係一個大叔, 但事實並不是, 真的是一個很成熟但不至於大叔型, 個樣有d似伍詠薇個老公練海棠, 想像得到嗎?

但我爸媽直到回家都一路嘆息, 一個小女孩點會嫁個大咁多o既男人呢? 往後問題會好多的, 過多幾年個男人退休, 女仔先得30歲, 點樣相處? 但我都嘗試向佢地解釋, 呢d成熟型男士對女仔有一定吸引力的, 思想成熟, 各方面都幫你諗到, 照顧到你, 又有經濟機礎, 我都唔敢肯定我會唔會都受呢類男人吸引呢! 不過往後日子有好多問題會慢慢浮現, 確實有辣有唔辣, anyway我都希望佢地幸福快樂, 係咪真係可以白頭到老, 永結同心往後再說吧! 至少佢地呢一刻開心就好。

再次心涼的一夜

雖然今日超眼訓, 個人呆呆滯滯, 事關挨左晚夜去睇場令人心涼的球賽。 事前我已經估巴塞唔會輸的, 好保守咁買佢和, 點知佢win埋, 勁! 其實唔打少個之前已經睇出巴塞點都輸唔去, 佢仲佔得多攻勢過車仔添, 車仔無左艾辛, 林柏特打得好辛苦, 進退失據。 車仔左閘迪賀奴仲唔要得, 俾個細路美斯同雲邦賀斯爆多幾次就發脾四, 大踢茅波, 終於俾人紅牌趕出場都好合理, 不過我反而唔想囉, 唔打少個巴塞都好大機會贏, 我想佢地正式技術性擊倒車仔囉, 又想繼續睇迪賀奴點出醜嘛!

所以最終巴塞贏二比一我都唔太開心, 太少喇, 唔係泰利上身點止輸咁少, 應該係一場大敗吧! 而家都放生左車仔, 巴塞番主場要生生性性呀, 再贏埋佢! 其實我都覺自己有d變態, 我係覺得車仔輸波竟然開心過曼聯贏波, 但我真係好想佢歐聯出局, 佢掉咁多錢都贏唔到歐聯, 恨死佢, 等佢又不斷買人囉, 佢愈想得到愈唔俾佢得到, 等佢知道錢唔係所有o野都買到架。

P.S.衷心祝賀車仔歐聯出局, 巴塞加油, 全力炒車!

祝白頭到老，永結同心

好開心呀, 尋日收到個好消息, 一對好朋友終於結婚了, 定於今年１０月, 呢個係我今年暫定第三單喜事, 都係我最期待最祝福的一對!　因為個男仔同女仔我都熟, 同一時間識的, 係幾年前去旅行跟團識, 番到香港仲keep in touch到而家, 証明大家都有心同對方做朋友, 所以我都好歡迎佢搵我做姊妹呢!

佢地呢pair都拍左幾年拖, 樓都買了, 雙方都有心結婚的, 但可能男仔比女仔年紀少, 未想急於定下來, 但女仔點都比男仔急吧, 男仔未能了解呢個感覺, 所以一聽到佢地正式拉埋真係好感動好開心, 衷心祝福佢地。 睇人地d case, 女比男大只要外表睇唔出, 無咩大不了, 但一發生o係自己身上就需要好大勇氣去嘗試接受, 我只有口話人"年齡唔係問題", 但事實到我又唔係咁呢!

今年果然係好年, 好多朋友都紛紛拉埋, 搵我做姊妹係無任歡迎, 但請各位新郎哥識做d, 搵多d有質素o既兄弟黎玩玩, 唔該!

見工

個口講左幾年話轉工, 朋友都聽到厭了, 過年後終於的起心肝見左一份, 仲一擊即中呢, 尋日見今日就話請。 不過見呢份工發生左個小插曲都幾奇怪的, 一開始做一個tast都好正常, 跟住收左我d CV, 見完一個男人, 見埋老闆娘, 都考左我好多shipping o既o野, 因為我見上一個人就係見個男人就走左, 所以我都知我機會會大d。 跟住奇怪o既事發生喇, 傾到七七八八要走果陣, 佢要俾番d cert, reference letter我, 但佢竟然由我個folder度抽番幾張紙出黎俾我, 而佢係收起我個folder據為己有, 雖然個folder好平, 但無啦啦要我就咁拎番幾張紙走, 真係好怪, 我都一刻係呆左的, 究竟好唔好開口要番個folder呢? 又怕大家尷尬, 所以最終都係無問就由得佢囉, 不過我係好肯定佢唔係因為唔記得而拎左個我folder的。

以我多年見工經驗, 以上事件確係少見, 我姑且當佢貪心, 但當我將呢個case同朋友講佢又有另一個見解呢! 佢話果個interviewer係試我, 睇下我會唔會開聲, 而家試到我唔會佢已經知我基本性格, 易蝦怕事, 所以佢都勸我唔好去做了, 去了一定會俾佢蝦的。 其實呢份工我做唔做都無所謂, 如果無野做會做住先, 有得揀就唔會揀囉。 不過點都好, 見完呢份工雖然做唔成, 不過都令我有番d信心, 原來我o係呢行都仲有d market o既!

心涼的一週

哈哈! 用心涼呢個字好似衰左d, 不過事實如此, 我最唔喜歡果兩隊球隊都o係今個星期相繼失分, 先有阿仙奴逼和保頓, 再有車仔慘敗米堡三比零, 哇哈! 一路睇直播愈睇愈high, 仲有尾場我隊愛隊曼聯輕取樸茨茅夫三比一, 雖然奪標機會細過百分之0.1, 但追得一分得一分吧!

其實最開心就係親眼睇到車仔少有o既大敗, 米堡既然試過四比一贏我曼聯, 而家同樣三球贏番車仔, 算佢公平啦! 呢個真係驚世大冷門, 波膽賠率高達100倍, 邊個會想到二比零輸俾榜尾新特蘭o既米堡會贏到帶離到開哂巷o既車仔架, 呢場代表作應該可以幫麥卡倫保住個飯碗啦。 其次阿記失分一d都唔意外, 佢無左一個韋拉已經變為一隊弱隊, 而保頓今季都有食住阿記個勢, 我估保頓會全取三分添, 要不保頓d後衛臨天光賴尿, 守多兩分鐘真係今季三挫阿仙奴架, 可惜, 可惜!

最後曼聯順利贏埋樸茨茅夫, 我一向最唔鍾意o既C朗, 連續兩場有上佳表演, 可喜係佢個團體意識好左, 多左交波, 射波亦見準成, 少左D欖球式射門, 佢兩場入左三球之外, 曼聯都連取六分。 傑斯首場複出, 狀態唔錯, 我最愛個雲佬都有一球進賬, 神射手又邁進一步, 而佢亦多見左助攻, 好多傳送都好準呢, 唯一令人擔心希望雲達沙傷勢無大礙吧! 因為候活真係俾唔到太大信心我地呢!

心涼的一週就係咁喇, 希望如費sir所說, 呢個只係車仔惡運o既開始, keep住落去會陸續有黎呢, 呵呵!

有派利是的衝動

今年利是一如所料比上年少, 不過我唔mind, 都係意頭啫, 都唔慌多得去邊, 何況我大雞唔食細米, 哈哈! 不過見到d小朋友收利是個開心樣, 令我好有衝動想派埋一份呀, 我心裡面講 : 我唔係想收, 係想派呀! 有無規定未結婚都可以派利是呢? 其實都有o既, 不過結左婚派仲開心d, 可以打正牌派嘛! 我可以給自己定個歲數, 如果到時我都嫁唔出都可以派利是嗎? 因為咁大個都仲收實在有d唔好意思。

近期成日諗起一首歌 "很想當媽媽我不理代價, 手中的娃娃會將愛淨化, 動靜亦是像你吧...." 很有畫面, 好感動呢! 我個腦成日諗埋好多不切實際o既o野, 常常都會有一家幾口好幸福o既畫面, 不過永遠都睇唔到個爸爸咩樣, 哈! 新年期間見左好朋友個BB女, 非常活潑真係好得意, 有D羨慕添! 每逢去街撩人地D小朋友玩, 朋友都會取笑我說 "哈! 好鍾意嗎? 自己生番個囉!" 哼! 我會, 除非我無得生啦!

患上渴睡症

呢排真係好訓得過份, 新年日日最少訓到下午一點, 有日仲三點添, 之後個星期日又訓到三點, 真係覺得好浪費假期呀, 但我又真係訓極都唔醒果隻, 點算好呢? 連放假都要較鬧鐘又唔想逼得自己咁緊。 成日訓到黃朝白晏, 過多一陣又晚餐, 睇下波又再訓了, 覺得自己好頹呢! 不過有個好處就係, 幾日都訓咁晏, 最多只食兩餐, 又瘦左少少, 都未嘗唔好, 哈!

不過雖然補足哂眠, 但我都唔覺精神好得去邊, 個人仲愈訓愈攰, 要諗諗計先......

費sir玩完未?

又輸一場, 又係布力般, 兩個循環都輸俾布力般, 兩場都係疚由自取, 今次費sir玩得仲大, 用李奧打防中。 我下午已經同朋友講, 今場千其唔好再用李奧打防中呀, 絕對係不知所謂, 對狼隊之後以為好成功, 問題係人地實力差幾皮咋! 少少甜頭就真係以為得左, 根本上係亂點鴛鴦譜。

好在我最愛o既雲佬連入兩球, 令費sir不至於輸得太難睇, 睇佢知死未, 我開始都有覺得費sir老懵了, 用史密夫打防中已經係我個極限, 而家連李奧都玩埋, 佢唔知道, 布朗除左拍李奧, 其他partner佢都會騰騰震咩, 不幸中之大幸李奧自殺紅牌, 下場唔洗再用佢打防中, 希望費sir醒下啦!