完成北海道之旅

好不容易完成旅程, 過程充滿難題, 先是從全是日文o既網站book酒店, day tour, 去到仲遇上打風, 臨時更改行程, 但無損我對呢個地方o既喜愛。 北海道指數比東京大阪便宜, 除左搭車, 車費真係貴到令人咋舌, 我呢d無車之人確實唔化算。 就算城市如札幌都無人來人往o既情形, 食咩都唔洗排隊, 單憑呢點已經令我愛上呢個地方。

頭幾天未打風尚算風和日麗, 很好彩看到富良野水尾o既花田, 想像到如果當造時一大片係如何震撼。 滿山紅葉o既定山溪溫泉亦不容錯過, 每間溫泉酒店都甚具規模, 招呼周到。 到其後o既果園都令我地興奮得很, 亦見識到日本的士如何地貴, 短短5分鐘足夠由荃灣坐過海, 仲要來回兩程真係肉痛得很。 上午果園仲係天朗氣清, 下午到小樽頓時橫風橫雨, 很遺憾因為惡劣天氣, 令我地唔能夠好好遊覽呢個小鎮, 先前對呢個地方期望很大, 因為偶像中山美穗o既情書, 我對自己說一定要現場感受一下小樽o既魅力。

因為最後三日天氣一直未有好轉, 令我地o既行程只限逗留於札幌, 很希望等我有車牌後可以補償返今次去唔到o既地方, 甚至去埋遠d o既夕張, 涵館!

黑仔

多年旅遊經驗, 從來未試過出發前生病o既我竟然破例。 睇戲時已經覺得戲院冷氣太勁, o係食晚飯時終於爆發, 邊食邊嘔, 成晚o既自助餐食唔夠幾口就收檔, 很浪費呢! 第二日一早即刻去睇醫生, 呢排果然勁多人病, 要等成個半鐘先到我, 睇完食埋早餐已經中午。 由於公司太多手尾要執, 用爬的也要爬回去。 最黑的還未發生, o係我換衫時竟然無啦啦扭親條頸, 而家半身不遂, 行動很不便, 連行李都未執。 呢個北海道之旅還未開始已經多災多難, 天佑我個病同頸都快d好返啦!

打o比大戰

緊張刺激的打o比大戰, 心情有如坐過山車, 曼聯犯下兩個低級錯誤令自己陷於苦戰, 最終憑季初被人嘲笑曼聯簽佢返黎無用o既奧雲殿定勝局。 姑勿論球証係咪補時過長令曼聯得到最後勝利, 曼聯戰至最後一分鐘都唔放棄係事實, 曼城連少少時間都集中唔埋精神亦都係事實, 曼聯都經常補時失球, 足球就是這樣。 加上BBC都有實質數據証明球証補時係正確, 故曼聯拎得呢三分問心無愧。

天真o既泰維斯仲以為曼聯o既球迷唔會噓你嗎? o係你走了之後沒完沒了的講費sir是非我們還會歡迎你嗎? 你難度不知道o係曼聯費sir係最大嗎? 你同費sir口同鼻拗我地會信你還是費sir? 你話為曼聯球迷著想選擇去曼聯唔去利記, 以免傷我地心? 曼聯什麼時候同曼城唔係死對頭, 去曼城會有去比利記好? bull shit!

有趣的老細

老細 : Becky! 我地今年公司旅行去黃山, 你都去啦!
Becky : 老細, 我已經請左假10月頭去日本喎!
老細 : 咁咪o岩囉, 我地九月尾去之嘛!
Becky : ......

哈! 我老細真有趣, 如果我去埋黃山豈不半個月唔洗返工? 老細你未免太好人吧! 我會驚的!

準備就緒

一向都喜歡等過埋暑假先起行, 唔知今年發生咩事, 一個北海道之旅, 日期一改再改幾番遷就, 等左一星期先confirm哂機票酒店。 仲要而家一個月前book都係得返幾個機位, 我地個日期已經延後到過哂10月1 同 3/4號o既假期, 但都係爆到無人有, 另一朋友想去沙巴都係咁, 逼於改往澳門出發, 淡季都咁真係少有。

仍未同公司請假o既我已經開始度行程, 原本六日亦因為無機返多加一日, 多出來o既一日唯有參加local tour, o係搵tour果陣亦都困難重重, 唔識日本o既我地俾d日文網站搞到一頭霧水, 要麻煩識日文o既T小姐幫忙。 而家package搞掂, 溫泉酒店搞掂, 多出來3晚o既酒店都搞掂, 只欠local tour同升到發顛o既yen擱置中, 到出發時兌到0.8已經拜得神落!

中國女排B隊

等候多年O既蔡斌接陳忠和棒, 竟然帶黎一隊中國女排B隊, 呢隊並唔係咩新中國女排, 令人失望。 佢只沿用陳忠和遺留下來O既副選球員, 再加幾位新力軍作為後備便完成組軍。 最大敗筆係用魏秋月作為正選二傳兼隊長, 呢個球手只會將個波推到九樓高俾二同四號位作大槌攻擊, 中國長年以戰術變化多端見稱o係佢帶領之下蕩然無存, 二傳手作為全隊命脈, 以佢o既派牌功力實係不敢恭維。

睇中國女排多年, 如何不濟o既胡進, 朗平年代極其量只會輸俾巴西, 古巴, 意大利等勁旅, 豈料蔡斌一上場連輸兩場比自己實力低幾皮o既日本, 中國隊一向係日本o既勀星, 因為日本隊身材矮體力差, 之前中國打得點差都輸唔到俾佢地。 所以磨合期並唔係籍口, 實力差幾皮o既球隊該贏的還是要贏, 輸俾勁旅就無話可說。 今年女排大獎賽決賽看得令人心痛, 竟然未嘗一勝, 觀乎蔡斌場外緊張o既樣相信佢已經聞到尤魚香, 我都十分期待佢下台之日, 因為女排之沒落佢實在責無旁貸, 中國國內咁多省隊佢竟然求其用返上一手o既副選, 並無細心每隊執d精英出黎, 比賽時換人決定又令人摸不著頭腦, 如果佢唔落台都請佢好好請教陳忠和吧, 要不連奧運o既入場劵都拎唔到呢!

會考放榜

今年特別留意會考放榜, 因為有一個表妹係應屆會考生, 我一度以為佢會破我保持10幾年o既紀錄, 點知出黎成績都係麻麻, 雖然o係我覺得唔算太差, 但並唔足夠升上中六。 一直都o係低學歷家庭長大, 一慣傳統都係讀屎片, 所以對讀書無咩概念, 亦無太大壓力, 當然更無非升中六不可o既說話。

雖然表妹收到成績有d唔開心, 但只係比佢預期少兩三分而已, 所以repeat亦唔可能一個double上進而升中六, 很慶幸佢好快知道自己應該點做, 轉而報IVE。 由細到大已經知道各人頭上一片天, 從各家人處於低學歷咁工作, 雖然並不富有但至少三餐不成問題便足夠, 所以無一定要升中六或讀大學o既奢望。 反而很擔心下年將會考會o既另一個表弟, 佢係轉334學制最後一屆o既受害者, 只有一次會考機會, 考得唔好就要由中四再讀起, 無我地想當年咁無限次重考。 聽過佢好多次講一定要升到中六, 感覺很可怕, 屋企傳統都係讀屎片突然冒出一個咁緊張讀書o既人很奇怪呢! 已經同佢解釋多次, 唔係只有升中六一條出路, 想當年我"猛"車邊夾硬上咪又讀左一個月跟唔上而退學, 但我從來無後悔自己放棄機會, 因為俾我再讀落去頂盡撐到中七一定入唔到U, 白白浪費兩年時間, 耐何佢太固執一味認定只有升中六才是出路, 唉.....

下一站....北海道

原本打算10月同屋企兩老去台南一趟, 點知家姐拎唔到10月頭o既紅色假, 而佢又搵到好抵o既北海道package, 但係阿爸拎唔到多d o既, 只好放棄台南去北海道。 少有地咁早已經搵資料, 堪稱旅遊大使o既我同家姐都發覺北海道一d都唔易plan, 特別係溫泉酒店的一part, 佢好多日本酒店網都係for local人, 要本地member先book得, 網頁又係全日文, 睇到人都顛, 如果我地香港人要through返香港agent或者priceline呢d book, 但價錢貴好多, 研究左好耐都未有方法。 呢個package仲可以免費停東京, 為免自己忍唔住買野, 所以都係唔停了, 還掂東京之前都去過兩次呢! 唔該d yen快d跌返啦!

奧雲

奧雲突然加盟曼聯, 令我地成為其他球會fans o既笑柄。 老實說個人覺得並不可笑, 仲幾讚成呢次交易, 話哂睇英格蘭大, 睇奧雲一路咁沉確實心酸, 撇開佢曾經佢係利記人, 我都想見佢職業生涯再上高峰, 曼聯會提供最好o既條件俾佢東山再起, 我相信佢會搏盡去証明自己, 呢個在我黎講係雙贏。 其次奧雲又唔使轉會費, 人工超低, 錢佢o係皇馬紐卡素已經搵夠, 踢曼聯總好過去史篤城侯城等下游吧! 加上佢同朗尼國家隊合作多時, 唔需要長時間建立默契, 我對奧雲甚有期望, 希望佢爭返口氣, 令而家笑佢笑費sir o既人shut up!

拜拜C朗

聽到曼聯接受皇馬開價, 真有鬆一口氣o既感覺, 因為呢幾年聽佢話想去皇馬不下數十次, 聽都聽到厭煩, 而家終於成真, 對佢同曼聯都有好處。 對C朗o既分數一開始起跑點已經很低, 所以佢走都唔會有咩唔捨得。 事緣05年第一次去奧脫福睇波, 睇見當時o既佢經常扭失波而只顧坐o係原地dum蹄dum抓, 需要年邁o既堅尼幫佢追返個波, 見到堅尼力不從心又要同佢執手尾o既樣我很心酸, 由果一刻開始我決定唔會太喜歡C朗呢個人。

很多人覺得曼聯無左C朗會大不如前, 或者會有影響, 不過我已經有心理準備, 可能成績會唔理想, 但總好過強留一個無歸屬感同會發隊友脾氣o既球員。 之前無左簡東拿, 碧咸, 堅尼, 雲佬, 曼聯都可以一一渡過, C朗o既重要性絕唔係呢幾位之上呢! 很期待沒有C朗o既曼聯, 亦都期待C朗去到佢夢想o既皇馬有咩發展, 看看邊個無左邊個唔得吧!

明道

呢期莫名其妙的迷上明道, 盡管有朋友話佢似地盤佬, 哈! 一個月內睇左佢三部劇集, N年前熱播o既王子變青蛙我而家先睇, 其後o既愛情魔髮師, 原來兩套收視都很好, 難怪人稱收視保證。 喜歡佢因為佢唔似一般台灣男明星梳著同一款頭, 粗粗o既眉, 健康o既膚色, 而且演技不俗, 仲有佢把聲很好聽呢!

最近一套敲敲愛上你反而少有o既仆直, 是因為呢套唔係合作開o既三立作品嗎? 很大可能因為此劇o係新加坡已經播完, 所以台灣無咩人追看, 而佢又唔算第一男主角, 但在我來看佢休息一排後演技真的進步不少, 很期待佢黎緊更好看o既劇集。

港女

身為女性實在好討厭呢個名詞, 對女仔黎講極具貶意, 但偏偏有人不違餘力四處宣揚, 遠至海外, 尋日俾我睇到活生生一個例子....

話說一名中國藉男子, 一個鬼佬同埋我同一架lift :
中國籍男子謂 "I don't like Hong Kong and Hong Kong girls, it is difficult to build up a relationship, they only concern you have money or not ....."
鬼佬 "Yup....I don't care the money....."

果一刻我心裡面湧起一團怒火, 竟然有d咁o既pk唱衰香港女仔? 仲要宣揚埋俾外國人知, 而家我地d香港女仔已經難搵男朋友, 連向外發展o既機會都俾呢d人扼殺, 忍爆粗既衝動, 要是爆左人地豈不對香港女仔印象更差? 就順了個pk意思, 達成唱衰港女目的。

氣難平的返公司發洩一番, 原來就係呢d人將香港女仔抹黑成咁, 我唔否認係有呢d女仔, 不過為數唔多吧! 學T小姐話齋, 而家D港男一竹槁打一船人, 只要阿信咁先唔係港女呢!

大阪之行 (完)

第五日, 都係姐姐表妹黑仔最後一日, 佢地坐一點o既機, 佢地朝早都無咩地方可去。 check-out時再次見識日本人有原則到死板o既一面。 由於酒店o既單人雙人房都係同size, 我地滿以為最後我一個人住果晚可以唔洗換房, 點知佢都堅持我要換一間同大細o既單人房。 佢地放好行李之後就步行10分鐘到天王寺站搵早餐食, 食飽就行一陣早開o既百貨公司, 我見到心動o既burberry時幾個魔鬼不停引誘我。 行得一陣佢地11點已經要返酒店拎返行李出發去機場, 送完佢地車我一個人繼續自己o既旅程。

其實一個人實在無咩好做, 又無人同我影相, 所以都係行下街。 去到鄰近神戶o既一個大mall, 號稱全關西最大o既mall, 的確好大, 但對比曼谷o既siam paragon 仲有段距離。 o係果度食埋lunch都係消磨到三小時左右就回程返梅田。 個大mall收獲不多, 返到梅田腦海又浮現burberry o既影子, 一個人o既自制力確實很低, 受不了誘惑就買了。 行左幾棟大mall終於買左心頭好, 搞埋退稅, o係我沉醉於快樂之中時有一個放工o既西裝友行埋黎同我講日文, 佢個樣似問路, 但我一句都聽唔明, 我已經表明我唔係日本人, 但佢仲繼續講, 雞同鴨講左一陣, 佢做個飲o野樣然後一句"call he"我先明佢想叫我去飲咖啡, 唔係掛? 完全溝通唔到點去call he呀? 於是我say no, 但佢好似唔多明繼續跟住我行, 我恐怕佢對我o既戰利品不利於是一個箭步撇甩左佢, 真奇怪, 日本人都興咁隨便搭訕嗎? 特別在佢地唔識英文都唔知難而退呢!

行到6點幾已經有d體力不繼, 加上銀兩所剩無幾, 都係返酒店早d執包袱。 呢晚一個人訓發生左奇怪事件, 我本身唔係怕一個人訓酒店o既人, 而我呢間房只有一門一窗, o係我正要訓著時有一陣風吹過我塊面, 我起身check清楚門窗係關緊的, check完後再訓返。 不一會又一陣風吹我塊面, 很不對路於是又起身check多次, 都係關緊的, 呢個時候唔怕鬼怪o既我都有d心寒, 於是開電視開燈自己同空氣講我只係過一晚明天就走喇, 有咩打搞唔好意思之類。 第三次訓時決定將毛巾蓋住塊面, 就算再有風吹都感受唔到啦, 朦朦朧朧就訓到天光。

第六日都係自己一個o既一日, 由於六點機都有大半日時間行街, 都係徘徊o係難波心齋橋一帶。 但銀彈已盡同埋個o急無哂位所以都係零收獲, 食埋lunch行到三點就返酒店拎行李搭上JR到機場難開我好喜愛o既大阪。 今次去唔到遠d o既和歌山, 白濱等地, 所以我會再來的。

大阪之行 (續 2)

第三日全都係環球片場, 早已經聽聞呢個比東京兩個迪迪都要好玩, 果然無錯, 由於我地刻意避開星期六日, 所以大部份遊戲都唔使排好耐, 最多都係半小時。 比我地想像中早玩哂d機動遊戲, 唔太刺激, o岩哂我呢d老人家, 最大成本係water world, 值得一看。 大白沙噴出黎o既水好多, 成身濕哂, 差d連相機都失守, 搞到我地媽聲四起, 哈! 本人覺得最好玩係Jurassic Park, 最後仲有好多時間買紀念品同等睇巡遊, 不過就無煙花囉。

第四日, 亦都係家姐同表妹o既後一日, 首先去造幣局睇櫻花, 呢個局每年只開一次俾人睇櫻花, 而我地好彩把握到最尾一日而又唔係假期。 去到附近見到封路同交通警都想像到前幾日係幾咁多人, 造幣局果然係賞花勝地, 有好多品種, 打理得整整有條, 各人都影得很興奮。 最好彩的在後頭, 我地行完造幣局即時下起大雨, 好狼狽咁走到大阪城, 路途十分遙遠, 幸好我地幾位都係行得之人。 o係大阪城休息一會等到雨細d再出發去天滿橋, 旅遊書話呢個係一個本地人常去買o野食o野o既好地方。 去到見到d o野食果然比市區平成倍, 好多都抵食夾大件, 最經典就係我地隨便入一間迴轉壽司, 任何壽司都只係110yen (hkd8.60), 每件都比香港食到o既厚, 食到唔停得口。 行完天滿橋再返回酒店, 食飽飯再過對面街o既spa world, 號稱全世界最大o既室內溫泉。 之前check過價錢係2700yen, 點知去到做大特價變成1000yen, 真係平到我地唔信, 仲抵過游公共泳池。 內裡其實都唔差, 男女各一層, 一層男女共用, 老實說想浸哂女果一層有相當難度, 因為池實在太多, 玩足幾日最尾浸一下溫泉, 所有疲累都一掃而空。 浸完之後各人(除左我)都返酒店收拾行裝準備明天難開。

大阪之行 (續 1)

由於印航真係平好多, 而我果張機票係用milages換返黎, 所以我同佢地出發時間有所不同, 姐姐表妹同黑仔早我兩小時出發, 到達後先去機場附近o既rinku outlet行一圈, 而我就隨後趕到。 會面後一齊由機場去酒店, 由於價錢關係一早有心理準備呢間酒店唔會太好, 不過去到並不如想像咁差, 地點方便, 房間亦算乾淨, 只係比較細而已。

放低行李隨即去難波搵o野食, 食左章魚丸同拉麵, 都幾有水準, 之後都o係難波心齋橋行下, 呢兩個地方就好似旺角同太子, 分別有兩個地鐵站, 但行去都唔太遠的, 行到舖頭都關門先返酒店休息, 迎接第二日緊密o既行程。

第二日一早九點由酒店出發去池田, 目的地係即食麵發展館, 開頭以為好快玩完, 點知玩下影下都去左兩個鐘, 每人可以拎走一個屬於自己o既杯麵, 很好玩呢! 之後即刻返梅田轉承JR到京都, 去到京都站都幾難搵o野食, 一來個站超大, 搵到食o野果層又勁貴, 終於行到d橫街小巷先搵到d合理價錢o既野食。 食飽搭巴士去清水寺, 落o岩車站都要行一大段斜路先到達, 行到得返半條人命。 沿住清水寺落斜就可到達祗園, 祗園係一個富有日本傳統風格o既地方, 有好多著和服o既人行黎行去, 去埋祗園個個都攰到唔識行, 於是返歸搵o野食。

大阪之行

完成一個完美o既大阪之旅, 果然無令我失望, 未去之前一直都覺得大阪會比東京好玩的, 偏偏已經去過東京兩次都同大阪無緣。 呢個旅程完美在於 :
1) 我地避過左星期六日去環球片場, 所以每個game都唔洗排好耐, 好快可以玩哂
2) 把握到最後一天造幣局開放日去睇櫻花
3) 旅程間只有一日係雨天, 而果日雨o係我地睇完花之後先即刻落, 避過一劫
4) 酒店很平, 而地點出乎意外o既近, 地鐵同JR站各一, 而都唔洗兩分鐘路程
5) 買到很喜歡o既戰利品俾自己
6) 同行o既人很好夾, 沿途從無一絲意見不合
7) 有少少艷遇, 呵!

草蜢忘我演唱會

由於年前有一個月睇三次草蜢o既經驗, 之後聽到佢地個名都打泠震, 但今次o既飛係舅父臨時醒o既no pay o野而又係400蚊, 想放上裝bid又趕唔切, 於是抱住姑且一看心態入場。 坐位位置很好, 第六行兼正面台, 唔係fans o既我都被逼企足全場, 因為前面果班成晚都唔坐睇, 唔起就咩都睇唔到, 起左都係睇到一半而已, 事關前面坐著一pair男女姚明, 自問並不算矮都被遮了大半, 睇到頸都酸埋。 全晚最欣賞梅姐金曲果part, 草蜢唱得比自己o既歌仲好, 唯一美中不足蔡一傑一如上幾次咁, 區區幾場佢把聲已經好沙, 但佢不愧為全隊o既靈魂, 不論唱歌技巧, 台風, 舞藝都比其餘兩位出色。 由於是晚有曼聯賽事, 所以encore前已經離場, 我很少唔睇哂就走, 果然暢通得很, 哈!

成團

上星期同姐姐飲茶得知佢下個月請左10日大假, 頭五日係同老公去蘇梅島, 當我話我都好想去大阪, 佢竟然應承俾後5日我陪我再去一次, 事實上N年前佢已經去過。 本來阿娘都有份去, 但後來醒起要出席我地一位由細識到大o既朋友個婚禮, 於是只有我可以免役, 阿娘同阿爹要代表出席。 於是我嚮往已久o既大阪之旅就成行, 一直都覺得大阪比東京更加吸引我, 風景較多, 近郊溫泉又多又靚, 但好可惜之前去過兩次東京都未有緣去到。 直至表妹知道我地去日本, 佢同男朋友又話加入, 老實說同佢男友實在唔熟, 不過就當跟團一樣都係同d三唔識七o既人一齊玩啦。 整個星期都忙請假book機票酒店事宜, 現在終於告一段落, 可以安排行程。 得知姐姐原來由蘇梅島回港係出發大阪前一晚九點多, 返到屋企已經不早, 預備再執行李第二朝六點又要出發去機場, 實在令我非常感動, 令我覺得我地感情返回佢未嫁之前的好, 好多謝佢成全我去大阪o既夢想呢!

好久不見

無聊時睇下電話個contact list, 會發覺好多好耐無搵o既朋友, 但你又唔會delete佢個no., 想打俾佢又因太耐無搵而唐突, 久而久之變成好耐無聯絡。 今日忽發奇想想搵一個好耐無見o既朋友, 佢N年前仲同我一同歐遊呢, 想知佢近況如何, 唔理三七二十一打了。 雖然佢都有少少意外我搵佢, 但聽得佢仍然係歡迎的, 幾句寒暄後久違o既熟絡又回來。 我問佢我唔搵佢佢唔打算再搵我嗎? 佢o既答案同我開頭諗o既一樣, 好耐無搵我怕唐突。 行出少少的一步令我整日心情都好起來, 我唔想放棄多年o既友誼, 其實走出第一步唔係想像中困難呢!

八卦一則

公司一向人少少, 很少事非, 很平淡。 近日一宗小八卦勾起我o既八卦因子, 公司有位同事有老公有女兒, 竟然俾我撞破另有情夫送佢返工, 三人同一架lift, 氣氛奇怪得很。 我之前見過佢老公, 所以肯定呢個唔係佢老公, 而佢地表現親暱, 關係非淺。 回到公司找另一同事八卦, 原來佢都知呢個情夫之前黎過公司俾把遮呢個同事, 我地八得興起十分雀躍, 小小八卦令我地沉悶o既office生活增添樂趣呢!

八仔

近日俾屋企個八仔搞到一頭煙, 日日放工返去同佢搏鬥一番。 照足說明書駁線, 我堅信無插錯, 佢都scan到13個台, 但睇到o既只有亞視, 所有TVB都睇唔到。 到而家都未知係天線問題定係機頂盒問題, 最慘隔離左右都未有人試過睇高清台, 無人可以請教呢。 照理八仔o係機頂盒界口碑不俗, 應該唔係機本身o既問題, 上電訊管理局網頁又查到我棟樓有數碼高清服務, 搞到我一個頭兩個大呀!

Goodbye Ted!

一年幾日都好忙而且異常疲累, 但又好開心, 因為有朋友自遠方來。 一位o係澳洲識o既韓國朋友黎香港玩4日, 陪左佢三日, 要一個香港都可以迷路o既我做導遊, 確係一大挑戰, 難怪佢話佢still here, 真係係要thanks god! 哈!

一早為佢plan好行程, 幾日內去左好多主要景點, 如淺水灣, 赤柱, 珍寶海鮮舫, 女人街, 廟街, 黃大仙, 海旁, 坐渡海小輪, 坐叮叮, 山頂.....很遺憾佢時間有限, 去唔到ocean park同迪士尼。 見到佢大部份景點都表演興奮, 特別山頂夜景, 漂亮程度令佢開心得又叫又跳, 老實說可能太耐無去, 連我都覺得個夜景意外的靚。

今日佢就返韓國, 幾日後要開始兵役生涯, 經過呢幾日開心又攰o既日子, 真係有d唔捨得呢, 期間笑料百出, 令我真心喜愛呢個小朋友, 我會記得呢幾日架, 希望兩年後佢變成一條好漢, 我地韓國再見!

升職

收到老細通知我正識升為香港經理o既消息, 老實說驚嚇大於驚喜, 從來無乜事業心o既我突然背上咁大個title真係有d唔慣。 其實公司只有小貓三幾隻, 經理只係一個掛名, 做o既o野都係一樣, 手下亦都唔到我管。 老細突然有呢個想法係由於廣州公司最大果個將會走, 佢要出張memo重整架構, 新廣州經理變為另一個同事, 香港經理就係我, 咁就好似分得好清楚。 當然佢都有解釋工作上都唔會有咩大變動, 重要o既事都由返我負責, 反而令我最感興趣的是佢話人工會有所調整, 很期待呢!

過年後....

很hea地渡過10日新年長假, 期間兩老去左旅行, 所以無咩人黎拜年, 同樣我地都無出動, 雖然利是大減, 但免除好多執屋招呼親朋戚友o既麻煩, 都係好事一件呢! 人愈老愈唔在意利是o既多寡, 話哂自己早到應派o既年齡, 唔派之餘仲要收實在厚顏, 所以近年拜年事宜都由兩老頂上, 本人可免則免, 以免觸景傷情呀。 呢個新年過得很舒服開心, 多左時間同家人一齊, 加上常見舅父阿姨一齊食飯, 吵吵鬧鬧warm得很。 放完假重新投入工作, 見到幾位朋友逆市中都搵到唔錯o既工, 佢地鼓勵我話市況唔係想像中咁差, 搞到我心郁郁。

p.s.新年自購大禮物, 終於換到LCD電視, 期待.....

澳門again

老實說如果唔係有賭場, 我已經厭倦去澳門, 一年最少去三次, 如果唔係趁住新年假前未加價, 老爸常話10年未去過都唔會再走一趟。 賭場都係我地兩父女愛好o既地方, 由細到大從屋企感染賭o既氣氛, 小學三年班已經識打牌, 屋企從來唔反對我地學賭錢, 基本上跑馬, 麻雀, 啤牌以至賭大細小學前已經完成學習, 哈!

從來入賭場都多數有斬獲, 因為我唔係貪心之人, 師奶仔咁賭, 要贏船飛一餐晏仔都會成功。 滿以為星際係我o既福地, 點知今次一入第一張大細枱已經落筆打三更, 連續幾次大細跳骰, 差d輸哂我銀包o既錢, 幸好老爸夠冷靜覺得呢張枱唔對路, 趁我輸剩幾舊拉我轉枱搵過張正常d o既再賭, 輸左o既就算, 唔好再追。 好彩今次同老爸一齊去, 如果得我一個呢張枱我一定輸清光, 唔忿氣再追一定輸死。

經過第一張輸得咁慘, 終於搵到第二張枱幫我地收回失地, 連下幾城回本再倒贏少少, 眼看今日好似唔太順, 得些好意就回手了。 第二日再到金莎很幸運地又贏少少, 最好笑o係我地猶豫不決收唔收手時竟然避過一次圍骰, 於是決定唔貪走人。 兩日夾埋只贏回酒店加船飛, 到而家條氣仲未順, 如果唔係星際第一張輸得咁慘, d骰咁鬼, 應該唔止咁少呢! 最少贏埋手信同兩日食o野錢, 下次再有機會同阿爹聯手出擊, 我地講過返去練下百家樂, d骰太鬼唔再好賭了。

BUSY

年年臨近農曆新年工作都格外繁忙, 呢幾日都會踩盡務求趕快完成工作。 今年顯得特別有動力, 因為史無前例的有十日假呢! 從年廿八放到年初八, 諗起呢個長假咩人叫我做野都有求必應呀!

Happy Birthday To Me

今年過左個好開心o既生日, 很幸運身邊有家人朋友同我慶祝, 多謝佢地抽空出席同禮物, 我都好鍾意呢 (除了越洋送來的去皺護膚品)。 特別BBQ一夜, 估唔到新舊朋友可以玩埋一齊, 縱使食物未如理想, 但我依然好開心。 好友問我有咩生日願望, 老土一D希望各人都身體健康, 有工開, 自私一D o既願望希望自己遇到d好對象, 早日脫離俾阿媽日哦夜哦o既災難。

Happy New Year

今年過左一個近年少有開心o既新年, 睇左套好戲"葉問", 食左餐好吃o既泰國菜, 雖然IFC o既煙火有點兒那西, 但無損我愉快心情。 之前連續兩年除夕都因不快回憶而無心情慶祝, 我命令自己今年一定要開開心心, 或者我係好勝, 我唔再容許自己o係大時大節鬱鬱不歡, 回想從前已經無意思, 我不惜工本要令自己開心, 想去o既地方盡情去, 我要活得比佢好呢! 多謝兩位朋友帶俾我一個愉快o既除夕夜, 雖然有一位仍舊沉醉於悲傷顯得失魂落魄, 希望佢可以盡快忘記過去, 一齊面對新o既一年。

Twilight & 神探伽俐略

一連兩日聖誕假睇左兩套戲, 吸血新世紀同神探伽俐略, o係期望不大情況下兩套都出乎我意料的好。 Twilight喜愛者大多為女性, 男仔會覺得超乎現實, 女仔會覺得超浪漫, 男主角保護女主角英爆。 但睇真男主角無我想像中靚仔, 我o既Becks比佢靚很多呢! 戲完很明顯留下伏線, 聽說還有下幾集, 但未聞已經開拍呀, 唔好未交代哂就完吧!

神探伽俐略, 福山雅治風采依然, 老了依舊斯文靚仔, 濃縮了比電視劇好睇, 少左講物理o既o野, 對我呢d物理白痴易明得多。 多左感情線, 不過唔o係福山雅治同柴崎幸身上, 但都加了添人性。 期待最後一套聖誕片-葉問。 P.S.經常諗起校長一個爛gag, 下集叫 "葉答"

鬧劇

近日不斷有鬧劇娛樂大家, 好睇過連續劇, 繼亞視高層上演羅生門事件, 其後玉女同倪生o既發展更加引人入勝。 身為女人o既我從來無同情過玉女, 倪生偷食不下十次己成習慣, 佢地多年來已有一套相處之道, 兩個人都覺得一對couple係唔需要一對一的, 既然兩人有如此獨特觀念, 外人又何需替玉女抱不平呢! 一早都知分手聲明假得很, 女方覺偷食沒有不對, 只係外人多事了, 從來不存在分手原因, 聲明只係倪生敷衍傳媒, 認衰仔只係想外間收口o既一種技倆, 如此愛佢o既女玉當然配合。 結婚呢個決定對我來說沒有祝唔祝福, 因為婚姻對佢地黎講係無意義, 倪生婚後一定會繼續偷食, 玉女繼續當無事發, 倒不如省回註冊果幾百元吧!

Welcome Back

好姊妹由澳洲回來了, 10個月o既旅程終於完結, 倦鳥知還, 我地仲未見面, 不過從電話聲裡聽得出佢非常愉快。 佢o既回歸為我呢排沉悶o既心情帶來唔少喜悅, 或者佢可以為我討厭o既聖誕節加添一d歡樂吧! 希望佢開心地過埋聖誕同新年之後, 重新出發, 順利搵到工, 畢竟而家咁唔景氣, 搵工難搵好工更難。 無論如何我都會照顧佢, 以報答佢為給我一個完美澳洲之行。

聖誕節不要來

近年越來越討厭聖誕節, 連商場佈置加音樂充滿聖誕氣氛都覺得很礙我眼。 年輕時都幾期特聖誕節, 大多數同朋友漫無目的地上街狂歡一番, 但近年已經無呢個興致。 討厭聖誕街上人頭湧湧, 討厭各餐廳坐地起價, 討厭一些不快o既回憶, 見到d人費盡心思計劃如何慶祝更覺討厭, 有咩值得高興呢! 只不過多兩日假期罷。 討厭聖誕的程度連自己都覺得有d心理變態, 仲記得上年聖誕爸媽反而有節目外出, 我刻意留自己o係屋企一個人渡過, 唔想約人唔想人約, 自閉得很呢! 此外, 聖誕來臨表示著我o既生就到, 又老一年實在高興不起來, 看來今年o既聖誕都係做孤獨老人居多。

五月天-後青春期的詩

一向都幾鍾意五月天o既歌, o係band友眼中可能唔夠rock, 有商業成份, 但我就係鍾意佢地無刻意的曲高和寡, 甚至很老土o既台語歌都照唱可也。 今年周董o既大碟銷量已經夠驚人, 點知五月天一出即破周董o既紀錄, 呢隻亦都係我今期至愛。 很佩服阿信包辨全碟歌詞同六首作曲, 其餘4位成員各有一首作曲, 雖然阿信o既功力唔可以同方文山相比, 但都相當不俗了。 第一次聽到主打歌<你不是真正的快樂>已經令我很感動, 好似阿信對住你講o野

詞/曲：阿信　演唱：五月天

人群中　哭著　你只想變成透明的顏色
你再也不會夢　或痛　或心動了
你已經決定了　你已經決定了

你靜靜　忍著　緊緊把昨天在拳心握著
而回憶越是甜　就是　越傷人了
越是在　手心留下　密密麻麻　深深淺淺的刀割

＊你不是真正的快樂　你的笑只是你穿的保護色
　你決定不恨了　也決定不愛了
　把你的靈魂　關在永遠　鎖上的軀殼

這世界　笑了　於是你合群的一起笑了
當生存是規則　不是　你的選擇
於是你　含著眼淚　飄飄盪盪　跌跌撞撞的走著

Repeat ＊

你不是真正的快樂　你的傷從不肯完全的癒合
我站在你左側　卻像隔著銀河
難道就真的　抱著遺憾　一直到老了
然後才後悔著

Repeat ＊

你不是真正的快樂　你的傷從不肯完全的癒合
我站在你左側　卻像隔著銀河
難道就真的　抱著遺憾　一直到老了

你值得真正的快樂　你應該脫下你穿的保護色
為什麼失去了　還要被懲罰呢
能不能就讓　悲傷全部　結束在此刻
重新開始活著

趁火打劫

今日收到個可怕o既傳言, 聽說全公司減薪10%。 天呀! 不是吧! SARS時已大副減左20%, 經過5年時間每年加三幾百, 先好不容易加回剛入職時o既人工, 再減10%我豈不是比01年剛入公司時還少人工? 大副落後通漲呢! 如果油公司學學老細就好了, 正是減快加慢。 相信很少人o係一間公司長達八年到頭來人工比剛入職時少吧! 我呢八年好似白過。 很不希望傳言成真, 如果老細落聖旨我應該會據理力爭, 前後減左30%人工, 佢都係請過第二個吧! 還是開始留意搵工好了, 這樣下去老爸下年退休, 幾個人食我一份雞碎咁多o既人工很難維生, god bless me!

台灣遊

今次已經係第四次, 一如以往台灣真係好多o野食, 好多特別o既餐廳, 淨係主題餐廳我地都去左HELLO KITTY同周杰倫開果兩間。 不幸的是我大病初癒, 胃口並未恢復, 食得好少, 浪費了台灣o既美食。

第一日去到即到淡水, 點知5點幾已經日落, 影出黎o既相差強人意, 好在有小食補數, 豆花, 阿給都係首選。 之後再去士林, 由於之前都食得差唔多, 只多食了大餅包小餅, 很好食呢。 之後o既節目都係shopping, 台灣o既屈臣氏有好多化妝品專柜, 大部份日本牌子如佳麗寶都比香港平好多, 我地即刻瘋狂起黎。

明明之前已經plan好去陽明山, 饒河街夜市, 貓空等地方, 但到頭來一度都無去到, 一日由於落雨, 一日因為楊丞琳改變了行程。 經過光南大批發無意中發現一張通告, 原來果日楊丞琳o係西門町有簽唱會, 我地知道SY鍾意楊丞琳, 於是取消行程幫佢買隻碟拎個簽名作為手信, 一等就係幾小時, 熱得汗流浹背, 好不容易終於排到, SY小姐唔該諗下點樣報答我地呢! 意外收獲除左楊丞琳仲見到阿信(前信樂團主音)同埋小綜鄭元暢, 台好近睇得好清楚呀!

之後o既節目都係shopping, 掃左d mask, 太陽餅, 鳳梨蘇, 綠豆糕......回程個o急比去時足足重左10kg, 呢次用o既錢都係比之前三次多, 因為有魔鬼在身邊不斷慫恿我買o野, 返黎條數有排計。

金融海嘯

很慶幸在雷曼爆煲前返回舊公司, 很難想像呢個金融海嘯影響咁大, 股市大跌, 好多中小企倒下, 裁員減薪聲不絕。 有幸仍有工做o既人都身家大跌, 當然包括我在內, 有朋友原有10萬元市值o既股票頓時得返兩萬多, 而我都唔好得好多, 少左七成, 真係欲哭無淚。 而家最開心梗係持有大量現金o係手o既人, 股市匯市大跌, 係入市o既好時機, 唔等錢使入定d抵貨將來實有得賺。

市道唔好亦係出遊o既好日子, 機票紛紛減價, 3千多元已經可以去歐洲, 不過燃油附加費都盛惠3千, 係咪抵左側見人見智。 o係朋友引誘之下決定月頭再去一次台北, 呢次已經係第四, 自己都覺得有d太多, 哈! 不過台灣實在太多美食, 我每次都好難抗拒, 希望今次都一如以往可以盡興而回。

再見中國女排

打埋最後一場亞洲錦標賽, 最強年代o既中國女排正式解散。 除左足球之外, 女排係我第二最愛, 最鍾意不能避免都係中國女排, 因為中國女排係發明最多戰術o既球隊, 甚麼美女梳頭, 前掩後快等等都係佢地發明, 各國爭相模仿得以提升水準。

呢隊女排都係我睇過最強最平均o既一隊(朗平時代我還未出世), 孫玥係勁但生不逢時, 其後陳忠和接手發掘出馮坤, 楊昊, 周蘇紅等, 組成一隊攻守兼備o既女排。 最難忘緊係2004年雅典奧運連追三局反勝俄羅斯奪金, 相信好多女排fans同我一樣睇到眼濕濕。 經過失意o既北京奧運, 女排新舊交接不成只能取得銀牌, 其實我已經很滿意。 金牌機會百年一逢, 外間對女排要求太高, 長年征戰大部份球員傷o既傷攰o既攰, 輸係實屬正常。

睇完最後一場比賽令我感受很深, 大部份時間都係用新人出賽, 只係金牌決勝局最後幾分換入即將退役o既馮坤, 楊昊, 趙蕊蕊。 贏波係預料之內, 呢個比賽主要原因係俾佢地一個謝幕o既機會, 亞洲賽完成亦代表中國女排一個時代o既終結。 陳忠和去向成焦點, 新人薜明, 馬蘊文接替快攻無問題, 王一梅依然穩守大槌位置, 最頭痛係馮坤seter同周蘇紅個副攻手位置, 周蘇紅放住因意外半身不隧o既老公都要參加京奧令人感動, 亦都表示出呢個位置佢係無可取替。 此外, 要魏秋月接替馮坤確係強人所難, 火喉同技術都差幾皮, 如果陳忠和繼續執教呢個二傳位一定唔可以再用佢, 戰術運用完全發揮唔到, 只有死路一條。 下年四月就係中國女排重組之時, 期待下一個黃金十年!

後記

用左幾個月先紀錄完呢個澳洲之旅, 我真係太懶, 好多有趣o既事發生都可能漏左記低, 但永遠都會記o係我腦裡面。 由於budget有限, 只用左兩萬五完成個多月旅程, 開頭預料會非常艱苦, 但實際上又可以接受, 因為幾程通宵車都唔滿客, 可以一個人訓兩個位, 比起一個位已經舒服好多, 令我地開心成晚呢。 需要最慳反而係食同車方面, 澳洲出街食飯同搭車真係好慣, 所以大部份都係自己煮或帶麵包生果出街食當lunch, 搭車又使左d橫手可以平d。

雖然返黎要面對銀根短缺同失業o既問題, 不過呢個旅程o既得著同識到o既人令我覺得好值得。 見過不同原因出走o既人, 認識唔同種類o既人令我覺得自己太渺小, 眼界擴闊o左。 識左好多唔同國籍o既朋友, 有韓國, 日本, 泰國, 台灣, 澳洲, 哥倫比亞, 西班牙, 加拿大等等...當然仲有他鄉遇故之o既香港人, 我會好好珍惜我地誇越半個地球o既緣份, 希望大家可以保持聯絡。 雖然我地o既行程因為冬天而多數o係南澳, 唔係大路o既熱點如開恩茲, 黃金海岸, 但可以去到我嚮往己久o既Adeliade, 咩都抵返哂, 因為呢個地方唔會跟團去到, 一定要專程去先去到, 好多謝朋友願意陪我去呢個地方, 亦都係呢個地方令我地遇到幾個香港人。

可以去多過一個月o既旅行一生人唔會有幾多次, 呢個旅程令我一生難忘。 澳洲呢個地方我樂意再去, 不過要等澳元o係合理水平之下(起碼唔係我去果陣7.3), 希望再去會帶住屋企兩老啦!

澳洲之旅 8. Sydeny

離開Canberra返回最後一站Sydney, 由於朋友個fd住o係Sydeny偏遠地區, 我都唔好意思打擾, 所以要一個人住九晚hostel, 搵左間平少少o既, 質素一分錢一分貨, 比剛到步果間差好多。 最經典係第二日訓醒我發現有個半裸男訓o係我隔離床, 係佢條女俾佢入黎, 而我地呢間係female room, 條仔直到我走果日仲o係度, 兩個人訓張3尺床, 搞到成房女仔都唔方便, 呢pair人認真厚面皮!

頭兩日繼續市中心遊覽, 都係大路o既Darling Harbour, Sydney大橋, China Town, Fish Market, QVB, Star city, 海事博物館等地方。 原本打算報Local Tour去Blue Mountain, 點知落足一個星期大雨, 夾硬上山都係咩都睇唔到, 所以無去到, 9日就係極度無聊咁過。 由於朋友唔方便日日出黎咁遠陪我, 而每日又落大雨, Sydney遠近o既Mall都俾我行哂, 遠至Warringah 同Parramatta, 近至QVB都行過N次, 一星期o既大雨令我Sydney之行只限於Shopping, 最慘我盤川極度有限想狂買又唔得。

雖然Sydney好多地方都去唔到, 但識到一班新朋友都算有d安慰, 識到兩個唱歌好好聽o既韓國仔Ted同Young Chan, 很nice o既泰國妹妹Por, 一齊去唱K, 載歌載舞, 顛得很呢! 去到Paramatta行完一個大Mall竟然俾我地搵到一個類似香港o既圖書館, 裡面有好多中文書, 搵到個免費又o岩落雨o既節目, 我地開心得要死。 直至我走前兩日先停止落雨, 於是再去Fish Market一次食海鮮, 俾我地撞到一pair香港女仔, 其中一個o係寫過一本關於working holiday visa o既書, 所以我地認我佢。 另一個令我地注意佢原因係, 我地o係Melbourne YHA已經見到佢地, 跟住去Adelaide又見到, 之後去到Canberra又見到, 果時已經奇怪佢地同我地行程一樣o既? 去到Fish Market又撞到喎, 有無咁橋呀? 大家都認得大家於是冒昧上前搭訕, 佢地都我地一樣知道見過大家好多次, 哈!

趁住好天盡量去埋想去o既地方, 有Bondi Beach, Paddington Market (執到好多二手筍野), Oxford street, King Cross, The Rocks....臨走前同TED, YOUNG CHAN見之多次面, 跟住就去機場返港。 去機場途中call車o既司機係廣東人, 佢知我地係香港人滔滔不絕咁同我地傾計。 順利到達機場, check-in後, 再同Tim say goodbye, 朋友轉身離去後我竟然一發不可收拾地喊出黎, 因為我好唔捨得呢個多月美好o既日子同埋識到o既朋友。

澳洲之旅 7. Canberra

幾唔捨得都要踏上返回Sydney o既旅途, 但原來返回途中coach係會經過澳洲首都Canberra, 於是我地決定留兩日一夜, 叫做去過呢個一世人唔會有機會到亦都唔會再去o既城市。 Canberra 係一個重新規劃o既城市, 全市井井有條, 表面上睇佢實在唔值得為一個首都, 但建立呢個城市係為左唔想Sydney同Melbourne爭餐死。

由Melbourne一早坐六個鐘頭車就到達Canberra, 市中心細得很, 唔洗十五分鐘就搵到YHA check in, 呢個城市無其他Hostel只有YHA。 市中心有D似香港o既東涌加愉景灣, 只有一小範圍比較集中有商店同餐廳。 其他景點更係少得可憐, 兩日一夜絕對足夠有餘。 我地只去過National Museum, 戰爭博物館, 新舊議會大樓, 一個好兒嬉o既賭場。 稍為有睇頭o既戰爭博物館, 因為展示左第一第二次世界大戰o既遺物。

話咁快去哂所有景點就返市中心o既超市買o野食返YHA煮, 間超市明明收5點半, 我地排隊俾錢果陣係5點20分, 佢叫我地放低手頭o既o野離開, 因為佢地要收舖, 我同個fd真係O哂咀, 未夠鐘已經趕客? 黃昏5點半所有人都返哂屋企, Canberra變為一個死城。 我地慶幸只留了兩日一夜, stay耐d真係人都癲, 不過我地研究過呢個係家長放心子女留學o既好地方, 無娛樂場所, 無夜生活, 返學放學想學壞都無機會, 但悶死個機會好大!

澳洲之旅 6. Melbourne

完成Adelaide之行又返到Melbourne會合Tim, 今次返去仲識多幾個韓國人Jack & 宋旭。 Tammy向我地推介原來Melbourne有地方唔洗錢都睇到企鵝, 就係St.kilda beach, 明明已經去過一次都無發現, 於是一行4人再去多次。 冬天o既沙灘真係凍得很, 等左好耐又凍又唔見, 正想走之時聽到企鵝o既叫聲, 終於俾我地見到, 雖然只有三兩隻, 但佢地唔怕人行得好近, 於是我地越影越近.....

有日去左一個叫Puffing Billy o既蒸氣火車, 特別在有條凌空o既路軌, 我地都可以沿車邊坐, 將腳伸出車外, 一過凌空路軌時確係幾刺激。 到達尾站等一陣坐返回頭車, 回程全車都靜哂, 大家都無第一轉咁興奮。 之後幾日都係圍繞市中心玩, 去過教堂做禮拜, 去過Sunday Market, 去Victoria Market買一星期o既食物, 邀請佢地黎YHA試我地D手勢。 最難忘係贏左歐聯果晚, 我地去一間韓國餐廳食飯, 見到對面枱有個男仔同我一樣著住曼聯波衫, o係足球咁唔普及o既澳洲見到曼聯fans真有他鄉遇故之o既feel。 o係佢食完行過我身出門口之際, 我攔住佢邀請佢同我合照一張, 睇樣以為佢都係香港人, 原來佢係馬來西亞人, 同佢黎過5之後放佢走, 之後朋友同我講返, 我截住佢果陣佢個樣係嚇左一跳, 哈! 理得佢呢, 果一日實在大開心喇!

臨走前一晚, 相約宋旭同jack去我地YHA天台BBQ同劈酒, 飲左好多VB同韓國清酒, 大家都飲到少少high, 天南地北, 知道好多韓國o野, 又講又笑好開心。 離開Melbourne前一晚已經吩咐Tim唔洗黎送, 因為六點o既車太早喇, 點知第二日上左架駁腳tram時見到佢, 問佢點知我地坐邊架tram, 佢好肯定咁話坐頭班車一定見到我地, 其實我地果班已經係第二班, 我地送左第一班o既車尾走的, 等tim仲以為自己坐左第一班, 果一刻我強烈覺得tim送到我地真係整定。 幾唔捨得都要走, 車開果刻確實望到tim低頭想喊個樣, 我都好唔捨得同佢相處呢兩星期o既日子, 我相信我地會再見的。

澳洲之旅 5. Adelaide (續)

繼Ricky同Tammy o既離開, 我地兩人都繼續Adelaide o既旅程。 首先去一個飛機博物館, Adelaide一向係各飛機司練飛o既好地方, 因為天氣多變, 短短時間可以經歷幾種天氣變化。 去到偏遠地區o既博物館, 我地深信呢度就係拍過衝上雲霄o既地方, 雖然無官方証明, 哈! 有多種飛機俾我地近距離睇到, 仲有d打過仗o既戰機可以親身坐上, 影到停唔到手。

其後去左一個野生動物園, 呢個動物園特別在所有動物都係近距離接觸, 隨時o係你身邊出現, 唔會有o野攔住。 呢個亦都係少數動物園親近樹熊影相而唔洗額外俾錢, 仲唔洗好似sydney果d咁排半日呢! 我最鍾意就係餵袋鼠呢part, 佢地好乖又唔會攻擊人, 一見你手攞o野食就好熱情咁追住你, 不過食果陣真係好猴禽, 用手抓住我隻手, d指甲好尖抓到我損哂。 有d有袋有BB o係裡面的係kangaroo, 無袋細隻d o既係wallabee, 有local tour o既導遊提議我地一試kangaroo o既肉, 小試一口並唔係咁好食, 食左都有d後悔, 見到佢地咁可愛我發誓以後都唔會食。

完成一共5日Adelaide之旅, 又出發返回Melbourne會合Tim, 返去途中正好歐聯決賽, 一路都有人報告賽果, 緊張到我10幾個鐘唔敢訓, 清晨六點到達Melbourn YHA又剛好射12碼, 興奮得o係lobby發顛, 贏左開心得濟又訓唔著。 坐完overnight車o既我應該叉返電, 但實在太高興即刻出city搵網上搜集消息, 於是果兩日變成20幾個鐘無訓過, 但好值得。 Adelaide 之旅除左Ricky, Tammy仲識左好多人, 如mk, tony....各人有各人去澳洲o既目的同故事, 令我眼界大開。

澳洲之旅 4. Adelaide (續)

到達Adelaide先搵YHA落腳, 地點很好, 就車站對開5分鐘腳程。 房間好大, 4人房只住我地兩個, 仲有露台添, 超delux呀! 抖左一晚, 第二日約埋Tammy 去China Town 隔離o既 Central Market, 買定呢幾日o既糧食, Tammy黎到時帶住一位男仔, 原來佢地o係Melbourne做o野時認識, 黎到Adelaide o係hostel撞返, 真邪! 呢個男仔叫Ricky, 係我旅途中遇到第一個香港男仔。

返到YHA四人一起煮晚餐, 煮煮下有廣東話搭訕, 原來係另一pair香港男仔, 一個叫MK一個叫Tony, 佢地主要都係黎做散工搵錢, 買左一架車去到邊做到邊。 問佢下一站o係邊MK都係表現出無組織無目的, 永遠都係話唔知, 只係估唔到Adelaide咁難搵o野做, 佢地每晚都訓車, 黎YHA都只係借用廁所同廚房, 難得佢地自在得好似呢度o既住客呢!

之後一日連同Tammy, Ricky一行四人行勻市中心主要景點 : 南澳博物館, Botanic Garden, 會議中心, 最後係賭場, 賭場裡面仲有免費咖啡任飲, o岩哂我地d窮人backpackers。 隔天, Ricky帶左我地去Adelaide Hill就離開Adelaide, 一人前往Alice Spring繼續流浪。 得返我地三個女仔一齊去德國村, 然後趕上黃昏到著名o既Glenelg海灘, 果然名不虛傳, 靚得很。 同Tammy食埋最後一個晚餐, 佢聽日又一個上路去 Perth, 完成佢成年澳洲行o既所有地方, 我地約好了香港再見。

澳洲之旅 3. Adelaide

o係 Melbourne第一個星期去o既地方唔太多, 一來每日都好快天黑, day time好短, 二來大部份時間都用黎同阿Tim玩。 過左一星期我地出發去我嚮往已久o既Adelaide, 我地選擇參加 local tour途經大洋路到達Adelaide, 而呢個local tour係成程澳洲之旅最貴o既支出, 盛惠港幣一千七百元, 只係兩日一夜, 肉痛得很呢!
Local tour大部份係歐洲人, 只有兩個日本妹同我地係亞洲人, 德國人o既導遊英文講得好快, 我只聽懂六,七成。 到達主要景點12門徒石已經黃昏兼西斜, 時間不對影出黎o既相都係背光, 激死人! 途中一行20人住o係兩間分開的小木屋, 氣溫只有兩三度, 仲要沖時有時無熱水o既涼, 凍到人都顛。 第二日再出發去睇o岩石同瀑布, 遇上另一個local tour, 因為佢地原本o既導遊身體不適, 要求同我地combine, 咁o岩佢地呢團有幾個香港女仔, 很開心o既相遇, 他鄉遇故之的feel。
完成Great Ocean之旅只有其中一個香港女仔Tammy同我地一齊去Adelaide, 其餘都回Melbourne。 Tammy 係我見過最叻o既香港女仔, 我相信佢o既本事會令男人都自愧不如, 我已經封佢成為我o既偶像呢。 原本o係香港一本雜誌o既總編, 因為工作太辛苦, 申請了working holiday visa到澳洲一趟。 未遇到我地之前佢o係開恩茲o既漁船工作過, 有潛水牌o既佢又試過幫當地旅行社教外國客人潛水。 賺了一筆錢之後自己租車四圍玩, 揸到邊扎營訓到邊, 去過好遠o既Darwin, Alice spring等地, 又專程去紐西蘭玩sky drive。 之後到Melbourne山區o既果園擇生果, 又賺一筆後去Adelaide遇到我地, 再玩埋Perth之後返港, 如此一個女中豪傑, 很幸運繞左地球大半圈都俾我遇上, 好奇妙o既緣份, 我會keep住同佢聯絡的。

澳洲之旅 2.Melbourne

經過一晚疲倦的overnight coach, 清晨六點到達Melbourne, 氣溫只有幾度, 凍得拉o急o既手都彊了。 首先到Information Centre問點去hostel, 隨住友善o既工作人員一句 Have a nice "低", 我已經喜歡上呢個酷似英國o既城市。

原來我地o既hostel屬於偏遠地區, 室內環境頗為不潔, 幸好頗nice o既老闆Paul同安全o既房間加回少少分數。 Settle down之後朋友即call住o係澳洲o既朋友-Tim (韓國人), 我地一見如故, 因為佢都係曼聯fans, 因為朴智星。 非常感激Tim陪左我地兩星期, 作為嚮導, 大家講著鬥爛o既英語, 很好玩。

由於Tim都只係學生, 所以要錢o既地方都唔會要佢陪我地去, 佢帶我地行一轉市心中, 用佢o既學生証過骨唔洗買博物館o既飛。 晚上去左海邊o既 Southgate, 又去左賭場, 有少許斬獲。 有一晚佢約左佢d同學去pub, 帶埋我地去, 猶如international night, 好多國籍o既人聚埋一齊, 最有印象就係一位極度健談o既哥倫比亞人, 一位見人就咀o既西班牙人。 之後佢地邀請我地再落D玩, 但由於返hostel途中太靜又太夜, 我地推左, 幾經糾纏半小時先甩到身。 到Tim送我地搭車果陣先講, 好在我地推到, 佢話因為好多哥倫比亞人都信唔過, 好狡猾, 會借機會想同人one night stand的, Tim講出黎真係找死, 剛才我地推得咁辛苦佢又唔幫拖掛住傾電話, 哼!

澳洲之旅 1.到步+Sydney

由香港坐凌晨12點機到達sydney, 過關時都有d擔心, 因為聽聞機場會翻箱倒籠咁摷你d行李, 點知連我張入境表剔左有違禁品, 佢都只係問我 "你只係帶左藥?" 幫我剔返就過左關。 出到入境大堂, 朋友已經o係度等住, 幾個月無見來個擁抱先, 很dramatic, 哈! 由於機場無機場巴士, 門口有個男人問我地係唔係去city, 佢只收Aud12, 於是就上左佢車。 唔洗半個鐘已經到達hostel, 朋友先回佢Penrith的家拎行李, 我就小睡一會。

六人o既房認識左一位台灣女仔mickey, 佢原本o係一家電視台做幕後, 工作時間不分晝夜, 到達極限於是把心一橫, 放個長假黎到澳洲。 同佢傾得好開心, 由電視台八卦到旅行, 原來佢都係一個旅行痴, 我地仲交換聯絡相約一齊去東歐呢!

朋友回到hostel, 我地o係市中心逛一陣, 之後買野返hostel煮, 預備明天坐overnight coach去Melbourne。

澳洲之相

很懶的我用左一星期去整理澳洲o既相, 由相o既數量可以睇出我對果個城市o既喜愛程度, 歡迎各位入去睇睇啦。


http://picasaweb.google.com/beckyfung7

九年的等待

相信只係忠實o既曼聯fans, 尋晚都會同我一樣感動得眼泛淚光, 等待九年終於等到另一場o既歐聯決賽, 八年o既失望, 試過分組賽出局, 八強出局, 四強出局, 偏偏就踏唔進決賽。 費sir一直唔退休就係想拎多次歐聯, 老實說, 真係好羨慕利記o係歐聯表現出游刃有餘, 進身歐聯決賽如家常便飯, 而家到曼聯夢想成真更覺難能可貴。 巴塞一d都唔易對付, 如果唔係史高斯一記神來之筆, 曼聯能否入決賽都成疑問。 此外, 列卡特o既功力都係問題, 曼聯兩個回合都表現被動, 任佢攻都係老鼠拉龜。 九年先一次o既決賽我竟然無緣睇到, 那時我身在澳洲心在莫斯科, 各位好友我會不停地騷擾你地問賽果, 請你地有心理準備!

又唔見電話

呢部係今件農曆新年買, 壽命只有三個月, 短短三個月唔見兩部電話, 真係不可思議。 呢次案發地點係Element二樓女廁, 發現唔見只有幾分鐘, 打唔通已經知咩事, 我出奇o既冷靜先搵smartone報失卡先。 基於3個月前o既經驗, 做差人o既朋友話報埋警好d, 於是順路報埋警, 尖沙咀警署o既職員態度比我想像中好很多。 今次失竊我並無上一次o既憤怒, 要鬧o既上次都鬧哂, 已經有d麻目, 心裡只講 "又唔見了", 好唔開心只因為將要去澳已經好多錢洗, 唔想再用一筆去買電話。 曼聯輸波心情已經好差, 再加唔見電話真係down到谷底, 蘇民峰果然準, 我今年真係破財年, 半年未過已經破左兩次, 黑起上黎很怕挨唔到年尾呢!

God Bless United!

今年睇得最嬲o既一場波, 很討厭車仔, 把維迪踢傷不特止, 入第一球時懶團結咁拎林伯老母件衫出黎慶祝, C朗夠死過老豆啦, 曼聯都無做D表面咁嘔心o既慶祝, 果頭更衣室鬧交呢頭唔好懶好感情啦, 唔該! 見到朗尼咬埋最後一啖氣射入個波, 咁樣臨尾香輸返真係嬲爆, 仲要個12碼只有旁証一個睇到, 係咪手球, who knows? 一向俾人話有運o既曼聯, 今場一滴運氣都無, 連續兩野俾人護空門, 永遠有人o係龍門口的, 所謂軍刀自己又唔識入波, 阻人入又咁叻, 改行踢龍門啦。 仲有人話曼聯賽程有利, 六日打三場, 場場硬野, 何利之有, 今晚即見魔鬼賽程o既影響。 反而車仔由歐聯o既世紀烏龍波, 再追到多場聯賽o既魚生粥追貼曼聯, 以至今日呢場旁証送12碼, 我睇有運o既係車仔吧! 衷心祝福佢d好運用盡, 四大皆空。 好唔甘心曼聯努力左成季個聯賽咁就無左, 餘下兩場一定要贏哂, 等睇曼聯衰o既人shut up!

不知所以

近兩個星期都有呢個感覺, 唔知自己做緊咩, 停工已經兩星期, 所有新order都pass俾同事, 我只提出意見, 教下佢地點做。 一邊好想快d去澳洲, 一邊又有d擔心去到唔知咩情形, 因為仲未有實質計劃, 都係去到先算。 此外, 我竟然有d唔捨得公司, 呢個好闆係世間少有, 擔心新人接手得唔好, 做左個多月佢好多野仲表現得一頭霧水, 成日幻想我走後公司會出現o既混亂, 老細搵個新人黎頂真係好很錯!

一個好爸爸

出乎意料, 呢套戲並見唔到一慣有型靚仔o既古天樂, 反而令我專注欣賞佢o既演技, 好多位都令人發笑, 其實佢有喜劇潛質。 當然呢套唔係喜劇, 不過其中溫馨好笑o既情節都唔少, 令人看得舒服。 劉若英驚喜不大, 而且大銀幕看得太真, 真得歲月o既痕跡都騙不了人, 劇中開頭扮演少女變得勉強。 後半段出現劉若英長大後o既女兒, 與其相似度令人嘩然, 話真係佢生都無人懷疑, 很佩服導演如何找來該女孩。

我很忙

很忙, 事實我應該忙住籌備我澳洲之行, 但除左機票之外我一概都未有plan, hostel未book過一晚, coach未book, 買左兩個月o既旅遊書只翻了幾頁, 明明好多時間準備o既行程黎到得返大半個月都係十劃未有一點。

我把精神都放o係公司, 忙住教兩個小朋友, 一個比較好有d shipping底, 另一個直情一竅不通, 教得我快吐血身亡。 又忙著與sales鬥爭, 我知新人做野唔掂, 錯漏百出, 但唔可以一世都唔俾佢做, 我走左要兩個人share我d工作, 佢要從錯誤中學習。 我d人幾時輪到佢教訓, 叫我唔好俾佢d單佢跟? 我偏偏要俾, 我係shipping dept. o既阿姐我話邊個跟就邊個跟, 做左咁多年竟然臨走先爆出自己身為阿姐o既威嚴, 哈!

That's Why I Love Becks

今日睇到一篇完全講哂我感想o既文章, 很高興有人同我想法一樣, 這正是我愛碧咸的原因 :

碧咸達成第一百次代表英格蘭上陣心願，波男周中有睇場波，呢個時刻賽果已經唔重要，「萬人迷」貫徹全場奔跑認真作賽態度，以及離場時獲得法國球迷掌聲歡送場面，同樣令人感動。無論有幾多人質疑佢級數，o係波男心中，肯定係當代球壇其中一位偉大巨星，絕對係年輕球員楷模！

一直以來唔少人認為碧咸名大於實，彈佢腳下功夫曳，踢法單調一味識放波，不過有一點唔到你唔服，佢出道至今落到場一定交足貨，跑上跑落絕冇欺場。每次代表英格蘭落場，佢一定竭盡所能，○六年世界盃直頭跑到嘔，謝拉特同林柏特係好波，點解佢地成日踢國際賽冇料到？畫公仔唔使畫出腸啦！

其實作戰態度認真只係碎料，碧咸最厲害之處係精力過人，比賽以外仲要兼顧廣告、慈善活動，以及大大小小商業活動，成日櫈都未坐暖又飛，得閒又會飛去探老婆班，仲有時間製造三隻化骨龍，能夠做到面面俱圓，確係能人所不能！除擁有招牌靚樣外，佢仲有大把o野值得大家學習，千祈唔好咁膚淺齋睇表面妄下定論！

買旗

我一向都係樂於買旗o既人, 一來人地叫到拒絕會覺得唔好意思, 二來自己賣過旗知道果種辛酸, 儘管而家多左好多不知名o既機構賣旗, 有人叫到我都會買的。 但今日連續發生兩件關於買旗o既不快事, 令我有唔再買旗o既想法。 事件一, 一件我好鍾意, 兩星期無著o既外套, 今日先發現仲貼住張旗, 一扯落黎點知將衫上面一執毛都扯甩埋, 心痛得要死。 事件二, 今日落雨私濕, 我一手擔遮一手揸袋, 有個阿婆扯住要我買旗, 很勉強之下都停低拎錢, 入錢時個5蚊跌了, 彎身想執再入之時手中o既散紙包又倒轉了, 好多銀仔跌落地, 成地下都係水, 又擔住遮, 執又唔係唔執又唔係, 狼狽得很。 之後心諗, 如果我唔係懶好心買旗, 我件衫就唔會報銷, 我又唔洗搞到自己咁狼狽, 果真好心無好報的!

改變

自問係一個怕改變o既人, 但人生關口已到, 係時候改變一下, 做左七年o既工都要畫上句號, 逼使自己接受新挑戰。 很感謝老細o既縱容, 俾我咁大自由度, 三個月後返去做又得, 唔返亦得, 天下間呢隻老細無幾個吧? 萬一我真係返去做, 我同自己講我會幫佢打一世工, 哈!

離職前兩個月通知相信無幾多人需要咁, 因為老細對我好, 我亦都想盡量將佢o既麻煩減到最細。 新來o既同事都係皇親國戚, 一般o既商業常識一竅不通, 如一張白紙, 小至fax機點用, 長途電話點打我都要一一教起, 對我o既EQ係一大考驗, 如果到我走佢仲未上手, 我真係走得唔安落。 一邊要教人一邊自己個心已經嚮往之後個幾月o既澳洲之行, 真係矛盾至極。

Forever Becks

5日4夜o既碧咸團已經完成, 雖然奔波左4日, 個人殘爆, 勁爆瘡, 但都值得, 瘡會好, 機會可能只得一次, 幾大都要把握。

第一日

酒店等左個幾鐘換來怱怱一眼, 緊張得要死, 啞口無言。

第二日

佢去左京士柏, 朋友去左視察, 叫我唔洗嘥心機去, 唔會見到佢, 所以無出動。

第三日

放下手頭一堆工作趕去酒店, 等到佢training完返酒店, 只睇到佢揮手微笑就走人, 由上午11點等到夜晚八點都再無見過佢, 想要簽名願望落空, 頹得要死。

第四日

皇天不負有心人, 經驗所知佢只簽朝早出車果轉, 趁佢地去大球場之前等, 終於俾我簽到, 我地好有秩序, 很容易就簽了。 由親手遞上感受到佢簽o既力度, 果一刻感動非筆墨可以易形容, 10幾年就係等呢刻, 呢一秒係屬於我同becks的, 我會永遠記得!

第五日

最後一擊, 好想同佢講聲byebye, 望多最後一眼, 拎多一個簽名, 不過係人地幫我, 其實當時情況我自己可以簽到架, 不過人地一番好意話幫唔好意思拒絕, 今日都係最混亂o既一日, 好多前幾日無黎o既人黎搗亂, 差d釀成蘭桂芳事件。

呢幾日就好似發左場夢咁, 曾經以為我同becks緣份已盡, 無諗過咁近距離見到佢, 每朝起身都覺得又有becks o既一天, 真係好幸福。 不過明明諗左好多野同佢講, 幾日見到都講唔出口, 個人亂哂大龍。 但呢幾日內都唔見返佢以往o係曼聯o既燦爛笑容, 同隊友又唔太close, 美國o既生活係咪令佢唔開心呢? 好希望佢變返以前咁開心, 我見唔見到佢已經係其次。 今次等becks o既途中識左幾個志同道合o既朋友, 很好玩, 好開心我識朋友o既能力又返黎, 其實我都好怕我主動叫佢地如果無人啋我會點, 不過都要試下, 唔係點識到佢地呢?

我愛碧咸

我愛碧咸, 很愛很愛.....把握了最後一次亦都係第一次見佢o既機會, o係酒店等左一個鍾就見到佢, 但只有一眼, 佢無停低就向電梯走去。 隔晚已經諗定同佢講乜, 點知佢黎到時我腦海都係一片空白, 唔識反應, 眼見佢就黎離開我視線, 好想叫住佢, 但我好似俾人點左啞穴, 講不出聲, 好在身旁o既朋友叫左一聲"becks"佢先回頭望笑一下, 呢一下已經足夠令我心跳停止, 哈!

黎緊兩日要加陪努力, 希望有幸運之神幫我, 俾我再近距離見多佢幾眼啦!

興奮x1000000

真係興奮得要死, 事隔10幾年真係估唔到o係我有生之年仲可以親眼見到碧咸, 由當初話會黎足總後黎又話唔黎, 我個心七上八落, 而家終於firm左, 呢個真係天賜o既機會我要好好把握。

由10年前出黎做野, 一路努力儲錢諗住過去搵碧咸, 點知唔等我儲夠之時已經俾人賣走, 害我果陣足足喊左一星期。 到佢加盟皇馬黎香港, 我仲未接受到佢著曼聯以外o既波衫, 果個星期我避開所有新聞, 報紙, 封鎖自己接收消息, 甚至踢果日刻意搵個唔睇波o既朋友出街, 一於咩都唔知當無事發生。 我以為我同佢緣份已盡, 發夢都估唔到去左銀河我反而有機會見佢, 如果佢面對面望我一眼, 我應該會開心到喊, 時日無多, 我要開始部署了!

朋友

一日內見了兩班朋友, 一班係約好的, 一pair係偶遇, 兩班都令我心情好得很。 一班係相識10幾年o既好姊妹, 第一次少了一個o既約會, 話題沒有變少, 雖然人不在但都透過IDD與各人傾了一陣。 傾著今年各人o既計劃, 好似都會有重大改變呢!

另一pair偶遇o既朋友有一年多未見, 17歲時識o既朋友, 關係似哥哥, 以前很喜歡同佢玩, 很會氹我開心, 昨天見返都係一樣, 佢講咩都可以令我笑不停, 10年前o既感覺又回來了, 雖然唔常見但都令我一樣開心。

我的克勤演奏廳

睇到嗎? 就係呢個歷史性時刻, 追隨左克勤18年, 終於有機會同佢直接對話, 仲要o係萬幾人面前, 雖然只有短短幾句, 都足以令我開心到想喊。 我同朋友都覺得好奇怪, 當時佢係背對我地, 聽到我把聲之轉過頭來應我, 點解佢一認就知把聲係我呢? 仲同我四目相投, 果一刻令我覺得我地好似相識o既朋友在閒話家常, 呵呵....仲令我開心到成晚訓唔著, 打後兩日滿腦子都係克勤望住我個情景。

講返演唱會, 克勤唱live水準當然唔會懷疑, 要讚下現場音響十分好, 好多樂器同克勤crossover, 非常好聽。 因為克勤歌太多, 好多我鍾意o既都無唱, 如"紙婚", "吻別的位置"....但都有d side cut令我意外如 "世界未日的早上" 真係完全無plug過。 呢個係我一生人最難忘最好睇o既克勤演唱會, 唔好話$480, 就算$4800都抵到爛呀!

賀歲盃

前後六天o既新年假期咁就過左, 睇左年初一o既賀歲盃, 盡管大部份人覺得戲碼很不吸引, 亦不減我入場興致。 因為每年入場睇賀歲波係我同老爸o既習慣, 都係我地聯絡感情o既好日子, 一起嗌一起少真的過癮, 好唔好睇已經係其次, 何況我很喜歡今年o既港聯, 感覺係最有實力o既一屆, 佢地果然無令我失望, 捧盃而回, 雖然無關痛癢, 但我都好開心, 畢竟我已經失望而回好多年, 如果唔係天氣太凍真係想睇埋年初四決賽呢!

另一件趣事就係睇波果陣, 一個講波佬叫陳葦如坐正我後面, 兩場波不停講波, 果然好多野講, 由亞洲足球講至歐洲非洲, 我一面睇波一面留意佢有咩料八, 很忙呢! 言語間佢透露了轉左now後不太如意, 又話now遲d會美職波, 雲佬唔會跟奧運隊黎香港, 亨特拉爾唔係咁好波, 熱刺買人方針奇怪.....聽得我津津有味。

GOODBYE!

終於都走了, 我最好的朋友終於開始一年澳洲之旅, 過去的一星期我地見左4晚, 一來要同我地共同o既朋友告別, 二來佢有好多重要文件交俾我保管。 終於都無去送機, 我都唔想搞得太傷感。 不過對於佢o既離開真係超乎我想像的唔捨得, 之前一星期都訓唔好, 發夢都見到佢走o既情景。 剛收到你的報平安mail, 很開心你sydney的朋友把你照顧很好, 希望你hobart o既生活一樣開心, 等我來呀!

失而復得

N73終於回歸我懷抱, 唔係原本果部, 而係再買過一部, 因為市面真係無我鍾意o既機, function比佢好的太貴, 比佢差的我又唔想要, 終於都要買返佢, 可見我個人幾專一呢! 呢部N73都得來不易, 行足一日, 行勻港九新界先買到, 我會好好珍惜, 唔會再俾D賤人偷走。

嬲爆

用左半年多d o既N73今日俾人偷左, 好嬲, 嬲得想喊! 案發地點係旺角信和中心門口, 我正向油麻地方向行走, 從後有個麻甩佬向我撞了一小下, 過左我頭之後仲轉頭望返我, 似係話我撞佢咁, 明明係佢撞我所以我都頗為不滿咁望返佢, 雙方互啤好幾秒。 過左幾分鐘我先發覺電話唔見左, 唔洗問阿貴緊係頭先條粉腸啦, 仆返公司打電話已經關機, 一個用左8個月o既電話就咁無左。

Down到成個下晝都唔想做野, 呢個電話我好鍾意, 而家市面好少似佢function咁齊, 仲要無埋張兩GB卡, 我咀咒個PK到過年! 最慘係而家無新機令我想買, 又唔想買返N73會愈睇愈傷心......

多謝

多謝各方好友, 家人陪我過了一個很重要o既生日, 謝謝你地o既晚餐, 禮物, 不能出黎的都多謝你地o既心意。 一連串o既慶祝, 令我一星期不用回家吃晚飯, 媽媽成日笑我, 英女皇壽辰都係一天假而已, 我比她還要巴閉呢, 哈! 生日過後, 生活返回正軌, 係時候想想過年o既計劃, 希望所許o既生日願望都會實現啦!

HAPPY BIRTHDAY???

從來沒有這麼害怕生日的到來, 但今年真的怕極了, 覺得自己進了老女人的範圍。 很想以興奮o既心情同各方好友慶祝, 但實在興奮不起來, 想起也真奇怪, 點解我地要慶祝自己又短了一年命呢。 不停催眠自己年齡只是個數字, 我唔講無人知我係咁老o既.......除此之外, 更覺得自己到了呢個年紀都一事無成, 失敗得很, 所以十分期待今年會有一些創舉, 流浪去吧!

搬公司

用左兩日終於完成搬公司, 三人搬哂成間公司實在累得要死。 連續兩天朝七晚十, 擔擔抬抬, 聯絡各單位, 跑街搵現成的傢私, 原來現在九成傢私店都無現貨, 最少一星期才從倉送出, 要求自取都唔得。 經過兩日覺得我體內o既energy已經耗盡, 眼都撐不開, 忙得生日就到都無時間安排節目呢! pack 好了的私人物件真不想拆箱, 因為過兩個月我都要搬返屋企, 離開做了七年o既公司, 我同公司一如好多情侶過不到七年之癢, 哈!

新年願望

儘管幾唔想, 新的一年還是來了, 為自己訂下一些目標吧 :
1) 轉工, 要比之前人工高的
2) 去一個長trip, 至少要一個月
3) 買隻鑽石介子給自己作生日禮物
4) 把自己推銷出去 (賤賣亦在所不惜, 哈!)
5) 希望自己, 家人, 好友都身體健康

怕

很怕０８年的來臨
怕自己又老了一歲
怕自己衝不破心理關口
怕如何向老細辭職
怕辭職後哪裡都去不成
怕變成老姑婆
怕新工會不如舊
我就係什麼都怕一餐的典型山羊座

發癲

呢排o係公司經常處於發癲o既狀態, 由於趕新年前出哂d貨, 本身工作已經忙得抖不過氣, 仲要兼顧好多搬公司o既濕碎事, 如轉地址, 電話線, 上網等.....

好早前已經提出過老細很多次唔好新年前搬, 因為知道果陣一定好多野做, 唔係搬遷o既好時候, 何況租約5月先到, 急個屁嗎? 反正做o既係我佢當然無所謂, 我亦都括了出去, 一定先將本身工作搞掂先, OT都做唔哂, 邊有時間理搬公司D o野, 大不了去到新公司無電話用, 無網上, 地址未轉, 因為我一早講左我唔會同時處理到咁多野啦, 等老細睇下唔理我講o既後果囉, 呵!

痛x10000

尋日o係公司想用手接住枝將跌落地o既鉛芯筆, 手掌一拍, 筆頭o既鉛心插入掌心, 吉穿左一個小洞, 見到有d黑色野o係肉裡面, 於是用一枝挑黑頭o既針將皮挑開, new極都new唔到d鉛心以為無野。 返到屋企老爸用針同放大鏡同我睇真d, 輕輕一挑已經痛到我嗌哂救命, 老豆命令我明早要去診所挑返出黎, 我真係唔想去, 知道一定好痛, 由佢留o係手度算吧! 果然不出我所料, 我將手交俾醫生, 訓係床頭向另一面, 消毒後醫生便把針向手中o既洞new, new極都new唔到, 但又見到黑色o既野, 我已經痛得成身震, 想將手抽回, 痛得流眼淚額頭標汗, 想爆粗! 好不容易醫生都決定放棄, 佢見我不停話好痛, 唔可以再new入d, 幫我封好傷口佢先發現 "嘩! 你塊面好白又好青喎, 要唔要訓陣先走?", 我話因為真係好很痛。 返到公司將d鉛芯筆掉左, 累我咁痛? xyz!@#$%....

目標

看住好姊妹近日為達成目標忙得不可開交, 很替她開心, 亦很替她擔心, 畢竟10幾年o既了解佢唔算獨立o既人, 一個人隻身去澳洲遊學一年, 好擔心她應付得來嗎? 另一方面很佩服佢o既勇氣, 放棄工作, 用哂成副身家, 自問有家庭負擔真係唔敢, 雖然佢引我去時確係好心動。 她遇到蛇虫鼠蟻時會怕嗎, 怕她常生病的身體, 怕我地沒有對方陪伴時會寂寞.....做了15多年的好朋友, 從來未分開過咁長時間, 送機時我會哭吧! 比以往少了我的trip, 希望她一切平安順利, 唔好識左澳洲仔唔理我呀!

睇住佢離自己目標越來越近, 不禁懷疑我o既目標東歐之行會達成嗎, 已經想好了後路, 如果去唔成就去澳洲陪下佢啦!

郭富城舞林正傳２００７

唔係講笑, 呢個真係我暫時睇10幾年演唱會最精彩o既一個, 呢次係我第二次睇城城演唱會, 基於上次有口皆碑今次即管睇多次, 果然好睇過上次多多聲。 360度耗資500萬o既台固然係全晚焦點, 得不佩服其idea, 實在前無古人, 城城全晚擒高擒低, 邊唱邊跳又無安全帶, 睇得我地驚險萬分, 據說演唱會監製製作時都由台跌下並跌斷手呢! 一向都覺得城城d歌對男仔來說係唔易唱, 仲要邊唱邊跳都無唔夠氣o既感覺, 40來歲o既佢真係好fit。 完場久久都不能平伏, 還在high, 尾段全場起身一齊跳一齊唱真係high爆,同朋友都好想睇多一場呢! 城城good show!

不聽老人言

不聽老人言果然吃虧在眼前, 前日落街跑步前, 爸媽都追住我叫我加多件衫, 我諗住帶件衫去球場唔知放o係邊, 著住跑又熱, 跑暖個人就唔凍啦, 雖然落去果陣確實陰風陣陣....點知第日真係中招。 頂左一日上埋英文課, 終於都係頂唔住要sick leave。 由於本身有鼻敏感, 一有傷風特別辛苦, 乞嚏打唔停, 打到流哂眼淚, 兼且鼻水倒流無覺好訓。 睇醫生食藥事少, 家下俾兩老不停哦爆, 真係精神轟炸, 為左雙耳著想以後都要著返件衫好了。

期望

你對人好並唔等如人地要對你好, 當你收唔到你期望o既o野真係令人好失望。 或者我要學會唔好付出咁多, 咁就唔會有期望亦唔會失望, 人地無必要對返我好的, 係自己唔識拒絕朋友吧! 常常勉強陪人做自己唔想做o既事, 唔想去o既地方, 掉轉自己俾人拒絕會覺得難過, 吃虧到頭來係自己。 人大了要學識保護自己, 唔好一廂情願以為自己點對人人地都會咁對返你呢!

Halloween in Disney

本來想去海洋公園o既哈佬喂, 不過由於400蚊太貴只好退而求其次去迪士尼果個啦, 同埋我都未去過香港o既迪士尼, 於是呢個星期六同朋友去。 一早已知呢個迪士尼唔太大, 所以都唔預太多時間, 食埋lunch兩點幾先去到, game與game之間距離很短, 六點已經玩哂大部份遊戲, 最好玩都係space mountain, winnie the pooh都好靚.....商店好多紀念品都好精美呀!

最失望係排唔到鬼屋, 條龍長得誇張, 要150分鐘, 所以都係放棄, 好可惜呢, 原本halloween去都係想睇鬼屋, 奈何我地無呢個耐性排。 完左個halloween主題巡遊之後, 行左兩次商店先等到9點放煙花, 因為我地企得太後只睇到煙花, 睇唔到幻燈表演。 最好笑係我地決定表演未完先離開現場, 因為我地要趕返去睇曼聯, 如果等完場幾萬人一齊散, 等幾十班車都出唔到去呢! 我離開迪士尼係用跑的, 怕表演完後人潮湧出黎, 好似走難咁。 唔該哂同我地買九折飛o既ka ya呀!

Marco

好開心傅家俊終於贏左佢首個職業計分賽, 不枉我連捱三晚夜捧場。 十六強至決賽令我最意外係十六強贏希堅斯, 因為對手係世界排名第一, 而且打法係穩打穩扎型。 打得最差一如佢所講係八強o既格連果場, 幾個機會都把握唔到, 差d臨尾出埋局, 唔係對方緊張, 尾三個啡波發瘟佢都無機會入final, 呢場睇得我最心驚膽跳。 至於final贏火箭奧蘇利雲我一d都唔意外, 因為marco打咁耐職業賽對佢o既賽績完全無比下去, 加上火箭o既天才打法, 經常帶神經質, 一個不順會好多失誤, marco就係將佢幾個失誤完全把握哂於是贏得冠軍。

呢幾場比賽睇出marco進步很多, 出Q定左, 起break成功率很高, 新教練應記一功, 但仲有明顯缺點係遠枱同set snooker仲差少少。 另外, 我好驚訝佢心理質素之好, 對兩個排名高佢咁多o既球手, 受壓同接近捧盃時都可以保持冷靜, 唔似丁俊輝EQ咁低。 呢個比賽係我少有足球以外會捱夜睇, 但係好值得, 最後一Q時真係興奮得叫出黎, 有D眼濕濕, 因為我marco有d偏好, 佢唔特別好波, 但佢香港人, 二來佢生日同我爭兩日都係山羊座, 有呢個成就確係了不起! 很開心佢吐了九年無贏過計分賽o既烏氣, 繼續努力呀努力不懈的山羊座 (但我係少數唔係, 哈!)

P.S. 很喜歡佢完場後接受訪問的流利英語同謙虛o既態度

仲差一點

經常以為自己已經無o野, 可以處之泰然, 但一聽到唔想聽o既消息, 睇左唔想睇o既o野, 原來仲有d un住un住, 很氣自己, 氣得想喊。 幾時先可以完全無感覺? 定係一世都會咁? 加油! 仲差一點!

媽媽

一向都唔否認我很愛我o既爸爸媽媽, 可能細個時兩個姐姐跟公公婆婆住, 只有我一直跟住爸媽, 所以感情特別好, 即使而家兩個家姐唔太理屋企我都願意照顧佢地。 媽媽雖然照顧我無微不至, 但都不免係一名"嫦娥", 正如我常說老人院都唔收佢。

基於屋企負擔問題令我遲遲唔敢轉工, 阿爸搵唔多, 兩個家姐無俾家用, 真係唔敢輕舉妄動, 一個唔覺意真係要申請綜援了。 上星期同媽媽飲茶傾左好多, 傾將來, 老實說對自己將來一d把握都無, 轉唔轉到份好工, 會唔會一世獨身通通都係問號。 點知到我問媽媽支唔支持我轉工時, 佢竟然支持, 真好係好意外, 我以為佢同爸一樣會反對的, 基於錢同埋因為我呢份工真係好free, 我爸一都直係反對我轉的, 但我想唔想咁樣困一世。 我問媽點解會支持佢話呢個係我心願, 講左咁多年想做就去做啦, 聽到果刻真係感動到想喊, 媽媽原來唔係我想像中咁"盟塞", 我真係好愛你呢!

色戒

幾個女仔相約去睇呢部戲, 一向都唔係懂得從藝術角度去睇電影, 睇呢套戲原因都係想睇梁朝偉有幾激, 一睇果然令我目瞪口呆, 大膽程度直逼4級, 該睇唔該睇o既都睇到, 很驚訝! 到埋牙鏡頭時, 戲院全場都平息靜氣, 無人發出聲音, 人人都睇得好專心, 包括我。 除左床上戲, 整到套都十分可觀, 拍得好細緻, 好有舊上海風味, 女主角作為新人真係超額完成, 梁朝偉加無話可說, 內心戲一絕, 陳沖做一個無乜發揮o既配角有d浪費, 其配角人選都有意外驚喜, 如庹宗康.....

變

近排多左同朋友出黎聚會, 有開心有唔開心。 開心o既係一個相識十幾年, 由中一年代keep到而家o既朋友, 雖然唔係成日見, 但今次見返依然雞啄唔斷, 大家都關心對方, 讀書時培養o既默契仲o係度, 一個眼神一個小動作都知對方想點, 而家諗返起你果陣話就算我地兩個人唔出聲都唔會尷尬, 而且默契十足, 我而家終於明白了。 好懷念讀書時轉堂時候, 一個眼神就一齊執野走堂o既日子呢!

當然唔係個個朋友都keep得咁好, 有一個就令我好失望, 以前無話不說, 成日一齊o既日子, 自從佢轉左工, 轉左身邊o既人就變得無影無蹤。 出黎都變得好沉默, 知佢一向都唔係多野講, 但都無而家咁靜呀, 出於關心o既問候得回都係一句起兩句止, 係唔係已經習慣唔同我傾訴呢? 轉換對象係必然, 但我真係估唔到關係會淡成咁, 關於佢o既一切唔再以前咁瞭若指掌了, 我需要一d時間適應疏遠左o既關係。

忙

近排真的忙到嘔, 公事忙, 私事也忙, 身邊真的好多天秤座朋友, 九月尾至10月中共有六位好朋友生日, 極多的慶祝活動將會令我荷包乾硬化, 無法啦個個都係我o既好朋友, 氹下佢地開心值得的, 唯有自己慳d使, 我同天秤座的人真係特別有緣, 佢地佔左我好朋友圈子的一半呢! 在此祝wing wing, 劉先生, 經常被變態看中o既劉小姐, 李小姐, 陸小姐, 陳先生, 天堂o既公公都生日快樂!

可惡的和記

荃灣區的朋友, 請不要登記和記寬頻呀! 家裡不能上網20日o係我喊打喊殺情況下先同我整好, 之前約左不下10次叫佢地上黎整放左我8次飛機, 其餘兩次有一次看一看話係機樓問題佢無辦法整就走人, 另一次說最多同我換埋modem, 換左都係唔得佢都無計, 結果當然唔得就走左去。

o係我打過N年次話預約同投訴, 終於有人理我, o係機樓整o既師傅話, 荃灣區和記的系統已經很殘, 5個server壞左兩個, report左半年要求換過, 和記管理層都無理會, 連維修o既師傅都叫我唔好再用和記了, 當然啦, o係我多次叫天不應時已經fax左終止合約的form, 叫佢地合約完時千萬不要同我renew, 所以請各位小心!

散心

爸爸o既小手術終於完成, 正在康復中, 一切尚算順利, 只剩下頗貴的醫療費未找。 放下心頭小石很想去一個短trip, 工作很煩, 還有其他未能解決的事令心情持續低落, 唯有旅行令我放鬆, budget有限, 要留返多d錢下年resign後一個長trip之用。

禍不單行

呢排心情已經不太好, 加上爸爸將要入院, 雖然只是小手術, 都令我情緒再低落了些。 爸爸本來想o係政府醫院排期, 但竟然要等到09年, 仲耐過北京奧運, 良性都變惡性了, 政府d野真係.....xyz。 於是逼於無耐都要轉往私家醫院盡早解決好了, 但又怕昂貴o既費用唔係我地呢d窮人可以負擔。 平時一向健康o既我呢排都有d唔妥, 成日o係街行行下都暈, 腳好似踩不著地, 希望只係貧血或血壓低的小事吧, 爸媽都因為爸爸的手術煩心, 所以我都無話佢地知, 過些日子會無事吧! 真係黑開有條路, 所有濕滯o野快d離我地而去啦! 搵日去拜下黃大仙!

失落

今日心情係近來少有的down, 尋晚挨眼訓睇了一場再次令人失望o既波, 兩戰兩和o係近年少有的差, 其實一d都唔意外, 我一路都唔認為曼聯今年如外界所講的強。 新兵有的質素平平, 有的傷病, 無病無痛的亦要時間溶入, 何來很強之說呢? 之後仲要面對失去朗尼C朗, 情況更壞了.....

其次今日收到一D消息先係令我更down, 本已為自己應放開了, 可以若無其事, 但點解當知道o既時候個心仲係un住un住呢? 很沮喪, 並唔係因為其他人, 係嬲自己, 嬲自己幾時先可做到事不關己, 明明知道已經無相干, 嬲自己情緒點解仲受影響, 真的可以如肥皂劇的主角失撞個頭埋牆失憶就好了, 什麼都記不起, 什麼都不用想。

晚上去Mega Box看了"叛諜追擊" 一如所料的刺激精彩, 心情稍為好轉。

給天下男性的一篇

從都市日報看來的文章, 相信無一女性不身同感受, 男性更加要睇

都市儷人 ：女人之苦
很多男人認為，女人很多時都心甘情願令自己受苦，例如為求看來有一雙高挑的美腿，不惜穿上幾吋高跟鞋，寧願貼上膠布，回家再浸暖水，死也不願與平底鞋結伴。炎炎夏日上街，無論如何都要塗上化妝品，也懶理是否會令自己更加不舒服。這些都是女士愛美的結果，是女士們自願去做，而且很樂意。可是有一些苦，卻不是女人自找來受的。如果做問卷調查，問一下甚麼是做女人最討厭的事，相信不少人會答：月事。男人這一輩子都無法明白，女士每個月為甚麼總會有些日子，感到暴躁不安，甚至像病了一樣沒精打采。有一位勇敢的朋友，為了嘗試了解女士們月事的煩惱，他決定「身入險境」，也來親身感受一下。他先向一位相熟的女性朋友，借來一片衛生巾，然後回家把它貼在內褲，他當時唯一的感覺是：好難受！他認為突然被有厚度的不明物體與肌膚相貼，除了感到很不舒服之外，簡直覺得自己不能自如地走路。不過，他不單去適應它，還與它一同尋夢去，與它共同度過十多小時。但他始終認為缺少了一些真實感，所以就嘗試在衛生巾上加水！為了令讀者更了解他的感受，得到他本人同意，節錄他寫的文章：「嘩！嘩！嘩！真的很難受，濕漉漉，有重量的，跟活在地獄沒有兩樣，甚麼要好的心情立時作鳥獸散，消失得無影無蹤，那有心情做甚麼工作！稍後，我再加多一次水，那就好像有塊鐵在褲襠似的，重得很兇……不斷行行企企也不是辦法，我決定坐下來。HOLY，整片濕濕的衛生巾100%貼住我，女士們，妳們是怎樣捱過的？」最有趣的是，他不停加水後，衛生巾終於承受不住，把他的褲也弄濕……他指出，沒法了解女人月事時不適的感覺，沒法經歷找不到洗手間的狼狽，所以自己並未能完全感受女人之苦。他在網誌的文章，得到的回應如雪片般飛至，無論男士女士，都認為不可思議，但卻又很佩服及稱讚他的勇氣，更加認為他的文章，應該給天下男士一看，還鼓勵所有男士，應該親身體驗一下，這樣男士便會更懂得關懷及體諒。的而且確，男性女性因為生理結構不同，各有各的難言之苦，而這些苦，雙方可能一輩子都不會明白。假如大家都願意為對方著想，為對方易地而處，可能兩性之間的相處，很多問題都會迎刃而解。男士們，你願意為你身邊的人，作出這個勇敢的嘗試嗎？

曼聯澳門之旅

趕頭趕命為左去馬交睇呢場波, 並無往年見到曼聯咁興奮, 一來真係太趕, 去又差d趕唔到船, 返又截唔到的士, 什麼興奮心情都無哂。 其次無機會同d球員近距離接觸, 睇波o既位置又太遠, 只見22個小人跑來跑去。 可能天氣太熱, 令我只想盡快返屋企沖個靚涼休息, anyway最大收獲就係親眼見到英超獎杯又回來我地身邊, 見到的一刻有想喊o既衝動, 久違了, 朋友!

剪定唔剪？

因為剪定唔剪頭髮呢個問題已經諗左我成個禮拜, 突然間好想將d頭髮剪過膊頭, 換過新形象, 二來天氣咁熱, 頭髮會清涼d吧! 但又怕剪左唔好睇會後悔呢, 試過好幾次把心一橫想剪到好短都俾髮型師說服了, 佢地多數都叫我唔好剪, 又問我咁長剪左去捨得喇? 佢地比我更唔捨得呢, 哈! 於是就自作主張幫我只修短幾寸, 所以留左咁多年長髮都剪唔成。 讀書年代亦都試過懶型剪到過耳仔咁短, 結果後悔得要死, 整過暑假都唔敢出街, 等頭髮長返先敢見人, 自此以後都唔敢輕舉妄動去改善髮型, 睇黎我又要諗多一頭半個月了。

SHOCK

今日睇"每當變幻時"前收到個好震撼o既消息, 一個中學o既同班女同學, 因為減肥而有厭食症, 其後變成肺積水, 做完肺手術後又發現肝亦受感染, 終究不治。 聽到之後很心up, 雖然唔係同佢太熟, 畢業後只見過兩三次, 但不時都由其他同學口中知佢o既消息, 說將會結婚之類, 在舊公司附近都撞過佢幾次, 並無咩異樣的。

話說回來呢個女仔一向都唔係肥底, 所以都無太必要減肥, 更難想像減至走火入魔導致厭食。 打來o既同學o係電話中已經有d哭意, 說其他相熟同學更泣不成聲, 諗到個情形真係好難過, 年紀輕輕, 一半o既人生都未完就去世, 雖然好耐無見但佢個樣o係我腦裡面突然異常清晰, 一向看唔透生死o既我聽到呢d事情真係好難釋懷, 特別係呢D年輕o既生命, 心情有d沈重。 希望各位減肥人事適可而止, 肥瘦不及生命來得重要!

Crazy For 小美

My GOD! 呢兩日個腦真係完全俾小美佔據哂, 邊個叫佢咁完美呢! 佢係我第一個覺得真人比上鏡更正o既明星, 除左高大靚仔之外真人更多份吸引人o既氣質, 又nice, 令人為之瘋狂, 怪不得咁多女仔俾佢迷倒, 包括我......經過呢兩日見面令我更加鍾意佢了, 佢燦爛o既笑容, 迷人o既電眼同飛吻都會陪我呢段日子, 十分期待下次有更近o既接觸, 但下次加埋楊丞琳, 夢想更難實現lu!

7.1

7月1日對我黎講有幾重意義 :
1) 31年前一個型男的誕生, 就係我第二最愛雲佬o既牛一
2) 就係我最偉大o既老爹o既牛一
3) 就係我終於打開打馬吊o既勝利之門, 雖然只夠買一個麥記餐, 但已經係一大突破, 多謝幾位手下留情o既雀友
4) 回歸10周年, 老左10年, 不堪回首, 不想回憶(集唔集體都係), 可以回到10年前的我嗎?

偶遇

o係旺角撞到同一個不知名o既人三次, 三次都係佢見到我叫我先, 很好笑o既感覺, 難得每次佢都表現十分熱情, 好雀躍好多野想講咁, 自問都算係對朋友主動熱情o既人, 但見到佢覺得自己都唔夠佢十分一, 有d受不了, 但面對佢好陽光o既笑容很難表現出冷淡呢!

今日第三次o係公司樓下撞到, 對話如下....
A : hi! 你記唔記得我呀?
B : ..... 記得(呆左幾秒, 腦裡翻查記憶, 果一刻真係唔太記得)
A : 你o係呢度返工呀?
B : 係呀 (不太願意俾佢知, 因為之前已經問過, 我敷衍帶過, 今次走唔甩)
A : 呀! 我唔記得你叫咩名添!
B : 下? 我無話過你知呀!
A : (面露尷尬, 伸出手) 你好我叫jason呀 (定係johnson, 唔太記得, 哈!)
B : (無奈都要扼) 我叫becky呀! 好大雨呀, 我都係返上公司先, bye!

短短o既對話完結, 我一路行一路笑不停, 發覺自己講錯野, 雖然我好sure無話過佢知我個名, 但衝口而出咁篤爆左確實令佢有d尷尬呢! 很奇怪的一個人, 只係撞過三次竟然主動扼手介紹自己, 哈! 很傻氣的小朋友!

中學的日子

同朋友傾開中學o既校園生活, 提起依舊怒火中燒, 佢地都好意外我o既中學時代係咁過, 我仲以為大部份人都係咁呢! 很討厭那時o既男同學, 好多無聊o既惡作劇都令我地女生無還擊之力, 推來推去抽水裝裙底已算小事, 更過份的是掉生雞蛋, 搞到成身烏糟辣撻, 將我地d書包掉入男廁要我地入去自己執返, 其他言語上o既侮辱更不用提, 所以從小已經對男生無咩好感, 大都無聊兼幼稚, 毫無風度, 好不容易中四自擺脫呢班怪獸先有兩年好日子過。 以致而家舊同學提起呢班騎呢怪我都不禁討厭, 唔想再見呢!

地獄廚神

原來我都係地獄廚神! 無啦啦屎忽痕去學人整蛋糕, 明明跟足食譜去做, o係爐外面睇係極度正常, 一拎出黎變左pizza, 又矮又硬, 奇怪! 唉! 不嬲唔入廚房o既我都係算吧, 去街買個隱陣d, 不過感謝媽媽咁難食都食左兩啖。

睇左場令人激氣o既巴塞對愛滋賓佬, 一場令人振奮o既皇馬對薩拉戈薩, 美斯o既手球真係舉世嘩然, 頭髮都hi唔到o既波竟然當佢頂入, 幾驚雲佬同碧咸o既西甲冠軍就俾人一手拍走, 好在天有眼, 愛滋賓佬努力不懈咁追和, 唔係巴塞捧盃真係世紀大冤案。 好心痛碧咸傷成咁都頂硬上, 係國家隊傷o既左腳舊患, 得返一隻右腳都繼續踢, 果然係曼聯出品, never give up呀, 雲佬都好叻叻呀, 兩個入球打救皇馬, 希望佢拎埋神射手, 金靴獎同西甲冠軍來個大三元!

我愛碧咸, 很愛很愛......

很開心, 麥卡倫終於向現實低頭, 重選我最愛o既碧咸入國家隊, 佢一定要爭氣救英格蘭出生天, 俾全世界知佢仍然係英格蘭不可或缺o既一員呀! 碧咸o係俾皇馬同英格蘭棄用o既日子, 表現出絕佳o既風度同態度, 用表現令領隊不得不再重用佢, 終於守得雲開。 怎麼辦? 我發覺我更愛佢了, 佢真係波好人品更好, 呵呵! 加油呀! 我終於可以睇返英格蘭o既比賽了! That's why I Love Beckham!

和記寬頻

激氣! 兩星期有多了, 屋企用o既和記寬頻唔知點解突然比56K還要慢, 打去CS佢話搵師傅去機樓搞搞, 好完兩日又慢返, 無網上o既日子真無聊, 好在仲有溏心風暴可以追。 真想把和記轉了, 但又唔捨得佢BT o既極速, 聽說網上行係最穩定, 不過我以前用過又嫌佢o既速度實在不及和記呢, 真頭痕!

再遊馬交

今次係今個半年內第二次再去澳門, 上次即日來回, 今次住一晚, 行程鬆動d, 人都無上次咁攰。 因為平日去真係平好多, 所以托了於英皇做o既朋友買了員工package, 連船飛及入住英皇酒店都係540元一位, 認真超值!

check in後, front desk o既人可能見我地同員工有關, 竟然upgrade我地去頂樓o既行政套房, 開心得我地發顛呢, 自己去咁耐旅行真係未住過咁高級呀! o係房間發完一輪顛就出發四圍食, 最好味就係頤德行o既豆腐花, 連續食左兩日, 真係滑到不知所謂。 之後都係食食食...有豬扒包, 水蟹粥, 紅豆雪條, 其實都相當唔錯。

睇雜誌話星際係最易漏財o既一間賭場, 於是去試下, 果然, 不出5分鐘, 連玩5舖大細, 未輸過, 即贏500, 果日心水真係巴巴聲咁黎, 話左一個double即刻收手, 於是去左新口岸o既酒吧街啤一啤慶祝下。 其後第二日都係去媽閣, 參觀幾間新賭場, 食左餐葡菜, 買埋鉅記就回港。

We are the champion!

苦等三年o既英超冠軍終於返來喇! 曼聯今年o既表現實在令各隊心服口服, 極有說服力, 捱過最多傷兵o既時刻, 終於得到應得o既回報, 真係好感動, 非常期待頒獎一刻。 其實以今年o既人腳贏得英超已經超額完成, 歐聯慘敗當然失望, 但點都唔及英超重要呢! 又係輸俾AC, 費SIR想再贏歐聯應該想想如果何增加一個如加度素咁高質o既防中喇! 而家全力炒車再奪FA CUP, GO!